25
Yɛnŋɛlɛ li woolo pe daga
mbaa li sɔnni
1 Yawe Yɛnŋɛlɛ, mboro ma yɛn na Yɛnŋɛlɛ le.
Mi yaa lɔɔn sɔnni mbaa ma gbogo,
katugu mà kagbɔgɔlɔ pye.
Ŋga mà kɔn ma tɛgɛ, maga lɛ wa wagati titɔnlɔwɔ ni, ki yaa koro wa ki yɔnlɔ li ni, ki se kanŋga.
2 Mà ca ki tɔngɔ maga pye kataga,
ko ŋga malaga sigeca, màga jɔgɔ maga pye sinndɛɛrɛ gbogolosaga,
ko ŋga nambanmbala pe wunluwɔ go gbɔgɔ ye, màga ya, pe se kaga kan naa.
3 Ki kala na, cɛngɛlɛ ŋgele ke yɛn fanŋga ni ke yɛn nɔɔ gbogo;
cɛngɛlɛ woolo mbele pe yɛn lewɛlimbɛlɛ pe cara ti yɛn na fyɛ ma yɛgɛ.
4 Mboro ma yɛn fanŋga fɛnnɛ pe larasaga ye,
mboro ma yɛn fyɔnwɔ fɛnnɛ pe larasaga pe jorowo sanga ni,
mboro ma yɛn pe larasaga ye tisagbɔgɔ wagati ni,
mboro ma yɛn paa pe yinmɛ yɛn kafugo sanga ni,
katugu lewɛlimbɛlɛ pe naŋgbanwa pi yɛn paa tisagbɔgɔ ma kaa na paan na mbogo gbɔɔn we;
5 nakoma paa yɛgɛ ŋga na yɔnlɔ tufunwɔ pi ma tawara ti wɛri we.
Mboro ma ma cɛngɛlɛ ke yɛɛ gbɔgɔwɔ tinmɛ pi kɔ;
yɛgɛ ŋga na kambaara ti ma yɔnlɔ ki tɔn mbege tufunwɔ pi yerege,
mboro fun pa ma ma lewɛlimbɛlɛ pe yurukɔgɔ ki kɔ ma.
Yɛnŋɛlɛ li yɛn
na liwɛn gbɔɔ gbɛgɛlɛ
cɛngɛlɛ ke ni fuun ke kan
6 Yawe Yɛnŋɛlɛ na yawa pi ni fuun fɔ li yɛn na liwɛn gbɔɔ gbɛgɛlɛ cɛngɛlɛ ke ni fuun ke kan,
wa Siyɔn yanwiga ki na.
Yanlaga kara naa duvɛn taan yɛn wa pi ni,
naa kara nda ti sɔgɔlɔ lì yɔn konaa ti sinmɛ pi ni,
konaa duvɛn taan ŋa pè fyɛnli tiyɔngɔ!
7 Wa ki yanwiga nuŋgba ki na, yɛsanga mbɔgbɔgɔ ŋga ki yɛn ma tara na leele pe ni fuun pe yɛgɛ ki tɔn, li yaa kaga walagi;
paritɔnŋgɔ ŋga ki yɛn ma cɛngɛlɛ ke ni fuun ke yɛgɛ ki tɔn, li yaa kaga walagi.
8 Li yaa ka kunwɔ pi fanŋga ki kɔ pew,
we Fɔ, Yawe Yɛnŋɛlɛ li yaa ka yɛntunwɔ pi tulu wa pe ni fuun pe yɛrɛ ti na.
Tifagawa mba pìla pye li woolo pe na, li yaa pi kɔ mboo laga pe na tara ti lagapyew ki ni.
Yawe Yɛnŋɛlɛ lo lì yo ma.
Izirayɛli woolo pe yaa yɛyinŋge ta,
Mowabu tara woolo
poro yaa jɔlɔgɔ ta
9 Ko pilige ko ni, pe yaa ka yo fɔ:
«We Yɛnŋɛlɛ loli na yɛɛn,
wè we jigi wi taga lo na,
lo lì we shɔ.
Lo li yɛn Yawe Yɛnŋɛlɛ na wè we jigi wi taga li na;
ye ti waa yɔgɔri we yin nayinmɛ ni,
katugu lì we shɔ.
10 Yawe Yɛnŋɛlɛ li yaa li kɛɛ ki taga ki yanwiga ŋga ki na mbaa ki go singi.»
Ɛɛn fɔ pe yaa ka Mowabu tara ti tangala mberi tɔngɔlɔ yɔnlɔ nuŋgba,
paa yɛgɛ ŋga na pe ma kaa yan waga kaari mbege le titɛgɛ mbege fɔngɔ mbege pye fyɔngɔ.
11 Mbe pe ta wa ki titɛgɛ ki ni, pe yaa kaa kɛyɛn yi yinrigi mbaa yi fingi,
paa yɛgɛ ŋga na lɔgɔ gbɔnfɔ maa wi kɛyɛn yi yinrigi na lɔgɔ gbɔɔn we;
ɛɛn fɔ Yawe Yɛnŋɛlɛ li yaa ka pe yɛɛ gbɔgɔwɔ pi kɔ
konaa pe fanŋga kagala ke ni.
12 Yoro Mowabu tara fɛnnɛ, ye malaga sigemboro nda tì yagara ma pye fanŋga ni,
Yawe Yɛnŋɛlɛ li yaa kari yaari mberi jaanri,
mberi sinŋge tara wa taambugɔ ki ni.