9
Kajɛnmɛ pi yɛn
na leele pe yinri naa
1 Kajɛnmɛ pì tiyagala kɔlɔshyɛn tɛ,
ma go kan pi yɛɛ kan.
2 Pì yaayoro kɔnlɔgi sɔgɔlɔ gbɔlɔ mɛgɛ ni,
ma pi duvɛn taan wi gbɛgɛlɛ.
Pì pi lisaga ki gbɛgɛlɛ ma kɔ.
3 Pì pi tunmbyeele jɛɛlɛ pe tun ma yo pe saga yerege ŋga ki yari.
Pe yɛn wa ca ki tinndiye pe namunjɔ wi na, naga yari fɔ:
4 «Lere o lere wi yɛn kambajɛnŋɛ, wo mbe toro laga na yeri!»
Mbele tijinliwɛ woro pe ni, pi yɛn naga yuun pe kan fɔ:
5 «Ye pan yanla suro ti li,
yanla duvɛn taan ŋa mì gbɛgɛlɛ wi wɔ!
6 Ye kambajɛnmɛ kagala ke yaga wa, pa ye yaa yinwege ta;
yaa tanri wa kagala kɔrɔ jɛnmɛ konɔ lo ni!»
Kajɛnŋɛ wo
naa yɛɛ gbɔgɔwɔ fɔ wi ni pè jɛn
ma wɔ pe yɛɛ ni yɛgɛ ŋga na
7 Lere ŋa ka sɛnŋgbanra yo yɛɛ gbɔgɔwɔ fɔ wi na mbe ta mboo le konɔ, wi ma ti pe maa tifaga;
lere ŋa kaa lepee wi yɛrɛgi, wo ma kaa tɛgɛlɛ ta.
8 Maga ka lere ŋa wi maa kala lakoo wi yɛri, nakoma wi yaa ma panra;
ɛɛn fɔ kajɛnŋɛ wo yɛri, pa ma yaa pye mboo ndanla.
9 Ta kajɛnŋɛ wi nari, pa ka yaa taga wi kajɛnmɛ pi na;
lesinŋɛ wi kara jɛnmɛ pi ni, pa wi yaa ka taga wi jɛnmɛ pi na.
10 Mbaa fyɛ Yawe Yɛnŋɛlɛ li yɛgɛ ko ki yɛn kajɛnmɛ pi lɛsaga ye;
mbe Yɛnŋɛlɛ na kpoyi li jɛn ko ki yɛn tijinliwɛ we.
11 Ee, mi ŋa kajɛnmɛ we, mi yaa ka taga ma yinwege piliye yi na;
ma yaa yinwetɔnlɔgɔ ta.
12 Na maga pye kajɛnŋɛ, mboro ma yaa ma kajɛnmɛ tɔnli wi li ma yɛ;
na maga sila kala lakoo, mboro ma yaa ki go kala li lɛ ma yɛ.
Leele mbele pee jilige,
kambajɛnmɛ pi yɛn na pe yinri
13 Kambajɛnmɛ pi yɛn paa jɛlɛ pyɛnpyɛnfɔ yɛn, ŋa wii kala jɛn;
ŋa wii kala la kpɛ kɔrɔ jɛn.
14 Wi ma cɛn wa wi go yɔn ki na,
wi ma cɛn jɔngɔ na wa ca ki laga ŋga kì yaraga ki go na,
15 mbaa jɔrɔgi la torofɛnnɛ pe yinri ŋgbanga,
poro mbele pe ma sin na kee pe konɔ li ni we.
16 Wi ma yo fɔ: «Lere o lere wi yɛn kambajɛnŋɛ, wo mbe toro laga na yeri;»
tijinliwɛ woro mbele ni wi yɛn na pe piin fɔ:
17 «Tɔnmɔ mba mà yu ma wɔ, pi ma tanla fɔ jɛŋgɛ,
yaakara nda mà lara ma ka, ti ma tanla fɔ jɛŋgɛ.»
18 Ɛɛn fɔ ki leele pe sigi jɛn mbe yo fɔ pa kunwɔ pi yɛn wa ki laga ki ni,
fɔ leele mbele ki jɛlɛ wì yeri, pe yɛn na kee wa kuulo tara ti gbunlundɛgɛ ki ni.