56
Mìlan jigi wi taga Yɛnŋɛlɛ li na,
mi woro na fyɛ
1 Yurukɔɔlɔ to wi sɛwɛ yurugo. Pe maa ki koo yurugo ŋga kɔlɔmɔ na, pe maa ki yinri: «Tigbɔrɔ nda wa lege ti jɛndɛtuwa.» Davidi yurugo yi, wìla ki kɔ sanga ŋa ni Filisiti tara fɛnnɛ pàa pan maa yigi wa Gati ca.
2 E, Yɛnŋɛlɛ, na yinriwɛ ta, katugu leele pe yɛn nala puro nala tege;
pe yɛn na wiin na ni pilige pyew, nala jɔlɔ.
3 Pilige pyew na juguye pe yɛn nala puro nala tege,
pe yɛn ma lɛgɛ, poro mbele paa wiin na ni yɛɛ gbɔgɔwɔ ni.
4 Ɛɛn fɔ fyɛrɛ ti kanla yigi sanga ŋa ni,
pa mi mala jigi wi taga mboro na.
5 Mi yɛn na Yɛnŋɛlɛ li sɔnni li sɛnrɛ ti kala na,
mìlan jigi wi taga Yɛnŋɛlɛ lo na, mi woro na fyɛ;
yiŋgi sɛnwee mbe ya pye na na?
6 Pilige pyew pe maa na jɔlɔ pe sɛnrɛ ti ni,
kapege ko cɛ pe maa jate na ni.
7 Pe ma yɔn le na na,
pe maa na torosara ti kɔrɔsi,
katugu paa jaa mbanla gbo.
8 Naga yɛn ma, pe mbe shɔ mbege ta paa ki kambasinnde nda ti piin le?
E, Yɛnŋɛlɛ, wa ma naŋgbanwa pi ni, ki leele pe tɔngɔ!
9 Màla yɔngɔlɔ kansara ti jɛn, sanga ŋa ni mìla pye na fee nala yɛɛ go jaa we,
ta nawa tuun na yɛntunwɔ pi na suyi;
naga yɛn ma, pi wɔmɔ kala li woro ma yɔnlɔgɔ wa ma sɛwɛ wi ni wi le?
10 Na mi kɔɔn yeri pilige ŋga ni mala saga,
ko pilige ko ni, na juguye pe yaa sɔngɔrɔ puŋgo na.
Mìgi jɛn fɔ mboro ŋa Yɛnŋɛlɛ ma yɛn na ni.
11 Mi yɛn na Yɛnŋɛlɛ li sɔnni li sɛnrɛ ti kala na,
mi yɛn na Yawe Yɛnŋɛlɛ li sɔnni li sɛnrɛ ti kala na.
12 Mìlan jigi wi taga Yɛnŋɛlɛ li na, mi woro na fyɛ,
yiŋgi sɛnwee mbe ya pye na na?
13 E, Yɛnŋɛlɛ, yɔn fɔgɔlɔ ŋgele mì kɔn ma yeri, mi yɛn na jaa mbe ke tɔn mbe ke yɔn fili,
mi yaa ka nayinmɛ saara wɔ ma yeri mbɔɔn shari,
14 katugu màla shɔ kunwɔ pi kɛɛ,
ma ti mii kurugo mbe to,
jaŋgo mbaa tanri Yɛnŋɛlɛ ma yɛgɛ sɔgɔwɔ mbaa na yinwege ki piin wa yanwa pi ni.