14
Lesinmbele poro naa pe Yɛnŋɛlɛ
laga dunruya ŋa wì jɔgɔ wi ni
(Yuuro 53)
1 Yurukɔɔlɔ to wi sɛwɛ yurugo. Davidi Yɛnŋɛlɛ gbɔgɔyurugo.
Tijinliwɛ fu fɔ wi maga yo wa wi nawa fɔ:
«Yɛnŋɛlɛ woro wa.»
Pè pe yɛɛ jɔgɔ,
pe yɛn na katijangara piin;
kajɛŋgɛ pyefɔ kpɛ woro wa.
2 Ma Yawe Yɛnŋɛlɛ li ta wa naayeri, lìli yɛgɛ ki sogo na sɛnwee piile pe wele,
jaŋgo mbege jɛn na kaa pye tijinliwɛ fɔ yɛn pe ni, ŋa wi yɛn na Yɛnŋɛlɛ li lagajaa.
3 Pe ni fuun pè puŋgo,
pe ni fuun pè pinlɛ ma jɔgɔ;
kajɛŋgɛ pyefɔ kpɛ woro pe ni, ali nuŋgba san.
4 Yawe Yɛnŋɛlɛ lì yo fɔ:
«Naga yɛn ma, mbele fuun pe yɛn na kapere ti piin, pee kala jɛn wi le?
Pe yɛn nala woolo pe nii, paa yɛgɛ ŋga na pe maa suro nii we;
paa sila yɛnri mi ŋa Yawe Yɛnŋɛlɛ na yeri.»
5 Kooŋga fyɛrɛ gbɔrɔ yaa ka pe yigi fɔ paa seri,
katugu Yɛnŋɛlɛ li ma pye wa lesinmbele poro sɔgɔwɔ na pe sari.
6 Yaa jaa mbe fyɔnwɔ fɔ wi kagala ŋgele wì kɔn mbe pye ke jɔgɔ;
ɛɛn fɔ, Yawe Yɛnŋɛlɛ lo li yɛn wi larasaga ye.
7 Ambɔ wi yaa yiri wa Siyɔn ca mbe pan mbe Izirayɛli woolo pe shɔ, na lo ma?
Na Yawe Yɛnŋɛlɛ liga kali woolo pe cɛnlɔmɔ pi kanŋga,
poro mbele Zhakɔbu setirige piile pe yaa la yɔgɔri,
poro Izirayɛli woolo pe yaa yin nayinmɛ ni.