2
Nda tì yo Zhuda tara woolo pe kan
1 Ye wele, pitunŋɔ ŋa wila paan mbe yɛyinŋge sɛntanra ti yari,
wi ŋa wila paan wa yanwira ti na.
Yoro Zhuda tara woolo, yaa ye fɛtiye pe piin,
yaa ye yɔn fɔgɔlɔ ke tɔnni Yɛnŋɛlɛ li yeri.
Lepee wi se ka toro wa ye yeri naa.
Wi yaa ka tɔngɔ pew mbe wɔ wa.
Yɛnŋɛlɛ li yɔn sɛnrɛ nda tìla yo
ma wa Ninive ca ki na
Ninive ca ki yaa ka tɔngɔ
2 Yoro Ninive ca woolo, jɔgɔwɔ pyefɔ wa yɛn na paan mbe to ye na.
Yaa ye malaga sigeca ki kɔrɔsi,
yaa ye koŋgolo ke singi.
Ye ye kurusijaraye pe pɔ malaga ki mɛgɛ ni,
ye ye fanŋga ki ni fuun ki wa nuŋgba.
3 Katugu Yawe Yɛnŋɛlɛ li yaa Zhakɔbu setirige piile pe gbɔgɔwɔ pi sɔngɔrɔ pe na naa.
Ee, li yaa poro mbele Izirayɛli woolo pe gbɔgɔwɔ pi kan pe yeri naa,
katugu beŋganri pyefɛnnɛ pàa pe kɛɛ yaara ti koli,
ma pe ɛrɛzɛn kɛɛrɛ ti jɔgɔ.
4 Juguye pe maliŋgbɔɔnlɔ wɛlimbɛlɛ pe tugurɔn sigeyaara ti yɛn ma yanlaga.
Pe nambala kotogofɛnnɛ pe yaripɔrɔ ti yɛn ma yanlaga.
Pe malaga gbɔnwotoroye pe tugurɔn ti yɛn na yɛngɛlɛ paa kasɔn yɛn.
Pè pe yɛɛ gbɛgɛlɛ mbe sa malaga gbɔn,
pe njaanra tìgi lɛ na tigile.
5 Malaga gbɔnwotoroye pe yɛn na gbinri ŋgbanga na kee wa ca nawa koŋgolo ke ni,
pe yɛn na gbaraŋgbara gbɔɔn wa katoro ti ni.
Na maga pe yan, ma mbe yo fɔ yangambɔgɔlɔ kasɔn yinŋgele wɛlɛ,
pè wege paa yɛnŋɛlɛ yɛngɛlɛmɛ yɛn.
6 Kona, a Ninive ca wunlunaŋa wì suu maliŋgbɔɔnlɔ wɛlimbɛlɛ pe yeri,
ɛɛn fɔ pe yɛn na paan na kunrugu.
Pe yɛn na gbinri na kee wa ca ki malaga sigembogo ki yeri,
pè saa pe yɛɛ lara larasaga ka ni.
7 Ca ki yeyɔnrɔ nda ti yɛn ma wa wa gbaan wi yeri, ti kɔɔrɔ tì kaari,
wunluwɔ go kì toori.
8 Juguye pè kɔ ko na, pè yarisunŋgo jɛlɛgɛ ki yirige funwa na,
pège lɛ ma kari ki ni.
Jɛɛlɛ mbele pàa pye naga gbogo, pe yɛn na gbele na jɛɛn paa jɛndɛtuwaye yɛn;
pe yɛn na pe kotoro ti gbɔɔn yɛsanga ki kala na.
9 Ninive ca ki yɛn paa tɔnmɔ wege yɛn, ŋga kì yin na fuun,
a ki tɔnmɔ pila fuun na kee.
Pe yɛn na jɔrɔgi na yuun fɔ: «Ye yere! Ye yere!»
Ɛɛn fɔ lere kpɛ si kanŋga mbe wele mbe sɔngɔrɔ.
10 Ye pe penjara ti koli!
Ye pe tɛ wi koli!
Pe yarijɛndɛ ti se kɔ.
Ca ki yɛn ma yin yaara sɔnŋgbanga woro ti cɛnlɛ pyew ti ni.
11 Ti ni fuun tì koli makɔ, maga jɔgɔ, maga tɔngɔ.
Pe sunndo wì kɔn pe na.
Pe tɔɔrɔ ti yɛn na seri pe na,
pe wire tì fanla pe na,
pe yɛgɛ cɛnwɛ pì kanŋga.
Ninive ca ki yɛn
paa jara ŋa pè yigi
12 Ca ŋga kìla pye paa jaraye wege yɛn, ki yɛn se yeri?
Ko ŋga ki yɛn jara piile pe cɛnsaga ye.
Ko ŋga jara pɔlɔ, naa jara nɔ konaa jara piile pàa pye naga mari,
lere kpɛ na ya mbe pe kala li gbɔn mbeli piri we.
13 Jara pɔlɔ wìla pye na wi kagboro ti kɔɔnlɔ yuroyuroyuro piile pe kan.
Wi ma kara ti sere wa ti yɔlɔgɔ mari gbo jara nɛɛlɛ pe kan.
Wi maa sinlɛsaga ki yin wi kagboro ti ni,
maa wɔnlɔsaga ki yin kara nda wì kɔɔnlɔ yuroyuroyuro ti ni.
14 Ye wele, mì yiri ye kɔrɔgɔ!
Yawe Yɛnŋɛlɛ na yawa pi ni fuun fɔ lo lì yo ma.
Mi yaa ye malaga gbɔnwotoroye pe sogo,
pe yaa kanŋga wirige.
Ye lefɔnmbɔlɔ mbele pe yɛn paa jara piile yɛn, tokobi wi yaa pe gbo.
Yaara nda yaa koli laga tara ti ni, mi yaa ki wogo ki kɔ mbege wɔ wa.
Lere se ka ye pitunmbolo pe tinmɛ ta naa.