43
1 E, Yɛnŋɛlɛ, na kiti wi kɔn, mala tanga ki kan na yeri,
yere na kala li ni mbele pe woro na fyɛ Yɛnŋɛlɛ yɛgɛ pe kanŋgɔlɔ;
na shɔ leele fanlafɛnnɛ naa katijangara pyefɛnnɛ pe kɛɛ.
2 Mboro ma yɛn Yɛnŋɛlɛ konaa na go sigefɔ.
Yiŋgi na, a ma silan wa?
Yiŋgi na mbe sila tanri mbaa tooro nandangawa ni,
jɔlɔgɔ ŋga na juguye paa na jɔlɔ ki kala na?
3 Ma yanwa pi naga na na konaa ma kaselege ki ni,
ti ta tila na yɛgɛ sinni mbe kari na ni wa ma yanwiga kpoyi ki na, wa ma cɛnsaga ki ni.
4 Kona, Yɛnŋɛlɛ, mi yaa kari wa ma saraga wɔsaga ki tanla, wa Yɛnŋɛlɛ ma yeri,
mboro ŋa ma yɛn na nayinmɛ po naa na yɔgɔrimɔ pi go ye;
mi yaa ka ŋgɔni gbɔn mbɔɔn sɔn, mboro ŋa ma yɛn Yɛnŋɛlɛ, na Yɛnŋɛlɛ le!
5 E, mi we, yiŋgi na mbe silan wire ti fanla na yɛɛ na?
Yiŋgi na mbe sila yogo mbaa na yɛɛ tooro na cɛnlɔmɔ pi kala na?
Mbanla jigi wi taga Yɛnŋɛlɛ li na ko mbɔnrɔ, katugu mi yaa li shari mbeli sɔn naa;
lo li yɛn na shɔfɔ konaa na Yɛnŋɛlɛ.