45
Wunlunaŋa wa jayire yurugo
1 Yurukɔɔlɔ to wi sɛwɛ yurugo. Pe maa ki koo yurugo ŋga kɔlɔmɔ na pe maa ki yinri «Masho pɔlɔ yarifyɛɛnrɛ.» Kore pinambiile pe nagawa yurugo. Ndanlawa yurugo yi.
2 Na nawa pi yɛn ma yin sɛntanra ti ni fɔ nala wire;
ko mì yo mi yaa na yurugo ki kɔ mbe wunlunaŋa wi tanga.
Mila jaa na yɔn ki pye paa sɛwɛ yɔnlɔgɔfɔ jɛnŋɛ wi sɛwɛ yɔnlɔgɔ kanŋgala yɛn.
3 Ma yɛn ma yɔn ma wɛ sɛnwee piile pe ni fuun pe na;
ma yɔn sɛnrɛ ti yɛn ma tanla,
ki kala na, Yɛnŋɛlɛ lì duwaw ma na fɔ sanga pyew.
4 Mboro ŋa maliŋgbɔɔn kotogofɔ, ma tokobi wi pɔ wa ma sɛnnɛ;
wi yɛn ma dɛŋgɛ konaa ma gbɔgɔwɔ!
5 Wa ma gbɔgɔwɔ pi ni, ye wa ma malaga gbɔnwotoro wi ni,
ma sa malaga gbɔn ma jugu wi ni ma cew ta;
malaga ki gbɔn kaselege, naa nandanwa konaa kasinŋge ki kala na.
Ma fanŋga kɛɛ ki ya ki maliŋgbɔngɔ kagbɔgɔlɔ pye ma kan!
6 Ma wangala ke yɔnrɔ tì tanla;
ke yaa wunlunaŋa ma juguye pe kotoro ti furugu,
tara woolo pe yɛn na tuun ma fanŋga ki nɔgɔ.
7 E, Yɛnŋɛlɛ, ma wunluwɔ pi yaa koro wa sanga pyew fɔ tetete;
ma yɛn nɔɔ wunluwɔ pi yɛgɛ sinni kasinŋge ni.
8 Kasinŋge ki yɛn mɔɔ ndanla, a tipewe pɔ̀ɔn mbɛn,
Ko kala kì ti, Yɛnŋɛlɛ, ma Yɛnŋɛlɛ lɔ̀ɔn wɔ,
ma sinmɛ kpoyi wo wa ma go ki na, mba pi yɛn yɔgɔrimɔ woo, mɔɔ kala li mbɔnrɔ ma wɛ ma pinlɛyɛɛnlɛ pe na.
9 Sinmɛ nuwɔ taan mba pe yinri miiri, naa alowɛsi konaa kasi ti nuwɔ taan pi yɛn ma yaripɔrɔ ti na;
ma wunluwɔ go ŋga pè gbegele ma fere solo ŋgangala ni,
yarigbɔnrɔ magaŋgala tangala na yinrigi wa ki ni, na nayinmɛ kaan ma yeri.
10 Wunlunaŋa sumborombiile yɛn wa jɛɛlɛ mbele pɔ̀ɔn ndanla pe ni;
wunlunjɔ wi yɛn ma yere wa ma kalige kɛɛ ki na, wi yɛn maa yɛɛ fere Ofiri tara tɛ piiri ni.
11 Na sumborombyɔ, logo na yeri! Wele, ma nuŋgbogolo ke jan ma logo na yeri;
maga kaa jatere piin ma cɛnlɛ woolo naa ma to go woolo pe na!
12 Wunlunaŋa wi yɛgɛ yiri ma na ma tiyɔnwɔ pi kala na;
wo wi yɛn ma tafɔ we, kanŋguuro kan wi nɔgɔ maa gbɔgɔ.
13 Kona, Tiri cafɛnnɛ wele,
poro mbele leele mbele pe yɛn penjagbɔrɔ fɛnnɛ ma wɛ,
pe yaa kaa paan yarikanra ni ma kan,
jaŋgo mbe ti pe kala lɔɔn ndanla.
14 Wunlunaŋa sumborombyɔ wi yɛn wa wunluwɔ go ki ni, wi yɛn gbɔgɔwɔ ni lagapyew;
wi yaripɔrɔ pèri sɔgɔ tɛ ni.
15 Pè kari wi ni wa wunlunaŋa wi yeri, wi yaripɔrɔ nda pè sɔgɔ ti ni wi yɛɛ na.
Sumbonɔ pele yɛn wi puŋgo na, wi wɔnlɔnjaala wele, pe yɛn na kee pe ni wa wunlunaŋa ma tanla.
16 Pe yɛn na kee pe ni wa yɔgɔrimɔ naa nayinmɛ pi sɔgɔwɔ,
pè ye wa wunlunaŋa wi go ki ni.
17 Wunlunaŋa, pilige ka, ma pinambiile pe yaa ka cɛn wa ma tɛlɛye pe yɔnlɔ,
ma yaa ka pe pye kundigile tara ti lagapyew ki ni.
18 Mi wo na, mi yaa kaa ma mɛgɛ ki yari setirige piile mbele fuun pe yaa ka yiri puŋgo na pe kan;
kona cɛngɛlɛ ke yaa lɔɔn gbogo sanga pyew fɔ tetete.