6
Yɛnŋɛlɛ làa Ezayi wi yeri
1 Wunlunaŋa Oziyasi wi kuyɛlɛ li ni, a mì si we Fɔ wi yan wi yɛn ma cɛn wunluwɔ jɔngɔ ka na, ŋga kì yaraga wa naayeri fɔ jɛŋgɛ. Wi wunluwɔ derege yɔnrɔ tìla shɛrigo gbɔgɔ ki yin.
2 Mɛrɛgɛye mbele pe yinri Serafɛnye pèle la pye ma yere wa wi go na. Kanwira kɔgɔlɔni kɔgɔlɔni tìla pye pe ni fuun nuŋgba nuŋgba pe na. Pe ma shyɛn tɛgɛ ma pe yɛrɛ ti tɔn, mbe shyɛn tɛgɛ mbe pe tɔɔrɔ ti tɔn, mbe si shyɛn tɛgɛ mbaa yinrigi sire na.
3 Pàa pye na para pe yɛɛ ni na yuun fɔ:
«Yawe Yɛnŋɛlɛ na yawa pi ni fuun fɔ,
li yɛn kpoyi, kpoyi, kpoyi;
tara ti ni fuun ti yɛn ma yin li gbɔgɔwɔ yanwa pi ni.»
4 Pe jɔrɔgɔmɔ pi kala na, shɛrigo gbɔgɔ yeyɔnrɔ ti nɔgɔ leyaara tìla pye na tigile, a wirige si shɛrigo gbɔgɔ ki yin.
5 Kona, a mì sho fɔ: «E! Jɔlɔgɔ yɛn na wogo, na wogo kì kɔ, katugu mi yɛn lere ŋa wi yɔn sɛnrɛ ti yɛn fyɔngɔ ni. Mi yɛn ma cɛn leele mbele sɔgɔwɔ pe yɔn sɛnrɛ ti yɛn fyɔngɔ ni fun, ma si yala, mì wunlunaŋa, Yawe Yɛnŋɛlɛ na yawa pi ni fuun fɔ li yan yɛnlɛ ni.»
6 Ɛɛn fɔ mɛrɛgɛye mbele pe yinri Serafɛnye, a nuŋgba si yiri sire na ma pan na kɔrɔgɔ kasɔn naŋganga ni wi kɛɛ; wìla ki wɔ wa saraga wɔsaga ki na kamilan ni.
7 A wì sigi jiri na yɔn ki na, mɛɛ yo fɔ:
«Koni naa ŋga kì jiri ma yɔngbasɛɛrɛ ti na,
ma kajɔɔgɔ kì laga ma na,
ma kapege kì kala yaga ma na.»
8 Ko puŋgo na, a mì si we Fɔ wi magala li logo ma yo fɔ:
«Ambɔ fɔ mi yaa tun?
Ambɔ wi yaa kari we tunŋgo ki na?»
A mì sigi shɔ ma yo fɔ: «Mi ŋa, na tun!»
9 Kona, a wì sho fɔ:
«Kari ma saga yo ki leele mbele pe kan fɔ:
‹Ye yaa kaa nuru jɛŋgɛ, ɛɛn fɔ ye se kaa ti kɔrɔ jɛnni,
ye yaa kaa wele jɛŋgɛ, ɛɛn fɔ ye se kaa yaan!›
10 Ma ti ki leele mbele pe kotogo ki ŋgban pe na,
ma pe pye nuŋgboŋgbanla fɛnnɛ,
ma pe yɛngɛlɛ ke tɔn pe na,
jaŋgo paga kaa yaan pe yɛngɛlɛ ke ni,
paga kaa nuru pe nuŋgbogolo ke ni,
paga kaa kagala kɔrɔ jɛnni wa pe kotogo na,
jaŋgo paga ka kanŋga mbe pan mi Yɛnŋɛlɛ na kɔrɔgɔ mbe ta mbe sagala.»
11 A mì si yewe ma yo fɔ: «Ko yaa pye ma fɔ sa gbɔn wagati wiwiin?» A wì sho fɔ: «Ki yaa pye ma fɔ cara ti sa tɔngɔ, lere ka ka pye wa ti ni naa,
sɛnwee pyɔ kpɛ ka ka pye go ka ni naa,
fɔ pe tara ti sa tɔngɔ ti koro waga.
12 «Yawe Yɛnŋɛlɛ li yaa ka sɛnwee piile pe purɔ mbe kari pe ni fɔ lege,
lalɛgɛrɛ yaa ka koro waga wa tara ti ni.
13 Ali na tara woolo pe kɔnsaga kɛwogo ki leele paga koro wa tara ti ni,
poro fun pe yaa ka tɔngɔ;
ɛɛn fɔ yɛgɛ ŋga na pe ka terebɛnti tige kɔn nakoma pe ka tigbɔgɔ kɔn, ki yunŋgɔngɔ ki ma koro wa tara,
ki pyelɔmɔ nuŋgba pi na, ki leele pe yunŋgɔngɔ ki yaa setirige piile yirige, mbele pe yaa pye kpoyi.»