21
1 Wunlunaŋa wi jatere wi yɛn Yawe Yɛnŋɛlɛ li kɛɛ, na wi yɛgɛ sinni paa lafogo tɔnmɔ yɛn,
laga ŋga ka li ndanla li ma pi yɛgɛ sin wa ma.
2 Sɛnwee wi kapyegele ke ni fuun ke yɛn ma yɔn wi yɛɛ yɛgɛ na;
ɛɛn fɔ Yawe Yɛnŋɛlɛ lo li ma sɛnwee wi jatere pyelɔmɔ pi jɛn.
3 Mbaa ŋga ki yɛn ma yala konaa ma sin ki piin,
ko yɛn ma Yawe Yɛnŋɛlɛ li ndanla ma wɛ saraga wɔmɔ na li yeri ko na.
4 Mbaa yɛɛ tungu leele na konaa mbaa yɛɛ gbogo,
ki yɛn kagala ŋgele ke maa lepee wi kapege ki nari.
5 Lere ŋa wi ma kagala kele kɔnkɔn ma tɛgɛtɛgɛ wi tunŋgo ki pyelɔmɔ pi na, wi ma kaa yarijɛndɛ lɛgɛrɛ ta;
ɛɛn fɔ lere ŋa wi ma fo ma kɛɛ le kala ni, ki kɔsaga wi ma pye fyɔnwɔ fɔ.
6 Mbele pe ma yarijɛndɛ lɛgɛrɛ ta yagbogowo pi fanŋga na,
ki yɛn paa tifɛlɛgɛ torowogo yɛn, ŋga ki ma kunwɔ kan lere yeri.
7 Lepeele pe lewɛlɛwɛ kapyere ti yaa ka pe jɔgɔ mbe pe wɔ wa,
katugu paa yɛnlɛ mbaa kasinŋge piin.
8 Kajɔɔgɔ pyefɔ wi tangalɔmɔ pi yɛn ma kolo,
ɛɛn fɔ lere ŋa wi nawa pì filige wi na, wi tangalɔmɔ pi ma pye ma sin.
9 Maa wɔnlɔ wa birigo ki go na logologo wa ni,
ko mbɔnrɔ ma pye go nuŋgba ni jɛlɛ malinjagara winfɔ wi ni ko na.
10 Kapege pyege ki la ma pye lepee wi na,
wila wi wɔnlɔ jate wi yinriwɛ ta yɛrɛ.
11 Ŋa wi maa kala lakoo, na paga wi le jɔlɔgɔ, ki ma kajɛnmɛ kan kambajɛnŋɛ wi yeri;
na maga tijinliwɛ fɔ wi yɛgɛ naga, wi ma jɛnmɛ ta.
12 Yɛnŋɛlɛ le, lo na li yɛn ma sin, li yɛgɛ yɛn ŋga ki yɛn na piin wa lepee wi go ki na;
li ma jɔlɔgɔ wa lepee wi na fyaw.
13 Ŋa wi yɛn tege na wi kaa gbele mbaa sagawa jaa, lere ŋa wi maa nuŋgbogolo ke tɔn ki na,
wo fun wi yaa ka yeri mbe sagawa ja, ɛɛn fɔ pe se kaa yɔn sogo.
14 Mbe yarikanga kan naŋgbanwa fɔ wi yeri larawa, ki maa naŋgbanwa pi sogo wi na;
mbe yarikanga ki kan ŋgundo ni, ki maa naŋgbanwa gbɔɔ pi kɔ.
15 Mbaa tanri ŋga kì sin ki na, ki ma pye nayinmɛ lesinŋɛ wi yeri;
ɛɛn fɔ ki ma pye fyɛrɛ gbɔrɔ ni kapege pyefɔ wi yeri.
16 Lere o lere kaa yɛɛ laga tijinliwɛ konɔ li na,
sanni jɛnri wi yaa wi yɛɛ yan wa kuulo pe sɔgɔwɔ.
17 Katangala ke yɛn ma lere ŋa ndanla, wi ma kaa pye tege na;
duvɛn wo naa legbɔɔlɔ lige ki yɛn ma lere ŋa ndanla, wo se pye penjagbɔrɔ fɔ fyew.
18 Lepee wo wi yaa ka pye lesinŋɛ wi go shɔgɔ sara;
leele fanlafɔ wo wi yaa ka pye lejɛnŋɛ wi go shɔgɔ sara we.
19 Lere mbe sa cɛn wa gbinri wi ni wi yɛ,
ko mbɔnrɔ wi sa cɛn jɛlɛ ŋa wi yɛn malinjagara fɔ naa cɛnŋgbanwa fɔ wi ni ko na.
20 Yarijɛndɛ tiyɔnrɔ naa sinmɛ liwoo ma pye wa kajɛnŋɛ wi go;
ɛɛn fɔ lembige ko ma ki woro ti ni fuun ti li yɔn.
21 Lere ŋa kaa kasinŋge naa kajɛŋgɛ jaa mbaa piin, ko fɔ wo yaa yinwege ta;
pe yaa wi yigi kasinŋge ni mbaa wi gbogo.
22 Kajɛnŋɛ wi ma ya ma ye, ma maliŋgbɔɔnlɔ wɛlimbɛlɛ ca shɔ maga ta;
pe jigi wi yɛn ca ki fanŋga laga ŋga na, wi maga tɔngɔ.
23 Lere ŋa wi maa yɔn konaa wi sɛnyoro ti yingiwɛ jɛn,
ko fɔ wo maa yɛɛ shɔ nandangawa kagala ke na.
24 Lere ŋa wi maa wi yɛɛ nari naa yɛɛ gbogo, wo wi maa kala la koo leele na;
wi maa wi kagala ke ni fuun ke piin yɛɛ gbɔgɔwɔ ni.
25 Kagala ŋgele ke la yɛn tiyanŋa wi na, ke mbapyewe po pi yaa kaa gbo;
katugu wila yɛnlɛ mbaa tunŋgo piin wi wire ti ni.
26 Pilige lomboŋgo ki ni, wi yɛgɛ maa yinrigi yaara ti na, tila wi yɛnlɛ tin;
ma si yala lesinŋɛ wo maa kaan wila kɛɛ ŋgban.
27 Lepee wi saraga ki yɛn yaritijaanga,
pee ka logo wìgi wɔ nawa jatere pee ni.
28 Yagbogolo sɛrɛya yofɔ wi yaa ka tɔngɔ mbe wɔ wa;
ɛɛn fɔ lere ŋa wi ma sɛnrɛ ti logo ma wali ti na, wo wi ma yosaga ta na para suyi.
29 Lepee wi maa go ki sheli na kagala ke piin,
ɛɛn fɔ lesinŋɛ wi maa wi tangalɔmɔ pi kɔrɔsi.
30 Sɛnwee wi kajɛnmɛ, naa wi tijinliwɛ,
konaa wi jatere pyewe po pa se ya mbe Yawe Yɛnŋɛlɛ li nandanwa kala li kanŋga.
31 Sɛnwee wi ma shɔn gbɛgɛlɛ malaga gbɔnpilige ki mɛgɛ ni,
ɛɛn fɔ cew tawa pa po ma yiri wa Yawe Yɛnŋɛlɛ lo yeri.