86
Yɛnŋɛlɛ yɛnrɛwɛ
mba pi ma pye jɔlɔgɔ sanga
1 Davidi wi Yɛnŋɛlɛ yɛnrɛwɛ.
Yawe Yɛnŋɛlɛ nuŋgbolo jan na yeri, mala yɔn sogo,
katugu mi yɛn fyɔnwɔ fɔ, ma pye yuŋgbɔgɔrɔ ni!
2 Tanla go singi, katugu mìlan yɛɛ kan ma yeri!
Mboro ma yɛn na Yɛnŋɛlɛ le,
mi ŋa ma tunmbyee, na shɔ, mìlan jigi wi taga ma na!
3 We Fɔ, na yinriwɛ ta,
katugu mboro mi yɛn na gbele na yinri pilige pyew!
4 Ki yaga ma nayinmɛ kan mi ŋa ma tunmbyee na yeri,
katugu na jatere wi yɛn ma tɛgɛ mboro na we Fɔ!
5 Ee, ma yɛn jɛnŋɛ we Fɔ, ma maa kapere ti kala yari.
Ma kagbaraga ki yɛn ma gbɔgɔ mbele fuun pe maa gbele nɔɔ yinri pe kan.
6 Yawe Yɛnŋɛlɛ, nuŋgbolo jan mala yɛnrɛwɛ pi logo,
mala yɛnrɛwɛ gbɔɔ pi logo!
7 Mi kaa jɔlɔ sanga ŋa ni, mi ma gbele mbɔɔn yeri mala saga,
katugu ma mala yɔn sogo.
8 We Fɔ, yarisunndo ti ni, ka woro wa paa mboro yɛn,
yaraga ka kpɛ se ya mbe ŋga mà pye ki pye.
9 Cɛngɛlɛ ŋgele fuun mà da,
ke yaa kaa paan mbaa kanŋguuro kanni ma yɛgɛ sɔgɔwɔ, we Fɔ,
mbaa ma mɛgɛ ki gbogo.
10 Katugu ma yɛn ma gbɔgɔ, ma maa kagbɔgɔlɔ piin,
mboro nuŋgba ma yɛn Yɛnŋɛlɛ le.
11 E, Yawe Yɛnŋɛlɛ, na naga ma konɔ li ni!
Pa mi yaa la tanri ma kaselege ki na;
na jatere wi pye nuŋgba, mbaa fyɛ ma yɛgɛ.
12 We Fɔ, na Yɛnŋɛlɛ, mi yaa lɔɔn sɔnni na kotogo ki ni fuun ni,
mi yaa lɔɔn mɛgɛ ki gbogo wagati wi ni fuun ni.
13 Katugu ma kagbaraga kì gbɔgɔ na kanŋgɔlɔ,
màla shɔ kunwɔ pi wetijugo ki kɛɛ.
14 E, Yɛnŋɛlɛ, mbele pe maa pe yɛɛ gbogo, pèle yiri na kɔrɔgɔ,
lewɛlimbɛlɛ pele yɛn naga jaa mbanla gbo,
pe woro na jatere piin ma wogo ki na.
15 Ɛɛn fɔ mboro wo na we Fɔ, ma yɛn Yɛnŋɛlɛ na li yɛn yinriwɛ tafɔ konaa yuŋgbɔgɔrɔ tafɔ,
maa la nawa ŋgbanni jaga jaga, ma kagbaraga kì gbɔgɔ, a ma yɛn sɛnrɛ nuŋgba yofɔ.
16 Ki yaga ma yɛgɛ wa na yeri mala yinriwɛ ta,
ma fanŋga ki le mi ŋa ma tunmbyee na ni,
mi ŋa ma tunmbyee jɛlɛ wi pinambyɔ, na shɔ!
17 Kacɛn wa pye maga naga na na fɔ ma yaa kajɛŋgɛ pye na kan,
jaŋgo na juguye pe ki kacɛn wi yan, ki fɛrɛ wa pe na;
katugu Yawe Yɛnŋɛlɛ, mboro màla saga, mala kotogo ki sogo na na!