30
Yɛnŋɛlɛ, mboro màla kan
yinwege ni
1 Yurugo ŋga kìla kɔ ma shɛrigo gbɔgɔ ki le Yɛnŋɛlɛ kɛɛ. Davidi Yɛnŋɛlɛ gbɔgɔyurugo.
2 Yawe Yɛnŋɛlɛ, mi yaa ma sɔn,
katugu mala yirige mala wɔ wa wetijugo ki ni.
Mɛɛ yere ki na na juguye paa yɔgɔri na kala na.
3 Yawe Yɛnŋɛlɛ, na Yɛnŋɛlɛ,
mìla gbele mɔɔ yeri mala saga, a màla shɔ.
4 Yawe Yɛnŋɛlɛ, màla wɔ wa kuulo tara ti ni;
na jele nuŋgba la pye wa fanga ki ni,
ɛɛn fɔ màla yinwege ki sɔngɔrɔ maga kan na yeri.
5 Yoro mbele ye yɛn sinmbele Yawe Yɛnŋɛlɛ li ni,
yaa li sɔnni yuuro ni!
Li yɛn kpoyi yɛgɛ ŋga na, yaa ki sɔnni!
6 Katugu li naŋgbanwa pi ma mɔ wagati jɛnri ni mbe si kɔ,
ɛɛn fɔ li kagbaraga pyewe po yɛn wa fɔ sanga pyew.
Ali na kaa pye yembinɛ, gbelege ma pye wa,
pinliwɛ ni, yɔgɔrimɔ ma pan.
7 Mi wo na, mala ta mìla pye ma cɛn pɔw, mìla pye na yuun fɔ:
«Kaŋgbanga kpɛ se ya gbɔn na na.»
8 Yawe Yɛnŋɛlɛ, ma kagbaraga pyege ki kala na, mi yɛn yanwiga ŋga na, màa fanŋga kan ki yeri.
Ɛɛn fɔ màa puŋgo le na ni, a na jatere wì piri na na.
9 Yawe Yɛnŋɛlɛ, mìla gbele mɔɔ yeri mala saga;
na Fɔ mboro mila yɛnri mala yinriwɛ ta.
10 Na mi ka ku, na mi ka tigi wa fanga ki ni,
yiŋgi ma yaa ta san?
Lere ŋa wi yɛn gbanŋgban ko cɛ, wo mbe ya mbaa ma sɔnni mɛlɛ?
Ma yɛn sɛnrɛ nuŋgba yofɔ yɛgɛ ŋga na, wo mbe ya mbege yari mɛlɛ?
11 Yawe Yɛnŋɛlɛ, logo na yeri mala yinriwɛ ta!
Yawe Yɛnŋɛlɛ, pan mala saga!
12 Na nawa mba pì tanga na na, màa kanŋga maa pye yɔgɔrimɔ kala;
jatere piriwɛn yaripɔrɔ nda na na, màri wɔ na na, ma fɛti yaripɔrɔ le na kan;
13 jaŋgo mbaa ma sɔnni yuuro ni wa na kotogo na, mi ka ka pyeri mbege yaga.
Yawe Yɛnŋɛlɛ, na Yɛnŋɛlɛ, mi yaa lɔɔn sɔnni fɔ sanga pyew.