65
Yɛnŋɛlɛ li daga waa li sɔnni
yarijɛndɛ nda li yɛn na kaan
we yeri ti kala na
1 Yurukɔɔlɔ to wi sɛwɛ yurugo. Davidi Yɛnŋɛlɛ gbɔgɔyurugo. Yurugo.
2 E, Yɛnŋɛlɛ, ma daga paa ma sɔnni wa Siyɔn ca,
leele pè yɔn fɔgɔlɔ ŋgele kɔn ma yeri, pe yaa ka ke yɔn fili.
3 Mboro ŋa ma maa yɛnrɛwɛ pi nuru,
leele pe ni fuun pe yaa la paan ma kɔrɔgɔ mbaa ma gbogo.
4 We kajɔgɔrɔ ti go kala lì wɛ we na,
ɛɛn fɔ mboro mbe ya mbe we kapere ti kala yaga we na.
5 Yɛnŋɛlɛ, lere ŋa ma ma wɔ, mboo fulo ma yɛɛ tanla,
mbe ti wi koro wi cɛn wa ma go ki ni, fɛrɛwɛ yɛn ki fɔ wi woo!
Yaritiyɔnrɔ nda ti yɛn wa ma go ki ni, ki yɛn ma we ndanla waa ti tanwa pi nii,
ma shɛrigo gbɔgɔkpoyi ki tanwa we.
6 We shɔfɔ Yɛnŋɛlɛ, ki yaga ma kafɔnŋgɔlɔ pye ma we yɔn sogo, wa ma kasinŋge ki ni,
leele pe ni fuun pe jigi wi yɛn ma na, mbe sa gbɔn fɔ wa tara ti kɔsaga ki na,
fɔ sa gbɔn wa kɔgɔje wi kɔsaga ki na!
7 Yɛnŋɛlɛ lo lì yanwira ti teŋge li fanŋga ki ni,
yawa yɛn li ni.
8 Li ma kɔgɔjeye pe tinmɛ pi yerege,
mbe kɔgɔje tɔnmɔ mba pi maa yinrigi na tuun pi tinmɛ pi yerege,
mbe cɛngɛlɛ ke tinmɛ gbɔɔ pi yerege.
9 Leele mbele pe yɛn ma cɛn fɔ wa dunruya wi kɔsaga ki na, ma kafɔnŋgɔlɔ ke yɛn na pe sunndo wi kɔɔn pe na,
ma ma ti yɔnlɔ yirisaga kɛɛ woolo naa yɔnlɔ tosaga kɛɛ woolo pe ma yin nayinmɛ ni.
10 Ma maa jatere piin tara ti wogo na, na tisaga kaan ti yeri;
ma ma tara ti pye ti ma tanla;
Yɛnŋɛlɛ ma mɔɔ lafogo ki yin tɔnmɔ pi ni;
ma maa yarilire ti yɔngɔ sɛnweele pe kan,
katugu mà tara ti gbɛgɛlɛ ko kala na.
11 Ma ma kɛɛrɛ ti sɔnyɔ yi suguru tɔnmɔ ni jɛŋgɛ,
mbe ti kanimboro ti ma pe ma yɔn yala;
ma ma ti tisara ti ma tara ti pe pugɔ,
ma ma fanŋga kan yariluguro ti yeri ti ma fi.
12 Ma yarijɛndɛ ti kala na, ma ma ti yɛlɛ li lombonɔ li ma kɔ tanga,
maga toro laga o laga, ko yaara to ma yɔn.
13 Naniwɛ mba wa gbinri wi ni, pi maa yɔngɔ na kee yɛgɛ,
yɔgɔrimɔ gbeere yɛn na yinrigi wa tinndiye pe na lagapyew.
14 Simbaala naa sikaala pè naniwɛ pi yin lagapyew,
kɛɛrɛ nda wa gbunlundɛrɛ ti ni tì yin yarilire ti ni,
ti ni fuun ti yɛn na yɔgɔri na yuuro koo paa sɛnwee yɛn.