128
Mbele pe maa nuru Yɛnŋɛlɛ li yeri,
pe yaa fɛrɛwɛ ta
1 Tangala yurugo mbe kari wa Zheruzalɛmu ca.
Lere o lere wi maa fyɛ Yawe Yɛnŋɛlɛ li yɛgɛ konaa na tanri li koŋgolo ke na,
fɛrɛwɛ yɛn ki fɔ wi woo!
2 Ma yaa kɔɔn kɛɛ tunŋgo tɔnli wi li,
ma yaa pye fɛrɛwɛ na, ma kapyere ti ni fuun ti yaa la yɔngɔ la kee yɛgɛ.
3 Ma jɔ wi yaa pye wa ma go paa ɛrɛzɛn tirige yɛn,
ŋga ki maa pire lɛgɛrɛ sɛni;
ma piile pe yaa cɛn mbɔɔn maga wa lisaga
paa oliviye tire yirifɔnndɔ yɛn.
4 Lere ŋa wi maa fyɛ Yawe Yɛnŋɛlɛ li yɛgɛ,
pa li yaa duwaw wi na yɛɛn.
5 Yawe Yɛnŋɛlɛ li yaa koro wa Siyɔn ca mbe duwaw ma na,
kona mbɔɔn ta yinwege na sanga ŋa fuun ni, ma yaa Zheruzalɛmu ca fɛrɛwɛ pi yan.
6 Ma yaa kɔɔn piile pe piile pe yan yɛnlɛ ni.
Yɛnŋɛlɛ sa yɛyinŋge kan Izirayɛli woolo pe yeri!