28
Lere ŋa wì yɔngɔ kunwɔ pi ni
wi Yɛnŋɛlɛ yɛnrɛwɛ
1 Davidi Yɛnŋɛlɛ gbɔgɔyurugo.
Yawe Yɛnŋɛlɛ, mboro mi yɛn na yinri mala saga!
Mboro ŋa ma yɛn paa na walaga yɛn nala go singi,
maga kɔɔn nuŋgbogolo ke tɔn na yɛnrɛwɛ pi na!
Na maga pyeri, mɛɛ na yɔn sogo,
pa mi yaa pye paa lere wa yɛn, ŋa wi wogo kì kɔ.
2 Na mi kɔɔn yeri mbe yo mala saga,
na mi kanla kɛyɛn yi yirige mbe wa wa ma cɛnsaga ki lajɛŋgɛ kpoyi ki yeri mbɔɔn yɛnri,
maga yaga mala yɛnrɛwɛ gbɔɔ pi logo!
3 Maga ka mi naa lepeele naa kapere pyefɛnnɛ we le kasha nuŋgba ni;
poro mbele pe maa yɛyinŋge sɛnrɛ yuun pe lewee yɛɛnlɛ pe kan,
mbe sigi ta kapege ko ki yɛn wa pe kotogo na.
4 Ma pe sara wi kan pe yeri mbe yala pe kapyere ti ni,
mbe yala pe tipewe pi ni!
Ma pe sara wi kan pe yeri mbe yala pe kɛɛ tunŋgo ki ni;
ŋga pè pye, maga yɔngɔ sɔngɔrɔ pe na!
5 Katugu pe woro na Yawe Yɛnŋɛlɛ li kapyegele ke jate konaa li kɛɛ tunndo ti ni.
Yawe Yɛnŋɛlɛ li pe tɔngɔ paga ka ya yiri naa!
6 Sɔnmɔ yɛn Yawe Yɛnŋɛlɛ li woo!
Katugu lìlan yɛnrɛwɛ gbɔɔ pi logo.
7 Yawe Yɛnŋɛlɛ lo li yɛn na fanŋga naa na tugurɔn sigeyaraga ye.
Mìlan jigi wi taga li na na kotogo ki ni fuun ni.
Nayinmɛ gbɔɔ yɛn na yeri wa na kotogo na;
mi yaa yuuro kɔ mbeli sɔn.
8 Yawe Yɛnŋɛlɛ lo li yɛn li woolo pe fanŋga ye;
li yɛn paa malaga sigego yɛn mbe wunluwɔ ŋa lì sinmɛ kpoyi wo wi na maa wɔ wi shɔ.
9 We Fɔ, ma woolo pe shɔ, poro mbele pe yɛn ma kɔrɔgɔ ye, duwaw pe na!
Ki yaga ma pye pe yɛgɛ sinvɔ konaa pe sagafɔ sanga pyew!