44
Yɛnŋɛlɛ lo nuŋgba li yɛn Yɛnŋɛlɛ
na li yaa li woolo pe saga
1 Koni, yoro Zhakɔbu setirige piile, yoro mbele na tunmbyeele,
yoro Izirayɛli woolo, yoro mbele mì wɔ, yaa nuru!
2 Yawe Yɛnŋɛlɛ na lì ye da, lo na lì ye gbegele wa ye nɔ wi lara sanni ye sa se,
lo na li yɛn ye sagafɔ we, pa lì yo yɛɛn fɔ:
«Yaga kaa fyɛ, Zhakɔbu setirige piile yoro mbele na tunmbyeele,
yoro Yeshuruni woolo, yoro mbele mì wɔ we.
3 Mi yaa tɔnmɔ yirige pila fuun wa tara nda tɔnmɔ woro wa ti ni,
mbe laforo yirige tila fuun wa lawaga tara ti ni.
Mi yaa kanla yinnɛ li tirige ye setirige piile pe na,
mbe duwaw ye piile pe na.
4 Pe yaa ka yiri mbe jiti paa lɔgɔ yɔn yan yɛn,
paa laforo yɔn sɔli tire yɛn.
5 Lere wa yaa ka yo fɔ: ‹Mi yɛn Yawe Yɛnŋɛlɛ li woo!›
Wa yaa ka yo fɔ mi yɛn Zhakɔbu setirige pyɔ.
Wa yɛgɛ yaa kaga yɔnlɔgɔ wa wi kɛɛ ki na mbe yo fɔ: ‹Mi yɛn Yawe Yɛnŋɛlɛ li woo!›
Pe yaa kaa pe yɛɛ gbogo Izirayɛli mɛgɛ ki kala na.»
Yɛnŋɛlɛ la yɛgɛ woro wa
Yawe Yɛnŋɛlɛ lo puŋgo na
6 Yawe Yɛnŋɛlɛ, Izirayɛli woolo wunlunaŋa we, lo na li yɛn na pe go shoo,
Yawe Yɛnŋɛlɛ na yawa pi ni fuun fɔ, pa lì yo yɛɛn fɔ:
«Muwi mi yɛn koŋgbanŋa, muwi mi yɛn puŋgofɔ,
mbe wɔ mi wo ni, Yɛnŋɛlɛ la yɛgɛ woro wa.
7 Ambɔ wi yɛn paa na yɛn, ki fɔ wi yiri wigi yo!
Ki fɔ wi para wigi filige, wigi yɛgɛ naga na na,
kagala ŋgele kè pye maga lɛ na woolo mì pe tɛgɛ wa fafafa;
kagala ŋgele ke yɛn na paan konaa ŋgele ke yaa ka pye koro puŋgo na, wi ke yo!
8 «Yoro mbele na woolo, yaga ka fyɛ, yaga kaa seri fyɛrɛ ti kala na;
naga yɛn ma, mi sila ki kagala ke yo ma ke naga ye na maga lɛ wa faa wi le?
Yoro ye yɛn na sɛrɛfɛnnɛ wele:
Naga yɛn ma, Yɛnŋɛlɛ la yɛgɛ yɛn wa mi puŋgo na le?
Walaga ka yɛgɛ woro wa, mi si ka yɛgɛ jɛn.»
Yarisunndo gbegelefɛnnɛ pe kala
9 Leele mbele pe maa yaara yanlɛrɛ ti gbegele yarisunndo, pe woro yaraga ka;
pe yarisunndo nda pè gbegele, wa ti ni, ŋga ki yɔn ma wɛ ti ni fuun na, ki yɛn wagafe.
Mbele pe yɛn ki yarisunndo ti sɛrɛfɛnnɛ pe woro na yaan, pee yaraga ko ka jɛn,
ki kala na, pe yaa ka fɛrɛ shɔ.
10 Mbe yarisunŋgo gbegele ma yɛɛ kan nakoma mbe tugurɔn yan mbe yaraga yanlɛgɛ ka gbegele,
ko yaa yiŋgi yɔn lere kan, mbe sigi ta tɔnli woro ki ni?
11 Wele, mbele fuun pe maa ki yarisunndo ti gbogo, pe yaa ka fɛrɛ shɔ;
yarisunndo gbegelefɛnnɛ pe yɛn sɛnwee piile ko cɛ.
Ki daga pe ni fuun pe pan pe gbogolo, pe ni fuun pe pan pe yere lagamɛ!
Pe ni fuun pe sunndo wi yaa ka kɔn pe na, pe yaa fɛrɛ shɔ.
12 Fɛnlɛnaŋa wi ma tugurɔn ti kɔn mberi le wa kasɔn ki ni,
mbe siri gbɔn marito ni, mbe yarisunŋgo gbegele.
Wi maa ki tunŋgo ki piin wi kɛɛ fanŋga ki ni fuun ki ni.
Ɛɛn fɔ na fuŋgo kaa yigi wi fanŋga ki ma kɔ,
na wii tɔnmɔ ta mbe wɔ, wi ma te.
13 Tire tɛfɔ wi ma mana li sanga mbe tige ki taanla,
mbe sigi tuuro ti kerikeri naŋganga ni,
ko puŋgo na, wi mɛɛ kotɛnɛ li lɛ mbege tɛ,
wi maa ki taanla taanlayaraga ki ni, naga tɛni naga yɔn yala.
Wi maga tɛ maga pye paa lere yɛn,
mbege pye ki ma yiri sɛnwee kɔrɔgɔ, ma yɔn,
mbe saga yerege go ka ni.
14 Wi ma sɛdiri tire ta kɔn,
nakoma wi ma sipirɛsi tire naa shɛni tire ta cɔnri, mbe to yaga ti tugbɔlɔ wa kɔlɔgɔ tire ti sɔgɔwɔ;
nakosima wi ma pɛn tire ta sanri wi yɛ,
tisara ti mɛɛ pan ti na mberi lɛ.
15 Ko tire nuŋgba to tari sɛnwee wi ma pye kanŋgirɛ mbaa gbɛri,
wi ma ta le wa kasɔn ki ni mbaa ki waga,
mbe ta lɛ mbe kasɔn gbɛri, mbe yaakara ti sɔgɔ ki na.
Wi ma ka gbegele mbege pye yɛnŋɛlɛ, mbaa ki gbogo,
mbe ka gbegele yarisunŋgo, mbaa fɔli ki yɛgɛ sɔgɔwɔ mbaa ki gbogo.
16 Wi ma tige ki walaga pye kanŋgirɛ, mberi le kasɔn, mbe kara sɔgɔ ki na;
wi ma kara ta fɔ ki na mbe ka mbe tin.
Wi maa ki kasɔn ki waga fun mbe sho fɔ:
«E, mi yɛn na waga jɛŋgɛ, kasɔn yinnɛ li wele!»
17 Wi mɛɛ tige walaga sanŋga ki lɛ mbege gbegele yɛnŋɛlɛ la, mbege pye wi yarisunŋgo;
wi maa fɔli ki yɛgɛ sɔgɔwɔ, naga gbogo.
Wi maa ki yɛnri na yuun fɔ:
«Na shɔ, katugu mboro ma yɛn na yɛnŋɛlɛ le!»
18 Ki leele pee kala jɛn, pee kala kɔrɔ jɛn;
pe yɛngɛlɛ ke yɛn ma tɔn pe na, jaŋgo paga kaa yaan,
pe jatere wi yɛn ma tɔn pe na, jaŋgo paga kaa kagala kɔrɔ jɛnni.
19 Lere kpɛ woro na jatere piin wa wi nawa,
nakoma mbe kajɛnmɛ ta, nakoma mbe tijinliwɛ ta mbe yo fɔ:
«Mì tige ki walaga pye kanŋgirɛ mari le wa kasɔn,
ma yaakara sɔgɔ ki naŋganra ti na,
ma kara fɔ mari ka.
Yiŋgi na mi nɛɛ yarisunŋgo tijaanga gbegele ki tige sanŋga ki ni?
Yiŋgi na mbe sila fɔli ki tikɔngɔ ki yɛgɛ sɔgɔwɔ mbaa ki gbogo?»
20 Lere ŋa wi maa ki piin, wi yɛn paa lere ŋa wi maa fee cɔnrɔ puŋgo na,
wi jatere ŋa wì jɔgɔ wi na, wi maa puŋgo.
Wi se ya mboo yɛɛ shɔ, wi se suu yɛɛ pye fɔ:
«Yaraga ŋga ki yɛn na kɛɛ, ki yɛn lere fanlayaraga.»
Yɛnŋɛlɛ lo li yɛn Izirayɛli woolo
pe go shɔfɔ we
21 Yoro Zhakɔbu setirige piile, yaa nawa tuun ki na;
yoro Izirayɛli woolo, yoro ye yɛn na tunmbyeele wele.
Muwi mì ye gbegele, jaŋgo ye pye na tunmbyeele;
yoro Izirayɛli woolo, mi se fɛgɛ ye na.
22 Mì ye kapere ti jogo mari wɔ wa, paa yɛgɛ ŋga na kambaaga wɔgɔ ma kaa kɔ ma wɔ wa,
mì ye kajɔgɔrɔ ti jogo mari wɔ wa, paa yɛgɛ ŋga na kambaaga ma kaa kari ma wɔ wa.
Ye sɔngɔrɔ ye pan na kɔrɔgɔ,
katugu mì ye go shɔ.
23 Mboro naayeri, ta yɔgɔri maa jɔrɔgi,
katugu Yawe Yɛnŋɛlɛ lo lìgi kala na li pye!
Tara ti nɔgɔna latijuro, yaa nayinmɛ yuuro koo!
Yoro yanwira, yaa yɔgɔrimɔ kɔŋgɔlɔ waa,
Yoro fun kɔlɔyɔ konaa tire ti ni fuun, yaa yɔgɔrimɔ kɔŋgɔlɔ waa,
katugu Yawe Yɛnŋɛlɛ lì Zhakɔbu setirige piile pe go shɔ,
mali gbɔgɔwɔ pi naga poro Izirayɛli woolo pe na.
24 Yawe Yɛnŋɛlɛ na li yɛn ye go shɔfɔ,
lo na làa ye gbegele wa ye nɔ wi lara sanni ye sa se, lì yo fɔ:
«Mi Yawe Yɛnŋɛlɛ, muwi mi yɛn na ki kagala ŋgele ke ni fuun ke piin;
mi nuŋgba muwi mì naayeri wi sanga maa jaraga,
mì nuŋgba muwi mì tara ti jaraga lagapyew.
25 Mi ma Yɛnŋɛlɛ yɔn sɛnrɛ yofɛnnɛ yagboyoolo pe kacɛn kagala ke jɔgɔ,
mbe yara sɛnyogo le jɛlɛfɛnnɛ pe yɔn;
mi ma kajɛnmbɛlɛ pe sɔngɔrɔ puŋgo na,
mbe pe kajɛnmɛ pi kanŋga lembigewe.
26 Ɛɛn fɔ mi yɛn naga yuun naga finligi, fɔ na tunmbyee wi sɛnrɛ ti yɛn kaselege,
mi yɛn nala yɔn sɛnrɛ yofɛnnɛ pe Yɛnŋɛlɛ yɔn sɛnyoro ti piin nari yɔn finli.
Mi yɛn naga yuun Zheruzalɛmu ca ki wogo na fɔ: ‹Leele yaa ka cɛn wa ki ni naa,›
naga yuun Zhuda tara woolo pe cara ti wogo na fɔ:
‹Pe yaa kari kan naa fɔnŋgɔ,
mi yaa ka pe katara ti kan mberi yirige naa fɔnŋgɔ.›
27 Mi maga yo kɔgɔje wi latijugo ki kan fɔ: ‹Waga!
Mi yaa ma tɔnmɔ pi ni fuun pi waga!›
28 Mi maga yo Sirusi wi kan fɔ: ‹Wi yɛn na woolo pe kɔnrifɔ.
Wi yaa kanla nandanwa kagala ke ni fuun ke pye.
Wi yaa ka yo fɔ pe Zheruzalɛmu ca ki kan naa fɔnŋgɔ,
mbe yo fɔ pe shɛrigo gbɔgɔ ki nɔgɔ le naa fɔnŋgɔ.› »