7
Jɛlɛ kɛɛnrɛ lifɔ wi ma lefɔnŋɔ
wi fanla mboo le kapege
1 Na pinambyɔ, na sɛnrɛ ti lɛ,
mala ŋgasegele ke tɛgɛ wa ma kotogo na.
2 Maa tanri na ŋgasegele ke na, pa ma yaa yinwege ta;
maa na nagawa sɛnrɛ ti kɔrɔsi jɛŋgɛ paa ma yɛnmbyɔ wi yɛn.
3 Mari le wa ma yombɛgɛlɛ ke na paa vegeŋɛ yɛn,
ma ti ti cɛnsaga ta wa ma kotogo na.
4 Maga yo kajɛnmɛ pi kan fɔ ma yɛn na nɔsepyɔ sumboro,
ma tijinliwɛ pi pye ma wɔnlɔnjɔ;
5 jaŋgo pila ma go singi nanjaa wi na,
mbɔɔn shɔ nambannjɔ yɔn tangafɔ wi kɛɛ.
6 Pilige ka, mìla pye wa na go ki fenɛtiri wi na,
mìla pye na wele wa fenɛtiri wi tugurɔn nda tì paragi paragi ti wegele ke ni.
7 A mì si lefɔnŋɔ wa yan wa lembire ti sɔgɔwɔ,
ma lefɔnŋɔ tijinliwɛ fu fɔ wa yan wa lefɔnmbɔlɔ pe sɔgɔwɔ.
8 Wìla pye na tooro wa ca nawa konɔ li ni, le ki jɛlɛ cɛnlɛ wa laga tanla;
a wì sigi jɛlɛ wi go konɔ li lɛ na kee.
9 Kìla pye yɔnlɔ tosanga wi ni, yɔnlɔkɔgɔ yɛgɛ ni;
laga kìla pye na woo makɔ, a diwi wila yiin.
10 Mbe ka wele, mɛɛ jɛlɛ wa yan wi pan mboo fili;
wìla wi yɛɛ pɔ paa nanjaa yɛn, tijinliwɛ pee la pye wa wi kotogo na.
11 Wìla pye wɛrɛwɛrɛfɔ naa fɛrɛmbandaa;
wi nanjegele kaa kan wa wi go.
12 Sanni jɛnri wi ma pye wa ca nawa koŋgolo ke ni, sanni jɛnri mbe pye wa katoro ti ni;
wi maa yeregi koŋgɛgɛlɛ ke ni fuun ke na, na nambala pe singi.
13 A ki jɛlɛ wì si yiri ma lefɔnŋɔ wi yigi, ma magala wi ni,
mɛɛ ki yo wi kan wii fɛrɛ ta, ma yo fɔ:
14 «Mila daga mbe nayinmɛ saraga wɔ mbanla yɔn fɔlɔ tɔn,
mìgi wɔ maga yɔn fɔlɔ li tɔn nala.
15 Ko kala na mì yiri ma pan mbɔɔn fili,
mìla pye naga jaa mbɔɔn yan, kooŋga mɔ̀ɔ yan.
16 Mì yarisinlɛɛrɛ ti jan mala sinlɛsaga ki gbegele maga yɔn makɔ;
mì Ezhipiti tara lɛn jese yarisinlɛɛrɛ tiyɔnrɔ ta jan wa ti na.
17 Mì nuwɔ taanyaara wo wa na sinlɛsaga ki na,
nuwɔ taanyaara nda pe yinri miiri, naa alowɛsi konaa sinamɔmu.
18 Pan we sa ndanlawa kala li pye we tin li na, we yɛgɛ kila kanŋgi fɔ sa gbɔn goto pinliwɛ ni,
we we yɛɛ la kɔ jɛŋgɛ wa ndanlawa pi ni.
19 Katugu na pɔlɔ wi woro ca,
wì kari ca na fɔ lege.
20 Wùu penjara bɔtɛlɛ li lɛ mali yin penjara ni,
wi se sɔngɔrɔ mbe pan fɔ sa gbɔn yevɔnŋgɔ ki nandogomɔ.»
21 A ki jɛlɛ wì si lefɔnŋɔ wi fanla, ma fanŋga ta wi na wi yɔn sɛnrɛ ti ni;
a wì suu tile wi yɔn tangawa sɛnrɛ ti ni ma kari wi ni.
22 Le ki yɔngɔlɔ nuŋgba ke ni, lefɔnŋɔ wì si yiri ma taga wi na,
paa nɔ yɛn ŋa wi yɛn na kee wa yaayoro gbosaga,
paa yarafɔ yɛn ŋa pè pɔ na kee wi ni mbe saa gbɔn;
23 fɔ wanla la mbe ka pan luu sunndo wi sun mboo furu,
paa sannjɛlɛ yɛn na lì gbinri ma saa ye mɛrɛ ni,
katugu wi sigi jɛn mbe yo fɔ wi go ki yaa kɔ wa ki ni.
24 Koni na pinambiile, yaa nuru na yeri,
ye nuŋgbolo jan yanla sɛnrɛ ti logo!
25 Maga ka ma jatere wi yaga wɔɔn tile mbe taga ki jɛlɛ cɛnlɛ ŋa wa puŋgo na,
maga kaa tulugo ki lɛ mbɔɔn yɛɛ puŋgo.
26 Katugu wì nambala lɛgɛrɛ jan ma pe gbo;
mbele fuun wì si gbo, pàa pye fanŋga ni fun.
27 Wi go ko ki yɛn kuulo tara konɔ le,
li ma tigi ma kari lere wi ni wa kunwɔ pi ca ki ni.