109
Lere ŋa wi yɛn tege ni
wi Yɛnŋɛlɛ yɛnrɛwɛ
1 Yurukɔɔlɔ to wi sɛwɛ yurugo. Davidi Yɛnŋɛlɛ gbɔgɔyurugo.
E, Yɛnŋɛlɛ, mboro mi maa sɔnni, maga ka pyeri na na!
2 Katugu lepeele naa nambara fɛnnɛ pè pe yɔn ki yɛngɛ na na, na baga na na,
pe yɛn na finlɛlɛ na tari na na.
3 Mbɛnwɛ sɛnrɛ to pe maa yuun na na lagapyew,
pe yɛn na wiin na ni go fu.
4 Ali mbege ta poro yɛn ma mi ndanla, pe yɛn mala panra,
ɛɛn fɔ mi wo na, mi yɛn na yɛnri pe kan.
5 Pe mala kajɛŋgɛ ki fɔgɔ tɔn kapege ni,
mala ndanlawa mba pi yɛn na ni pe kan pi fɔgɔ tɔn mbɛnwɛ ni.
6 Pe yɛn na yuun fɔ: «Ki daga lepee wa mbe yiri wi kɔrɔgɔ mboo le kɛɛ,
ŋa wi yaa baga wi na, wa mbe yere wa wi kalige kɛɛ ki na.
7 Na pe ka kiti kɔn wi na, kiti wi to wi na,
wi yɛnrɛwɛ paa pi jate kapege wi go na.
8 «Ki daga wi yinwege piliye yi were,
lere wa yɛgɛ mbe cɛn tunŋgo ki na wa wi yɔnlɔ!
9 Ki daga wi piile pe pye pijiriwele,
wi jɔ wi pye naŋgunjɔ.
10 Ki daga wi piile pe pye lejagala paa yaara yɛnri,
pe yiri wa pe yumbara ti ni, pe saa yaakara yɛnri fɔ lalerege na!
11 Ki daga fɔrɔ fɛnnɛ pe saa pe kɛɛ yaara ti ni fuun ti koli,
leele pele yɛgɛ mboo kɛɛ tunŋgo tɔnli wi lɛ!
12 Ki daga lere kpɛ ka ka kajɛŋgɛ pye wi kan,
lere kpɛ ka ka pijiriwele mbele wi yaa yaga wi yɛɛ puŋgo pe yinriwɛ ta!
13 Ki daga wi setirige piile pe tɔngɔ pe wɔ wa,
pe mɛgɛ ki kɔ ki wɔ wa setirige piile mbele pe yaa ka yiri puŋgo na pe sɔgɔwɔ!
14 Ki daga Yawe Yɛnŋɛlɛ li jatere wi pye wi tɛlɛye pe kajɔgɔrɔ ti na,
wi nɔ wi kapere tiga ka kala yaga wi na!
15 Ki daga pe kapere ti pye Yawe Yɛnŋɛlɛ li yɛgɛ sɔgɔwɔ sanga pyew,
li pe mɛgɛ ki kɔ ligi wɔ laga tara ti ni!
16 «Ko yaa pye ma, katugu ki lerefɔ wi sila ki jate mbe kagbaraga pye lere kan,
wìla yiri fyɔnwɔ fɔ, naa yuŋgbɔgɔrɔ fɔ konaa ŋa wì jatere wi piri wi na pe kɔrɔgɔ, ma pe jɔlɔ mbe pe gbo.
17 Mbaa leele daŋgi ko kìla wi ndanla,
koni daŋga mbe wo jate wi yigi!
Mbaa duwaw piin leele kan, ki sila wi ndanla,
koni duwaw wi laga mbe lali wo yɛrɛ jate wi ni!
18 Wìla pye na leele pe daŋgi suyi, koni ki daga daŋga kuu le derege,
ki ye wa wi nawa paa tɔnmɔ yɛn,
ki ye wi kajeere ti ni paa sinmɛ yɛn.
19 Daŋga ki pye paa yaripɔrɔ yɛn mboo tɔn,
ki pye wi na suyi paa wi kurusijara yɛn.»
20 Mbele pe yɛn na baga na na konaa mbele pe yɛn na sɛnpere yuun na na,
ko kagala koro Yawe Yɛnŋɛlɛ li yaa ka tɛgɛ mbe pe sara ke ni.
21 Ɛɛn fɔ mboro wo na, Yawe Yɛnŋɛlɛ, na Fɔ, na saga ma mɛgɛ ko kala na,
na shɔ, katugu ma kagbaraga kì yɔn!
22 Mi yɛn yuŋgbɔgɔrɔ fɔ naa fyɔnwɔ fɔ,
na nawa pì tanga na na.
23 Mi yɛn na koo na kee paa yɛgɛ ŋga na yɔnlɔkɔgɔ yinmɛ ma kaa kɔ ma kari,
pe yɛn nala yangara nala puro paa gbatɔ yɛn.
24 Na kanŋguuro ti yɛn na seri na na yeŋge lemɛ pi kala na,
fɔ a mì cɔgɔ ma waga.
25 Ki leele pe yɛn nala tifaga,
na paga na yan pe maa pe yinrɛ ti fingi na tɛgɛ na na.
26 Yawe Yɛnŋɛlɛ, na Yɛnŋɛlɛ, na saga!
Na shɔ ma kagbaraga ki kala na!
27 Na juguye pege jɛn fɔ ma yawa po pì ko pye ma,
pege jɛn fɔ Yawe Yɛnŋɛlɛ, mboro jate màga pye.
28 Ali na poro kaa na daŋgi, mboro wo na, ma yaa duwaw na na,
na paga yiri na kɔrɔgɔ, pe yaa fɛrɛ shɔ;
kona mi ŋa ma tunmbyee, mi yaa la yɔgɔri.
29 Mbele pe yɛn na baga na na, poro mbe tifaga,
fɛrɛ mbe pe yigi mbe pe tɔn paa derigbɔgɔ yɛn!
30 Mi yaa la Yawe Yɛnŋɛlɛ li shari mbaa li sɔnni magaŋgbɔlɔ ni,
mi yaa lali sɔnni wa li janwa woolo pe sɔgɔwɔ;
31 katugu li ma yere fyɔnwɔ fɔ wi tanla mboo saga,
mboo shɔ mbele pe yɛn na wi jɛrɛgi pe kɛɛ.