65
Kiti kɔngɔ ŋga ki yɛn na paan
1 Yawe Yɛnŋɛlɛ lì yo fɔ:
Leele mbele pe sila pye na yaraga ka yewe na wogo na,
mìla na yɛɛ naga pe na.
Leele mbele pe sila pye nala lagajaa, mìla ti a pòro na yan.
Cɛnlɛ na li sila pye nala mɛgɛ ki yinri,
mìla ki yo li kan ma yo fɔ: «Mi ŋa, mi ŋa lagamɛ!»
2 Mìla na kɛyɛn yi sanga pilige lomboŋgo ki ni cɛnlɛ la woolo kan, mbele pè yiri ma je,
mbele pe yɛn na tanri kombele na,
mbele pe yɛn na tanri na yala pe yɛɛra nawa jatere wo ni.
3 Pe yɛn cɛnlɛ na lìgi siligi nala naŋgbanwa kagala ke piin na yɛgɛ sɔgɔwɔ suyi;
pe ma saa na saara woo wa pe naŋgɔ tire kɔlɔyɔ yi nawa,
na wusuna nuwɔ taan wi sori sinndɛɛrɛ tofa wi na.
4 Pe ma saa na cɛɛn wa fanra ti sɔgɔwɔ,
ma saa na wɔnlɔ wa waliwere ti ni.
Pe maa cɛlɛ kara ti kaa;
yaakara nda ti yɛn fyɔngɔ ni, to ti yɛn ma pe leyaara ti yinyin.
5 Pe maa sanmbala pe piin fɔ: «Ye fulo wa, yaga ka yɔngɔ we ni, mbe jiri we na,
nakoma we yɛn kpoyi yɛgɛ ŋga na, ki yaa ye gbo!»
Mi ka ki kagala ke yan, ke mala nawa pi ŋgban, ma pye paa wirige yɛn na yiin wa na numawegele ke ni,
ma pye paa kasɔn yɛn, ŋga ki yɛn na sori suyi.
6 Ye wele, ye kapyegele ke ni fuun ke yɛn ma yɔnlɔgɔ na yɛgɛ sɔgɔwɔ;
mi se pyeri mbege yaga ma, fɔ mbege fɔgɔ ki tɔn ye na.
Kaselege ko na, mi yaa pe kapere ti sara wi kan pe yeri mboo yɔn fili.
7 Yawe Yɛnŋɛlɛ lo lì yo ma fɔ:
«Mi yaa pe kajɔgɔrɔ to naa pe tɛlɛye pe kajɔgɔrɔ ti fɔgɔ tɔn pe na,
katugu pàa pye na wusuna nuwɔ taan sori yarisunndo kan wa yanwira ti na,
pàa pye nala tifaga wa tinndiye pe na.
Pe kapyere nda pè pye maga lɛ wa faa, mi yaa ti fɔgɔ tɔn pe na,
mbege yɔn fili.»
8 Pa Yawe Yɛnŋɛlɛ lì yo yɛɛn fɔ:
Na lere wa ka ɛrɛzɛn shashaga ka yan ki pire ti yɛn tɔnmɔ ni wa ɛrɛzɛn tirige ki na,
wi ma yo fɔ: «Yaga kaga jɔgɔ, katugu duvɛn tiyɔɔn yaa yiri wa ki ni.»
Ko nuŋgba ko mi yaa pye na tunmbyeele pe wogo na,
jaŋgo mi ka ka pe ni fuun pe tɔngɔ.
9 Mi yaa ka setirige piile kan Zhakɔbu wi yeri,
mbe piile yirige wa Zhuda cɛnlɛ li ni, mbele pe yaa kanla yanwira ti ta ti pye pe woro;
leele mbele mì wɔ ti yaa ka pye pe woro,
poro mbele na tunmbyeele, pe yaa ka cɛn wa ti na.
10 Sarɔn laga falafala ki yaa ka pye simbaala naa sikaala pe kasaga,
Akɔri gbunlundɛgɛ ki yaa ka pye nɛrɛ ti sinlɛsaga,
na woolo mbele paa na lagajaa, poro pe yaa kaga laga ki ta.
11 Ɛɛn fɔ yoro mbele yè je mi ŋa Yawe Yɛnŋɛlɛ na na,
ma fɛgɛ na yanwiga kpoyi ki na,
ma saa na yaakara kaan yarisunŋgo Gadi ki yeri saraga,
na duvɛn ŋa pè pinlɛ wi yɛɛ ni wi kaan saraga yarisunŋgo Mɛni ki yeri,
12 mi yaa ti tokobi mbe ye gbo.
Ye ni fuun ye yaa ka kanŋguuro kan pe ye kɔnlɔgi;
katugu mìla ye yeri, ɛɛn fɔ yee na yɔn sogo,
mìla para ye ni, ɛɛn fɔ ye sila logo na yeri.
Ŋga ki yɛn mala mbɛn, ko pàa pye,
ŋga ki woro mala ndanla, ko pàa wele ma wɔ na piin.
13 Ki kala na, we Fɔ, Yawe Yɛnŋɛlɛ pa lì yo yɛɛn fɔ:
«Ye wele, na tunmbyeele pe yaa ka yaakara ta mbe ka,
ɛɛn fɔ yoro wo na, fuŋgo yaa ka pye ye na.
Ye wele, na tunmbyeele pe yaa ka tɔnmɔ ta mbe wɔ,
ɛɛn fɔ yoro wo na, wɔgɔ yaa ka pye ye na.
Ye wele, na tunmbyeele pe yaa kaa yɔgɔri,
ɛɛn fɔ yoro wo na, ye yaa ka fɛrɛ shɔ.
14 Ye wele, na tunmbyeele pe yaa kaa jɔrɔgi yɔgɔrimɔ ni, mbe pye nayinmɛ ni wa pe kotogo na,
ɛɛn fɔ yoro wo na, ye yaa kaa gbele nandangawa ni,
ye yaa kaa jɔrɔgi yɛsanga ki kala na.
15 Na woolo mbele mì wɔ, pe yaa kaa ye mɛgɛ ki yinri mbaa leele daŋgi ki ni,
mbaa yuun fɔ: ‹We Fɔ, Yawe Yɛnŋɛlɛ li ti ye ku paa lere tisilan wi yɛn!› »
Ɛɛn fɔ na tunmbyeele poro na, mɛgɛ fɔnŋgɔ ki yaa ka taga poro na.
16 Lere o lere kaa jaa mbe duwaw pye lere wa kan laga tara ti na,
ki fɔ wi yaa ka ki duwaw wi pye Yɛnŋɛlɛ na li yɛn kaselege wolo li mɛgɛ ko na.
Lere o lere kaa jaa mbe wugu laga tara ti ni,
ki fɔ wi yaa ka wugu Yɛnŋɛlɛ na li yɛn kaselege wolo li mɛgɛ ko na;
katugu jɔlɔgɔ ŋga kì pan ma toro faa, pe yaa ka fɛgɛ ki na,
ki kagala ke yaa ka kɔ mbe wɔ wa na yɛgɛ sɔgɔwɔ.
Naayeri fɔnŋɔ naa tara fɔnndɔ
17 Ye wele, mi yaa naayeri fɔnŋɔ naa tara fɔnndɔ da;
lere se ka nawa to kagala ŋgele kè pye ma toro faa ke na,
lere jatere se ka pye ke na naa.
18 Ki daga yaa yɔgɔri, yaa nayinmɛ nii sanga pyew,
yaara nda mi yaa da ti kala na;
katugu mi yaa ka Zheruzalɛmu ca ki kan naa fɔnŋgɔ, mbege kan yɔgɔrimɔ ni,
mbe ca woolo pe pye pe yin nayinmɛ ni.
19 Mi yaa kaa yɔgɔri Zheruzalɛmu ca ki kala na,
mbaa nayinmɛ nii na woolo pe kala na;
pe se kaa gbelege nakoma kɔŋgɔlɔ nuru wa ki ni naa.
20 Piyɛnlɛ se ka pye wa, na li yaa piliye jɛnri pye mbe si ku;
lelɛɛ se ka pye wa, na wi suu yinwege piliye yi pye mbeyi yɔn fili;
katugu lere ŋa ka ka ku mbege ta wì ta yɛlɛ cɛnmɛ, pe yaa ka yo fɔ wì ku wa wi punwɛ pi ni.
Kapege pyefɔ ŋa ka ku mbege ta wi fa yɛlɛ cɛnmɛ ta, pe yaa la ko fɔ wo jate wì daŋga.
21 Pe yaa ka yinrɛ kan mbe cɛn wa ti ni,
mbe ɛrɛzɛn kɛrɛ kɔn mbaa ti pire ti kaa.
22 Pe se ka yinrɛ kan, lere wa yɛgɛ mbe cɛn wa ti ni,
pe se ka ɛrɛzɛn tiire kɛrɛ kɔn, lere wa yɛgɛ mbe kaa ki pire ti kaa;
katugu na woolo pe yaa ka yinwetɔnlɔgɔ ta paa tige yɛn;
poro mbele mì wɔ, pe yaa kaa pe tunŋgo tɔnli wi nii.
23 Pe se kaa tege jaga naa,
pe se kaa piile siin mbaa pe yaan paa kuun;
katugu pe yaa ka pye cɛnlɛ na li woolo pe yɛn Yawe Yɛnŋɛlɛ li duwaw piile,
poro naa pe setirige piile pe ni.
24 Kona, sanni pe sanla yɛnri, pa mi yaa pe yɔn sogo,
sanni pe sa yo pe para makɔ, pa mi yaa logo pe yeri.
25 Kombokaga konaa simbapyɔ wi ni, pe yaa ka pinlɛ mbaa kaa,
jara wi yaa kaa yan kaa paa nɛgɛ yɛn;
wɔɔgɔ ko na, gbanŋgban wo wi yaa pye ki yaakara re.
Kapege kpɛ nakoma jɔgɔwɔ kpɛ se ka pye wa na yanwiga kpoyi ki laga ka kpɛ ni.
Yawe Yɛnŋɛlɛ lo lì yo ma.