114
Yɛnŋɛlɛ làa kagbɔgɔlɔ ŋgele pye
Izirayɛli woolo pe yirisanga wi ni
wa Ezhipiti tara
1 Sanga ŋa ni Izirayɛli woolo pàa yiri wa Ezhipiti tara,
sanga ŋa ni poro Zhakɔbu setirige piile pàa yiri wa ki cɛnlɛ woolo mbele nambanmbala pe sɔgɔwɔ;
2 Zhuda tara tìla kanŋga ma pye we Fɔ wi cɛnsaga kpoyi,
a Izirayɛli tara tì pye wi tara.
3 Naa kɔgɔje wìla Yɛnŋɛlɛ li woolo pe yan sanga ŋa ni, a wì si fe ma wɔ wa,
a Zhuridɛn gbaan tɔnmɔ pì sɔngɔrɔ puŋgo na.
4 Yanwira tìla pye na yeni na kanni paa simbapɛnɛ yɛn,
a tinndiye paa yeni na kanni paa simbapiile yɛn.
5 Kɔgɔje, mboro wo feŋgala ma wɔ wa?
Zhuridɛn gbaan, mboro wo sɔngɔrɔkala puŋgo na?
6 Yanwira, yoro yewile kala na kanni paa simbapɛnɛ yɛn?
Tinndiye, yoro yewile kala na kanni paa simbapiile yɛn?
7 Tara, mboro mbaa seri Yawe Yɛnŋɛlɛ li yɛgɛ sɔgɔwɔ,
maa seri Zhakɔbu Yɛnŋɛlɛ li yɛgɛ sɔgɔwɔ!
8 Lo na li ma walaga ki kanŋga mbege pye lambaaga,
mbe waliŋguŋgo ki kanŋga mbege pye pulugo.