4
Zheruzalɛmu ca woolo
pe jɔlɔgɔ kala
1 E, ki pye mɛlɛ, a tɛ wi yɛgɛ kì si wɔ ma!
Kì pye mɛlɛ, a tɛ piiri wi yɛgɛ cɛnwɛ pì si kanŋga ma!
Laga kpoyi ki sinndɛɛrɛ sɔnŋgbanga woro to tì jaraga wa koŋgolo ke yɔn ki na lagapyew gbari?
2 Siyɔn ca pinambiile pàa pye kagbɔgɔ yɔn,
pàa pye kagbɔgɔ yɔn jɛŋgɛ paa tɛ piiri yɛn;
kì pye mɛlɛ pe nɛɛ pe jate koni paa joro cɔgɔ yɛn,
ŋga ki yɛn cɔrɔ fanrifɔ wi kɛɛ yɔnlɔ tunŋgo?
3 Ali kombokara re, ti maga jɛn fɔ ti daga mbe yinnɛ kan ti pire ti yeri,
ti mari kan ti ma wɔnri.
Ɛɛn fɔ na woolo pè kanŋga ma pye leele yinriwɛ mbataala,
paa kɔnrɔsogolo yɛn wa gbinri wi ni.
4 Piyɛngɛlɛ ke yagbowegele kè waga pe na tɔnmɔ wɔgɔ ki kala na;
piile jɛɛlɛ jɛɛlɛ pe yɛn na gbele na yaakara lagajaa,
ɛɛn fɔ lere kpɛ si yaraga ka kan pe yeri.
5 Mbele pàa pye na yaakara tanra kaa,
poro yɛn na kuun fuŋgo ki kɛɛ wa ca nawa koŋgolo ke ni.
Mbele pàa pe koro wa paara sɔnŋgbanga woro ti sɔgɔwɔ,
poro pe yɛn na kayege ki jɛrɛgi na yaakara lagajaa.
6 Na woolo pe kajɔɔgɔ kì tijanga ma wɛ
Sodɔmu ca woolo pe kapere ti na;
ko ŋga kìla tɔngɔ le yɔngɔlɔ nuŋgba ke ni,
lere kpɛ kɛɛ sila gbɔn ki na.
7 Siyɔn ca fanŋga fɛnnɛ pàa pye ma laga ma wɛ nɛzhi wi na,
pàa pye ma filige ma wɛ nɔnɔ na.
Pe wire tìla pye ma yanlaga ma yɔn paa lagba pyɔ yɛɛn yɛn;
pe wire tìla wɔlɔgɔ na yɛngɛlɛ paa safiri sinndɛlɛgɛ sɔnŋgbanga wogo yɛn.
8 Ɛɛn fɔ koni pe yɛgɛ cɛnwɛ pì kanŋga ma wɔ paa nawirige yɛn,
pe woro na pe yaan na pe jɛnni naa wa ca nawa koŋgolo ke ni.
Pè cɔgɔ cɔgɔ fɔ a pe kajeere tì yiri funwa na;
pe witire tì wagawaga pe na paa tiwaga yɛn.
9 Mbele pè gbo tokobi ni, poro wogo ko mbɔnrɔ
ma wɛ fuŋgo kìla mbele gbo poro wogo ko na;
fuŋgo kìla pe fanŋga ki ni fuun ki kɔ,
kɛɛrɛ yarilire ti mbatawa pi kala na.
10 Jɛɛlɛ mbele pàa pye yinriwɛ tafɛnnɛ gbɔɔlɔ,
poro yɛrɛ pàa pye na pe piile pe kuun na pe kara ti sori pe yɛ.
To tìla pye pe yaakara re,
ko kagala koro la pye na woolo pe tɔngɔsanga wi ni.
11 Yawe Yɛnŋɛlɛ li naŋgbanwa pì gbɔn fɔ wa pi da wi na,
lì li naŋgbanwa gbɔɔ kala li wa Siyɔn ca ki na.
Lì kasɔn le Siyɔn ca ki ni,
maga nɔgɔ ŋga kì le ki sogo.
12 Dunruya wunlumbolo wa kpɛ saa ya taga ki na,
dunruya woolo pe ni fuun wa kpɛ saa ya taga ki na,
fɔ pilige ka Zheruzalɛmu ca winfɛnnɛ naa pe juguye
pe mbaa ya ye wa Zheruzalɛmu ca yeyɔnrɔ ti ni.
13 Ko jɔgɔwɔ po la pye Yɛnŋɛlɛ yɔn sɛnrɛ yofɛnnɛ pe kapere to kala na,
konaa saraga wɔfɛnnɛ pe kajɔgɔrɔ ti kala na;
poro mbele pàa lesinmbele pe gbo,
ma pe kasanwa pi wo wa ca nawa pi ni we.
14 Ɛɛn fɔ koni, pe yɛn na talitali na toro wa ca nawa koŋgolo ke ni paa fyɔɔnlɔ yɛn;
pe legbogo kì pe tɛgɛ fyɔngɔ ni,
fɔ maga kan lere yɛrɛ na yɛnlɛ mbe jiri,
ali pe yaripɔrɔ ti na.
15 Na pe kaa paan, leele pe maa jɔrɔgi na yuun fɔ: «Ye yiri wa, yoro fyɔnrɔ fɛnnɛ wele!
Ye yiri wa, yaga ka jiri we na.»
Maga ta pàa pye na fee na jiire, na yanri faa,
cɛngɛlɛ sanŋgala kàa pye naga yuun fɔ: «Kii daga pe cɛn laga we sɔgɔwɔ naa!»
16 Yawe Yɛnŋɛlɛ lo jate lì pe gbɔn ma pe jaraga,
li woro na jaa mbaa pe yaan naa.
Leele pe sila saraga wɔfɛnnɛ pe jate,
pe sila si lelɛɛlɛ pe yinriwɛ ta.
17 Wè wele konɔ ma saa te,
wè sagafɔ ja we yɛɛ na, a kì saa we ya.
Wè wele konɔ ma mɔ, wàa we jigi wi taga cɛnlɛ na na,
ki cɛnlɛ woolo pe sila pan mbe we shɔ.
18 We juguye pàa pye na we tuuro tɔnri na we kɔrɔsi,
jaŋgo mbe we yɛgɛ kɔn waga ka ta mbaa kee wa we katoro ti ni!
We kɔsanga wì yɔngɔ, we yinwege piliye yì kɔ,
we kɔsanga wì gbɔn.
19 We purɔfɛnnɛ pè wege ma wɛ yɔn wi na wa naayeri;
pè taga we na na we puro wa yanwira ti na,
ma saa lara na we singi wa gbinri wi ni.
20 We jigi wìla pye ŋa na, wo ŋa wi yɛn lere ŋa Yawe Yɛnŋɛlɛ làa wɔ,
wàa pye naga yuun wi wogo na ma yo,
we yaa cɛn wa wi yinmɛ pi ni mbaa we yinwege ki piin wa cɛngɛlɛ ke sɔgɔwɔ;
kooŋga wo fun wì to wa juguye pe pɛnɛ li ni.
21 Edɔmu tara woolo, yoro mbele ye yɛn ma cɛn wa Uzi tara,
yaa yɔgɔri yaa nayinmɛ nii!
Ɛɛn fɔ yoro fun ye yaa ka wɔ wa jɔlɔgɔ wɔjɛnnɛ li ni;
ye yaa ka wɔ mbe tin fɔ ye yɛgɛ kila kanŋgi ye na,
mbe ye yɛɛ pagala mbe koro witiwaga.
22 Siyɔn ca woolo ye kapere ti fɔgɔ kì tɔn ye na makɔ,
pe se ye koli mbe kari ye ni kulowo naa;
ɛɛn fɔ Edɔmu tara woolo yoro wo na, Yɛnŋɛlɛ li yaa ye kajɔgɔrɔ ti fɔgɔ tɔn ye na,
li yaa ka ye kapere ti yirige funwa na.