16
Mowabu cɛnlɛ woolo pe yɛn
na Zheruzalɛmu ca woolo pe yɛnri
pe pe saga
1 Ye simbapɔlɔ yirifɔnŋɔ wa torogo tara ti wunlunaŋa wi kan yarikanga,
mbe yiri wi ni wa Sela ca mbe toro wa gbinri konɔ li ni,
mbe saa kan wi yeri fɔ wa Siyɔn yanwiga ki na.
2 Mowabu tara jɛɛlɛ pe yaa ka pye wa laga ŋga pe maa Arinɔ lafogo ki kɔɔn tɔɔrɔ na we,
paa yɛgɛ ŋga na pe ma kaa sannjɛlɛ purɔ mali yirige li sere ni, li maa mari na toro faa.
3 Pe yɛn naga yuun Zheruzalɛmu ca woolo pe kan fɔ: «Yaa yɛrɛwɛ kaan we yeri,
ye kala la kɔn ye tɛgɛ we wogo na;
ye pye yinmɛ ye tɔn we na yɔnlɔ fuŋgbanga na, paa yɛgɛ ŋga na diwi ma kaa ye laga ni we.
We woolo mbele pe yɛn na fee mbe shɔ, ye pe lara;
mbele pe yɛn na fee malaga ki yɛgɛ, yaga ka pe java.
4 Yege yaga Mowabu cɛnlɛ woolo mbele pè purɔ, pe sa karafa wa ye yeri,
ye pye pe larasaga mbe pe shɔ jɔgɔwɔ pyefɔ wi kɛɛ.»
Katugu pilige ka, lepee wi yaa ka kɔ mbe wɔ wa,
jɔlɔgɔ ki yaa ka kɔ,
jɔgɔwɔ pyefɔ wi yaa kɔ mbe wɔ wa tara ti ni.
5 Ko puŋgo na, wunlunaŋa wa yaa ka yiri mbe cɛn wunluwɔ pi na Davidi wi yɔnlɔ.
Wi wunluwɔ pi yaa ka yeresaga ta,
katugu wi yaa kaa leele pe yɛgɛ sinni kajɛŋgɛ ni konaa mbe pye sɛnrɛ nuŋgba yofɔ;
wi yaa kaa kiti wi kɔɔn kaselege ni,
mbaa fyɛɛlɛ kasinŋge pyege ki na.
Zheruzalɛmu woolo pe se ya
mbe Mowabu cɛnlɛ woolo pe saga
6 Wè Mowabu cɛnlɛ woolo pe yɛɛ gbɔgɔwɔ pi sɛnrɛ logo,
naa pe yɛɛ gbɔgɔwɔ ndorogo ki ni,
naa pe yɛɛ nagawa po naa pe yɛɛ gbɔgɔwɔ pi ni,
naa pe yɔn gbɔgɔwɔ sɛnyoro ti ni konaa pe maa pe yɛɛ mbɔnrɔgi leele na, na sɛnwara nda yuun ti ni.
7 Ki kala na, Mowabu cɛnlɛ woolo pe yɛn na gbele Mowabu tara ti wogo na,
pe ni fuun pe yɛn na gbele.
Yaa yuŋgbɔgɔrɔ gbelege gbele, ye jatere wi piri ye na,
katugu pe se ka ɛrɛzɛn gato gbegele wa Kiri Haresɛti ca naa.
8 Ɛshibɔn ca kɛɛrɛ tì waga,
naa Sibima ca ɛrɛzɛn kɛɛrɛ ti ni.
Cɛngɛlɛ sanŋgala ke teele pè ki ɛrɛzɛn tiire njere ti kaari kaari,
to nda tìla jaraga ma kari fɔ wa Yayezɛri ca,
ma saa gbɔn fɔ wa gbinri wi ni.
Ti njere tìla fun ma tɔnlɔndɔnlɔ ma gbɔn fɔ wa Kɔgɔje kuwo wi puŋgo na.
9 Ki kala na, mi yɛn na gbele ja Yayezɛri ca fɛnnɛ pe ni
Sibima ɛrɛzɛn kɛɛrɛ ti wogo na;
e, Ɛshibɔn ca woolo! E, Eleyale ca woolo!
Mi yɛn na yɛntunwɔ lɛgɛrɛ woo na ye yinŋgi;
katugu malaga kɔŋgɔlɔ kele yɛn na yinrigi
ma ye yarilire kɔngɔ yɔgɔrimɔ po naa ye ɛrɛzɛn pire cɔgɔ yɔgɔrimɔ pi kɔ.
10 Yɔgɔrimɔ po naa nayinmɛ pi ni, ti kɔ wa ye tire kɛɛrɛ ti ni,
nayinmɛ yuuro woro na shoo wa ɛrɛzɛn kɛɛrɛ ti ni,
yɔgɔrimɔ tinmɛ woro wa naa.
Lere kpɛ woro na ɛrɛzɛn pire ti tangala mbaa ti tɔnmɔ pi woo wa ti pire tɔnmɔ wɔsaga ki ni naa,
katugu mì ti, a pe nayinmɛ gbeere tì kɔ.
11 Ki kala na, na nawa pì tanga na na Mowabu cɛnlɛ woolo pe wogo na,
paa ŋgɔni yɛn, ŋa pe yɛn na gbɔɔn na yuŋgbɔgɔrɔ yuuro koo wi ni;
na jatere wì piri na na Kiri Haresɛti ca ki wogo na.
12 Mowabu cɛnlɛ woolo pe yɛn na pe yɛɛ tege na kee wa pe sunzara nda wa tinndiye pe na ti na,
pe yɛn na kee wa pe yarisunndo gbɔgɔyinrɛ ti ni, ma saa nari yɛnri wa,
ɛɛn fɔ ko se ya yaraga ka kpɛ yɔn.
13 Sɛnrɛ nda to Yawe Yɛnŋɛlɛ làa yo Mowabu cɛnlɛ woolo pe wogo na, maga lɛ wa wagati titɔnlɔwɔ ni.
14 Koni, Yawe Yɛnŋɛlɛ lì yo fɔ: «Sanni yɛlɛ taanri ni, mbe yala tunmbyee ŋa pe maa sara wi maa yɛlɛ yɔn ki jinri yɛgɛ ŋga na ki ni, Mowabu tara gbɔgɔwɔ pi yaa kɔ, ali mbege ta janwa gbɔlɔ yɛn wa tara ti ni; leele jɛnri mbele pe yaa ka koro yinwege na, pe yaa ka kologo, pe se ka fanŋga ta.»