79
Lere ŋa wi jigi wì kɔn wi na
wi Yɛnŋɛlɛ yɛnrɛwɛ
1 Asafu Yɛnŋɛlɛ gbɔgɔyurugo.
E, Yɛnŋɛlɛ, cɛngɛlɛ kèle yɛgɛ pan ma tara nda ti yɛn ma woro ti tɔn muŋga,
pɔ̀ɔn cɛnsaga kpoyi ki tɛgɛ fyɔngɔ ni,
pè Zheruzalɛmu ca ki ya maga pye kataga.
2 Pɔ̀ɔn tunmbyeele pe gbo ma pe gboolo pe kan naayeri sannjɛrɛ ti yeri yaakara.
Poro mbele pe maa ma gbogo, pè pe wire kara ti kan yan cɛnrɛ ti yeri.
3 Pè pe kasanwa pi wo paa tɔnmɔ yɛn ma Zheruzalɛmu ca ki maga;
lere kpɛ sila ta mbe pe gboolo pe le fanra ni.
4 We cɛnyɛɛnlɛ pe yɛn na we tifaga,
cɛngɛlɛ ŋgele ke yɛn ma we maga, ke yɛn na tɛgɛ we na, naga lakoo we na.
5 E, Yawe Yɛnŋɛlɛ, ma yaa koro mbe nawa ŋgban we ni suyi fɔ sa gbɔn wagati wiwiin?
Yenjaga ŋga ki yɛn ma ni we kala na paa kasɔn yɛn, ki yaa koro wa fɔ sa gbɔn wagati wiwiin?
6 Ma kɔnrɔ tandorogo ki naga cɛngɛlɛ sanŋgala koro na, koro ŋgele kee ma jɛn we;
maga naga wunluwɔ tara nda ti woolo pe woro nɔɔ gbogo poro na.
7 Katugu pè Zhakɔbu setirige piile pe tɔngɔ,
pè pe cɛnsaga ki jɔgɔ maga yaga waga.
8 Maga ka ma jatere wi tɛgɛ we kajɔgɔrɔ nda wè pye faa ti na,
ki yaga ma we yinriwɛ ta fyaw,
katugu we fanŋga kì kɔ fɔ ma toro!
9 We shɔfɔ Yɛnŋɛlɛ, pan ma we saga, ma mɛgbɔgɔ ko kala na;
we shɔfɔ, ma we kapere ti kala yaga we na ma mɛgɛ ko kala na!
10 Yiŋgi na ma yaa si ti cɛngɛlɛ sanŋgala kaa ki yuun we na fɔ:
«Pe Yɛnŋɛlɛ li yɛn se yeri?»
Ma tunmbyeele mbele ki cɛngɛlɛ kè gbo ma pe kasanwa pi wo, ki kayaŋga ki wɔ pe ni;
jaŋgo woro yɛrɛ wege yan yɛnlɛ ni konaa cɛngɛlɛ sanŋgala kege jɛn.
11 Nuŋgbolo jan ma kasopiile pe gbelege ki logo,
pège kɔn maga tɛgɛ mbe mbele gbo, ki yaga ma pe shɔ ma yawa gbɔɔ pi fanŋga na!
12 We Fɔ, we cɛnyɛɛnlɛ pɔ̀ɔn tifaga yɛgɛ ŋga na,
ma ki tifagawa pi yɔngɔ kɔlɔshyɛn sɔngɔrɔ pe na!
13 Ɛɛn fɔ, woro wo na, woro mbele ma woolo, konaa ma pye ma simbaŋgbelege,
we yaa lɔɔn gbogo suyi,
we yaa lɔɔn sɔnni wagati wi ni fuun fɔ tetete.