YUURO TI YURUTANGA
sɛwɛ
Sɛwɛ wi nawa sɛnrɛ
Eburuye sɛnrɛ ti ni, ki sɛwɛ ŋa pe maa wi yinri «Salomɔ yuuro ti yurugo,» ko kɔrɔ wo yɛn fɔ «yurugo ŋga kì tanla ma wɛ yuuro ti ni fuun na» nakoma «yuuro ti ni fuun tiyɔngɔ.» Yɛnŋɛlɛ sɛnrɛ sɛwɛɛlɛ pele ni, pe maa wi yinri «Salomɔ yurugo,» katugu Eburuye sɛnrɛ ti ni, sɛwɛ wi yɛn na para na kee Salomɔ wo kanŋgɔlɔ (1.1).
Ki sɛwɛ ŋa, yuuro nakoma lelɛwɛ sɛnyogo yuuro ti yɛn wa wi ni; ti yɛn na para ndanlawa mba pi yɛn lefɔnŋɔ wa naa sumboro wa sɔgɔwɔ po sɛnrɛ na. Wagati wa ni, ki leele shyɛn mbele pe yɛn ma pe yɛɛ ndanla, pe maa para pe yɛɛ ni. Wagati wa ni, ki ma cɛn ndɛɛ pe ni fuun nuŋgba nuŋgba pe yɛn na para pe yɛ pe yɛ, nakoma pe yɛn na para gbogolomɔ woolo pele ni, pe ma yo fɔ: «Zheruzalɛmu ca sumbonɔ.»
Zhufuye poro na, pe yɛn naga jate ma yo nuŋgbanma mba pi yɛn Yɛnŋɛlɛ lo naa li woolo pe sɔgɔwɔ, yuuro ti yɛn na ko wogo ko nari. Ma si yala, tagafɛnnɛ poro yɛn naga jate ma yo ndanlawa mba pi yɛn Kirisi wo naa wi legilizi woolo pe sɔgɔwɔ, ti yɛn na ko wogo ko nari. Pele yɛgɛ yɛn naga jate ma yo ndanlawa gbɔɔ mba pi ma pye naŋa naa jɛlɛ sɔgɔwɔ, ti yɛn na ko wogo ko nari. Wa ki yuuro ti ni, wège yan fɔ ndanlawa sɛnyogo yɛn ma lara wa kacɛn yaara ta ni, to ti yɛn tige pire, naa yarifyɛɛnrɛ konaa naniwɛ. Wagati wa ni, ki ma pye ma ŋgban mbe ya mbe sɛwɛ wi kɔɔnlɔ kɔnsara kɔnsara, nakoma mbe lere ŋa wi yɛn na para sɛwɛ wi laga ka ni wi jɛn. Ko kì ti Yɛnŋɛlɛ sɛnrɛ sɛwɛɛlɛ pe lɛgɛrɛ ni, lere ŋa wi yɛn na para pe maa naga sɛnrɛ ti karafɔ wi na.
Sɛwɛ wi yɛn ma kɔɔnlɔ yɛgɛ ŋga na
Yurugo koŋgbanŋga 1.1–2.7
Yurugo shyɛn wogo 2.8–3.5
Yurugo taanri wogo 3.6–5.1
Yurugo tijɛrɛ wogo 5.2–6.3
Yurugo kaŋgurugo wogo 6.4–8.4
Yurugo kɔgɔlɔni wogo 8.5-14
1
1 Yurugo ŋga kì tanla ma wɛ yuuro ti ni fuun na; Salomɔ wìla ki yɔnlɔgɔ.
Mbele pè pe yɛɛ ndanla
pe baro pyege
(Sumboro wi sɛnyoro)
2 Tanla talitali, tanla talitali na witige ki lagapyew!
Katugu ma ndanlawa pì tanla ma wɛ duvɛn na.
3 Ma sinvawa pi nuwɔ pì tanla fɔ jɛŋgɛ!
Ma mɛgɛ ki yɛn paa sinmɛ nuwɔ taan yɛn, mba pi nuwɔ taan pì jaraga lagapyew.
Ko kala na ma yɛn ma sumbonɔ pe ndanla.
4 Na yigi mala taga ma yɛɛ puŋgo na, we pinlɛ waa fee!
Wunlunaŋa, ye na ni wa ma go ki ni!
Ti waa nayinmɛ nii waa yɔgɔri ma kala na!
Wɔɔn ndanlawa pi tanwa pi li fɔ mbe sa wɛ duvɛn wi na!
Sumbonɔ pe tanga yi ma yɛn ma pe ndanla.
5 Zheruzalɛmu ca sumbonɔ, na witige ki yɛn ma wɔ, ɛɛn fɔ mi yɛn ma yɔn,
paa Kedari cɛnlɛ woolo pe paara yinrɛ ti yɛn,
paa Salomɔ wunluwɔ go ki yeyɔngɔ tɔnpaara tiyɔnrɔ ti yɛn.
6 Yaga kaa na witige wɔmɔ po wele,
yɔnlɔ ko kìlan witige ki wɔ,
na nɔsepiile nambala pè nawa ŋgban na ni,
mala tɛgɛ ma yo mbaa ɛrɛzɛn tiire kɛɛrɛ singi.
Ɛɛn fɔ na yɛɛra ɛrɛzɛn tiire kɛrɛ mi woro na to singi.
7 Ɛnhɛn, mboro ŋa ma yɛn mala ndanla, ki yo na kan san!
Ma ma saa nɔɔ yaayoro ti kɔnri, nari kaan ti maa kaa se yeri?
Ma ma saa ti yerege se yeri, mari yaga ti ma wogo yɔnlɔfugo na?
Na mi kaga jɛn, mi se sa koro mbaa yanri la toro ma pinlɛyɛɛnlɛ yaayoro kɔnrifɛnnɛ pe yaayoro ti puŋgo na.
(Simbaala kɔnrifɛnnɛ pe sɛnyoro)
8 Mboro ŋa ma yɛn ma yɔn ma wɛ jɛɛlɛ pe ni fuun pe na, na ma sigi saga jɛn,
ma yiri ma yaayoro ti tuuro tɔnri,
mɔɔ sikapigile ke kɔnri ma kari ke ni ke saa nii wa yaayoro kɔnrifɛnnɛ pe segbara ti tanla.
(Lefɔnŋɔ wi sɛnyoro)
9 E, na wɔnlɔnjɔ jɛnŋɛ, mi yɛn nɔɔ tiyɔnwɔ pi taanla
shɔnye mbele pe maa Farawɔn wi wunluwɔ wotoro wi tilele pe ni.
10 Ma yɛgɛ ki yɛn ma yɔn wa nuŋgbogolo ŋgele mà le ke sɔgɔwɔ,
ma yɔlɔgɔ ki yɛn ma yɔn wa ma yɔlɔgɔ somu wi ni.
(Simbaala kɔnrifɛnnɛ pe sɛnyoro)
11 We yaa tɛ nuŋgbogolo gbɔn ma kan,
mbe ke kɛnlɛgi kɛnlɛgi warifuwe ni.
(Sumboro wi sɛnyoro)
12 Mbanla wunlunaŋa wo naa wi cɛnyɛɛnlɛ pe ta wa cɛnsaga,
a na sinmɛ nuwɔ taan pi nuwɔ pi nɛɛ jaragi lagapyew.
13 Na ndanlafɔ wi yɛn na yeri paa nuwɔ taanyaara nda pe yinri miiri ti wofolo yɛn,
wi yɛn ma sinlɛ wa na yinŋgele shyɛn ke sɔgɔwɔ pi ni.
14 Na ndanlafɔ wi yɛn na yeri paa jabi tire nuwɔ taan yarifyɛɛnrɛ shashaga yɛn,
wa Eni Gedi tɔnmɔ lara ti ɛrɛzɛn kɛɛrɛ ti sɔgɔwɔ.
(Lefɔnŋɔ wi sɛnyoro)
15 E, ma yɛn ma yɔn, na wɔnlɔnjɔ jɛnŋɛ, ma yɛn ma yɔn!
Ma yɛnmbigile ke yɛn ma yɔn paa jɛndɛtuwa yɛn.
(Sumboro wi sɛnyoro)
16 Mboro fun na ndanlafɔ, ma yɛn ma yɔn, ma kala li yɛn mala ndanla fɔ jɛŋgɛ.
We sinlɛyaraga kì gbegele ma yɔn, ki yɛgɛ cɛnwɛ pi ni paa yantipirige yɛn.
17 We go ki tiyapaara ti yɛn Sɛdiri tire tiyɔnrɔ ni,
ki mbogo ki yɛn sipirɛsi tire tiyɔnrɔ ni.