51
Yɛnŋɛlɛ li shɔwɔ pi yɛn kɔsaga fu
1 Yɛnŋɛlɛ lì yo fɔ: «Yoro mbele yè taga kasinŋge ki na naga jaa, yoro mbele ye yɛn na Yawe Yɛnŋɛlɛ li laga jaa,
ye logo na yeri!
Pè ye tɛ ma ye wɔ walaga ŋga ni, yege walaga ki wele,
pè ye tile ma ye wɔ waliwege ŋga ni, yege wele!
2 Ye ye tɛlɛ Abirahamu wi wele
konaa Sara ŋa wì ye se wi ni;
mìla Abirahamu wi yeri sanga ŋa ni, kìla yala pyɔ woro wi yeri,
ɛɛn fɔ, a mì si duwaw wi na ma setirige piile kan wi yeri.»
3 Yawe Yɛnŋɛlɛ li yaa ka Siyɔn ca woolo pe kotogo ki sogo pe na,
mbe lara nda tì jɔgɔ ma koro waga ti kotoro ti sogo ti na.
Li yaa ka gbinri wi kanŋga mboo pye paa Edɛn naŋgɔ kɔlɔgɔ ki yɛn.
Nayinmɛ naa yɔgɔrimɔ yaa ka pye wa ki ni,
naa Yɛnŋɛlɛ li sɔnmɔ yuuro konaa yuuro shɔgɔ ni.
4 «Yoro mbele na woolo, ye logo na yeri,
yoro mbele cɛnlɛ na li yɛn na woolo, ye nuŋgbolo jan na yeri!
Katugu pa lasiri sɛnrɛ ti yaa yiri laga na yeri mbe kan ye yeri;
mi yaa kakɔnndɛgɛŋgɛlɛ tɛgɛ, mbe ta mbe yanwa yirige cɛngɛlɛ ke kan.
5 Na kasinŋge wagati wì yɔngɔ,
na shɔwɔ wagati wì gbɔn makɔ;
mi jate mi yaa kiti kɔn cɛngɛlɛ sanŋgala ke na,
lɔgɔ furo tara woolo pe yaa ka pe jigi wi taga na na,
mbe pe jigi wi taga na fanŋga ki na.
6 Ye ye yɛrɛ ti yirige ye naayeri wi wele,
ye ye yɛrɛ ti sogo ye tara ti wele;
katugu naayeri wi yaa ka kɔ saw paa wirige yɛn,
tara ti yaa ka lɛ mbe wɔ ti yɛɛ ni paa parisankɔnrɔ kɔnrɔ yɛn,
tara woolo pe yaa ka ku paa tishɔnrɔ yɛn.
Ɛɛn fɔ shɔwɔ mba mi yɛn na kaan, pi yaa koro wa fɔ sanga pyew,
na kasinŋge ki se kɔ fyew.
7 «Yoro mbele ye yɛn ma kasinŋge ki jɛn, ye logo na yeri,
yoro mbele na lasiri sɛnrɛ ti yɛn wa ye kotogo na we!
Yaga ka fyɛ sɛnwee piile pe tifagawa sɛnrɛ ti yɛgɛ,
ye sunndo wiga ka kɔn ye na pe tɛgɛlɛ li kala na.
8 Yaawere yaa ka ye pe ni, mbe pe ka paa paraga yɛn,
fyɛnrɛ yaa ka pe ka paa simbasire yaripɔrɔ yɛn.
Ɛɛn fɔ na kasinŋge ki yaa koro wa fɔ sanga pyew;
na shɔwɔ mba mi yɛn na kaan, pi yaa koro wa sanga pyew fɔ tetete.»
Yɛnŋɛlɛ li woolo pe yɛnrɛwɛ
pì pe saga
9 Yɛn ma yiri, Yawe Yɛnŋɛlɛ, yɛn ma yiri, mɔɔ fanŋga ki le ma yɛɛ ni!
Yɛn ma yiri paa yɛgɛ ŋga na màa pye naga piin fafafa we,
wa wagati ŋa wì toro faa wi ni.
Naga yɛn ma, mboro ma maa yaripege Arahavu ki tɔngɔ wi le?
Mboro ma maa kɔgɔje yarifɛlɛgɛ ki gbo wi le?
10 Naga yɛn ma, mboro ma maa kɔgɔje wi waga,
ma latijugo tɔnŋgbɔɔ pi waga wi le?
Naga yɛn ma, mboro ma maa torosaga wɔ wa kɔgɔje wi nandogomɔ,
ma woolo mbele mà pe go shɔ, ma ti a pe toro wi le?
11 Yawe Yɛnŋɛlɛ li woolo mbele lì pe go shɔ, pa pe yaa ka sɔngɔrɔ ma;
pe yaa ka pan mbe ye wa Siyɔn ca yɔgɔrimɔ yuuro ni,
nayinmɛ mbakɔɔ yaa ka pye pe yeri paa wunluwɔ njala yɛn pe go na.
Yɔgɔrimɔ naa nayinmɛ yaa ka pye pe yeri,
yɛsanga naa jɛngɛ ki ni, ti laga yaa ka lali pe ni.
Yɛnŋɛlɛ li woolo pe daga mbaa fyɛ
12 Yɛnŋɛlɛ lì yo fɔ: «Mi we, muwi mi yaa ye kotogo ki sogo ye na;
yiŋgi na ye sila fyɛ sɛnwee yɛgɛ, wo ŋa wi yɛn kufɔ we?
Yiŋgi na ye sila fyɛ sɛnwee pyɔ yɛgɛ, wo ŋa wi yɛn paa yan yɛn we?
13 Ye pye mɛlɛ mɛɛ fɛgɛ Yawe Yɛnŋɛlɛ li na, lo na li yɛn ye dafɔ we?
Lo lì naayeri wi jaraga ma kari, ma tara ti nɔgɔ ki teŋge.
Ye yɛn na fyɛ suyi ye jɔlɔfɔ wi yɛgɛ pilige pyew,
fɔ wì gbɛgɛlɛ mbe pan mbe ye tɔngɔ.
Ɛɛn fɔ ye jɔlɔfɔ wi naŋgbanwa pi yɛn se koni?
14 Sanni jɛnri, mbele pè pɔ ma le wa kaso, pe yaa pe wa pe koro pe yɛɛ kan;
pe se koro wa kaso go ki ni mbe ku,
pe se ka pe yɔnsuro ti la fun.
15 Muwi mi yɛn Yawe Yɛnŋɛlɛ, ye Yɛnŋɛlɛ le;
muwi mi ma ti kɔgɔje wi maa tinmɛ yinrigi,
mbe ti wi tɔnmɔ mba pi maa yinrigi na tuun, pi maa kunlu ŋgbanga.
Na mɛgɛ koyi ŋga Yawe Yɛnŋɛlɛ na yawa pi ni fuun fɔ.
16 Mìlan sɛnrɛ ti le ma yɔn,
mala kɛɛ yinmɛ pi tɛgɛ mɔɔ tɔn.
Muwi mì naayeri wi jaraga ma kari lagapyew, ma tara ti nɔgɔ ki teŋge,
maga yo Siyɔn ca fɛnnɛ pe kan fɔ: ‹Yoro ye yɛn na woolo wele.› »
Zheruzalɛmu ca, yɛn ma yiri
17 Yɛn ma yiri, Zheruzalɛmu ca, yɛn ma yiri,
ma yiri ma yere.
Yoro mbele yàa Yawe Yɛnŋɛlɛ li naŋgbanwa wɔjɛnnɛ li shɔ li kɛɛ ma li wɔ we.
Yàa li wɔ mali kɔ pew, fɔ ma saa gbɔn sinndɛɛrɛ ti na, fɔ a ye yɛgɛ kila kanŋgi.
18 Pàa piile mbele fuun se,
ali lere nuŋgba wo sila ta wa pe ni mbe pe yɛgɛ sin;
pàa piile mbele fuun gbegele,
ali lere nuŋgba wo sila ta wa pe ni mbe pe yigi kɛɛ na.
19 Jɔlɔgɔ kagala shyɛnzhyɛn gbɔn ye na,
koro ke yɛn tɔngɔwɔ naa jɔgɔwɔ, naa fuŋgo konaa tokobi wi ni.
Ambɔ fɔ wi yaa gbele mbe ye kan?
Ambɔ fɔ wi yaa ye kotogo ki sogo ye na?
20 Ye piile pe fanŋga kì kɔ pe ni,
pè toori, ma sinlɛ wa ca nawa koŋgolo ke ni fuun ke yɔn na,
paa pe ma kaa woŋgoli yigi mɛrɛ ni we.
Ko pye ma, Yawe Yɛnŋɛlɛ li naŋgbanwa gbɔɔ mba pi yɛn li ni pe ni pi kala na,
konaa naa Yɛnŋɛlɛ lì yiri pe kɔrɔgɔ we.
21 Ki kala na, ye logo na yeri, yoro Zheruzalɛmu ca woolo mbele yuŋgbɔgɔrɔ ni,
yoro mbele ye yɛgɛ ki yɛn na kanŋgi, ma si yala duvɛn ma ye wɔ.
22 Ye Fɔ, Yawe Yɛnŋɛlɛ, ye Yɛnŋɛlɛ le,
lo na li yɛn ma yere yoro mbele li woolo ye go kala li ni, pa lì yo yɛɛn fɔ:
«Ye wele, wɔjɛnnɛ na li yɛn ye kɛɛ,
lo na li duvɛn wi maa lere yɛgɛ kanŋgi,
mi yaa li shɔ ye yeri.
Na naŋgbanwa wɔjɛnnɛ ye se wɔ wa li ni naa.
23 Mi yaa li le ye jɔlɔfɛnnɛ pe kɛɛ;
poro mbele pàa pye na ye piin fɔ:
‹Ye sinlɛ, we yaa lugu ye na, mbe ye tangala mbe toro!›
Ko sanga wo ni, yàa ye pɔgɔlɔ ke pye paa tara ti yɛn,
paa torokonɔ yɛn torofɛnnɛ pe kan.»