88
Lere ŋa wi yɛn na kee kuwele
wi Yɛnŋɛlɛ yɛnrɛwɛ
1 Yurugo. Kore pinambiile pe Yɛnŋɛlɛ gbɔgɔyurugo. Yurukɔɔlɔ to wi sɛwɛ yurugo, pe maa ki koo na wegele wiin. Ezirahi setirige pyɔ Hema wo nagawa yurugo yi.
2 Yawe Yɛnŋɛlɛ, na shɔfɔ Yɛnŋɛlɛ,
mi yɛn na gbele ma yɛgɛ sɔgɔwɔ yɔnlɔ naa yembinɛ fɔ mala saga.
3 Ki yaga na yɛnrɛwɛ pi gbɔn wa ma na,
nuŋgbolo jan mala gbelege ki logo!
4 Katugu jɔlɔgɔ kìlan sɛn,
mì yɔngɔ kunwɔ pi ni tɔɔn.
5 Pe yɛn nala jate makɔ kufɛnnɛ pe ni,
mi yɛn paa lere ŋa fanŋga kɔ wi ni.
6 Mi yɛn sinlɛsaga wa gboolo pe sɔgɔwɔ,
paa leele mbele pè ku makɔ, a pè pe sinŋge wa fanra ti ni pe yɛn,
poro mbele ma jatere wi woro pe na naa,
ma woro na yaraga ka kpɛ piin pe kan naa.
7 Màla wa wetijugo ka ni,
màla wa wa diwi gbɔlɔ li ni, wa wege ki nɔgɔna.
8 Ma naŋgbanwa gbɔɔ pì gbɔn na na,
ma pye paa kɔgɔje tɔnmɔ mba pi maa yinrigi na tuun pi yɛn mala yɔn tɔn.
Wɔnmatigiwɛn laga.
9 Màla jɛnfɛnnɛ pe laga na na,
mala pye paa yaritijaanga yɛn pe yɛgɛ na.
Màla yɔn tɔn jɔlɔgɔ ki ni, yirisaga woro na na.
10 Jɔlɔgɔ kìlan yɛngɛlɛ ke wɔ na na binriw.
E, Yawe Yɛnŋɛlɛ, pilige nuŋgba nuŋgba pyew mi ma gbele mbɔɔn yeri mala saga,
mi mala kɛyɛn yi yirige ma wa wa ma yeri nɔɔ yɛnri.
11 Naga yɛn ma, ma yaa ma kafɔnŋgɔlɔ ke pye kuulo poro kan wi le?
Naga yɛn ma, kuulo pe mbe ya yiri naa mbɔɔn sɔn wi le?
Wɔnmatigiwɛn laga.
12 Naga yɛn ma, mbe pe ta wa fanra ti ni, pe yaa ma kagbaraga ki sɛnrɛ yo wa wi le?
Naga yɛn ma, ma yɛn sɛnrɛ nuŋgba yofɔ yɛgɛ ŋga na, pe yaa ki yɛgɛ yo wa kuulo tara wi le?
13 Ambɔ wi yaa ma kagbɔgɔlɔ koro jɛn wa kunwɔ pi diwi wi ni?
Ma yɛn sinŋɛ yɛgɛ ŋga na, ambɔ wi yaa ko jɛn wa fɛgɛrɛ tara ti ni?
14 Ɛɛn fɔ, mi wo na, Yawe Yɛnŋɛlɛ, mboro mi yɛn na gbele nɔɔ yinri mala saga,
pinliwɛ ni mi mɔɔ yɛnri.
15 E, Yawe Yɛnŋɛlɛ, yiŋgi na, a ma silan je?
Yiŋgi na, a ma sɔɔn yɛɛ lara na na?
16 Maga lɛ na puwɛn pi ni, mi yɛn na jɔlɔ, ma yɔngɔ kunwɔ pi ni tɔɔn,
mà fyɛrɛ gbɔrɔ wa na na fɔ mala jigi wi kɔn na na.
17 Ma naŋgbanwa kayaŋga kì to na na,
fyɛrɛ kagbɔgɔlɔ ŋgele mà wa na na, kànla yinwege ki jɔgɔ pew.
18 Ke yɛn mala maga pilige pyew paa tɔnŋgbɔɔ yɛn,
mala tɔn kɛɛ ki ni fuun na.
19 Màla wɛnnɛ naa na cɛnyɛɛnlɛ pe laga na na,
diwi wo cɛ wì koro na cɛnyɛnlɛ we.