47
Babilɔni ca ki yaa to
1 We Fɔ wì yo fɔ: «Yoro Babilɔni ca woolo, ye tigi ye cɛn wa taambugɔ ki ni!
Ye tigi ye cɛn tara, katugu wunluwɔ jɔngɔ woro ye yeri naa, yoro Kalide tara fɛnnɛ wele.
Lere se kaa ye ca ki yinri naa fɔ: ‹Ca tiyɔngɔ, ca ŋga ki yɛn fɛrɛwɛ na!›
2 Ye yiri ye tirara shyɛn lɛ, ye muwɛ pi tire.
Ye ye gbato wi laga wa ye go ki na,
ye ye deritɔnlɔgɔ ki yirige, ye ye saanra ti yirige funwa na, ye gbaan wi kɔn ye yiri.
3 Pe yaa ka ye witiwaga ki yan,
ye fɛrɛ laga ki yaa ka yiri funwa na.
Mi yaa kanla kayaŋga ki wɔ ye ni,
lere kpɛ se kanla yɛgɛ kɔn mbege pye.»
4 We go shɔfɔ pe maa wi yinri Yawe Yɛnŋɛlɛ na yawa pi ni fuun fɔ,
Izirayɛli woolo Yɛnŋɛlɛ kpoyi le.
5 «Babilɔni ca woolo, ye cɛn ye koro ye pyeri,
ye ye wa diwi wi ni ye lara;
pe se kaa ye yinri naa cɛngɛlɛ ke wunluwɔ ca.
6 Mìla nawa ŋgban na woolo pe ni fɔ jɛŋgɛ,
poro mbele pe yɛn na kɔrɔgɔ ye, mìla pe tifaga,
ma pe le ye kɛɛ.
Ɛɛn fɔ ye sila pe yinriwɛ ta,
yàa jɔlɔgɔ gbɔgɔ taga lelɛɛlɛ pe na.
7 Yàa pye na yuun fɔ: ‹We ca ki yaa koro wunluwɔ ca fɔ sanga pyew.›
Ye sila ki kagala ke yigi kala,
ki yaa ka sa kɔ yɛgɛ ŋga na, ye sila sɔnri ki na.
8 «Koni yaa nuru na yeri, yoro mbele katangala ke yɛn ma ye ndanla.
Yoro mbele ye yɛn ma cɛn yɛyinŋge na pɔw, naga yuun wa ye yɛɛ nawa fɔ:
‹Woro wo na, we yɔngɔ woro wa!
We se ka pye naŋgunjaala fyew,
we se ka we piile pe la fyew!›
9 Ki jɔlɔgɔ kagala shyɛn ke yaa gbɔn ye na yɔnlɔ nuŋgba ni, pilige nuŋgba ki ni;
ye yaa ka ye piile pe la, mbe pye naŋgunjaala.
Ki kagala ke yaa gbɔn ye na fɔ mbe tijanga,
ye lekara kapyere to naa ki ni fuun ni, konaa ye dobodobo kapyere lɛgɛrɛ to naa ki ni fuun ni.
10 «Yàa ye jigi wi taga ye kapere pyege ko na;
yàa pye na yuun fɔ: ‹Lere kpɛ woro na we yaan!›
Ye tijinliwɛ po naa ye kajɛnmɛ pì ye puŋgo.
Yàa pye na ye yɛɛ piin fɔ: ‹Woro wo na, we yɔngɔ woro wa.›
11 Jɔlɔgɔ ka yaa to ye na,
ye se kaga yigilɔmɔ pi jɛn;
jɔgɔwɔ pa yaa gbɔn ye na,
ye se ka ya shɔ pi kɛɛ.
Kapege ka yaa fo mbe to ye na,
sanni ye saga jɛn.
12 «Ye koro yaa ye dobodobo kapyere ti piin san, konaa lekara kapyere ti ni,
to nda yè ye yɛɛ kan ti tunŋgo ki yeri, maga lɛ wa ye punwɛ pi ni we.
Kana ye yaa ka tɔnli ta wa ti ni,
kana ti yaa ti paa fyɛ ye yɛgɛ.
13 Yè ye yɛɛ te wa jɛɛrɛ kapyere ti ni san!
Koni mbele pe naayeri kacɛn kagala ke kɔrɔ jɛn, mbele pe maa jɛɛrɛ piin wɔnŋgɔlɔ ke kacɛn wi ni,
mbele pe maa yevɔnndɔ kacɛn wi wele na kagala ŋgele kaa paan wa yɛgɛ ke yuun ye kan,
poro mbe yiri pe ye shɔ san!
14 «Wele, pe ni fuun pe yaa ka pye paa yan waga yɛn,
ŋga kasɔn yaa ki sogo.
Pe se ya mbe pe yɛɛ shɔ ki kasɔn yinnɛ li yeri.
Naŋganra kasɔn ŋga lere ma yaakara sɔgɔ ki na, ko ka ma,
lere ma cɛn kasɔn ŋga tanla na waga ko ka ma.
15 Ye wele, yàa pye na ye yɛɛ tege mbele kala na, na kanuŋgbaŋga piin pe ni,
poro mbele yàa pye na yewe, maga lɛ wa ye punwɛ pi ni,
pe yaa ka pye yɛgɛ ŋga na, koyi ŋga yɛɛn;
pe ni fuun nuŋgba nuŋgba pe yaa ka gbɔn mbe jaraga, mbe kari pe yɛ pe yɛ.
Lere kpɛ se ka ye shɔ.»