5
(Lefɔnŋɔ wi sɛnyoro)
1 Mi yɛn na paan wa na naŋgɔ kɔlɔgɔ ki ni, na jɔnlɔ sumboro, na katogo jɔ.
Mi yaa na miiri tipire ta cɔ konaa na nuwɔ taanyaara sannda ta ni.
Mi yaa na sɛnrɛgɛ shashaga ki ka naa ki tunwɔ pi ni;
mi yaa na duvɛn wo naa na nɔnɔ wi wɔ.
(Wɛnnɛ pe sɛnyoro)
Na wɛnnɛ, yaa nii yaa woo, yaa ndanlawa kala li piin fɔ li saa ye yɛgɛ kanŋgi!
Sumboro wi sila yeyɔngɔ
ki yɛngɛ fyaw
(Sumboro wi sɛnyoro)
2 Mìla pye na wɔnlɔ, ɛɛn fɔ mi sila wɔnlɔ mbe fɛgɛ.
Mìlan ndanlafɔ wi magala li logo, wi yɛn na kɔrɔ ki gbɔɔn, ma yo fɔ:
(Lefɔnŋɔ wi sɛnyoro)
«Kɔrɔ ki yɛngɛ na kan, na jɔnlɔ sumboro, na wɔnlɔnjɔ,
na jɛndɛtuwa tiyɔɔn, na jɔ ŋa wi yɛn maa yɛɛ yɔn fili.
Fɔɔngɔ kì wo mala go ki yinŋgi,
yembinɛ fɔɔngɔ kì wo mala yinzire ti yinŋgi.»
(Sumboro wi sɛnyoro)
3 Mìlan yaripɔrɔ ti wɔ na yɛɛ na makɔ,
naga yɛn ma, mi yaa ti le naa wi le?
Mìlan tɔɔrɔ ti jogo makɔ,
naga yɛn ma, mi yaa ti tɛgɛ fyɔngɔ ni naa wi le?
4 Na ndanlafɔ wùu kɛɛ ki le wa kɔrɔ wele li ni,
a na jatere wì si piri na na wi kala na.
5 A mì si yiri mbe sa kɔrɔ ki yɛngɛ na ndanlafɔ wi kan;
ma si yala miiri sinmɛ nuwɔ taan pìla pye na fuun na kɛyɛn yi na,
miiri sinmɛ nuwɔ taan pìla pye na yinrigi wa na yombɛgɛlɛ ke na
na sɔɔlɔ kɔrɔ ki sɔgɔyaraga ki yigisaga ki na.
6 A mì si kɔrɔ ki yɛngɛ na ndanlafɔ wi kan,
ɛɛn fɔ, a kì si yala wì puŋgo le ma kari makɔ.
Mi sila na yɛɛ yɛgɛ jɛn naa, wi karaga ki kala na.
A mùu lagaja ma saa te, mi suu yan;
a mùu yeri ma saa te, wii na yɔn sogo.
7 Ca ki go sigefɛnnɛ mbele pe yɛn na ca ki mari, pè si saa fili na ni;
a pè silan gbɔn fɔ mala wɛlɛgɛ.
Poro mbele pe yɛn ca ki mbogo ki go sigefɛnnɛ, a pè silan laŋgana li shɔ na yeri.
8 Zheruzalɛmu ca sumbonɔ, mi yɛn na ye yɛnri ŋgbanga,
na ye kanla ndanlafɔ wi yan,
ye yaa yo mɛlɛ wi kan san?
Yege yo wi kan fɔ wi ndanlawa pìlan tɛgɛ yaŋa.
(Sumbonɔ pe sɛnyoro)
9 E, mboro ŋa ma yɛn jɛɛlɛ pe ni fuun tiyɔɔn,
yiŋgi ki yɛn ma ndanlafɔ wi na ma saa wɛ nambala sanmbala pe na ma?
Yiŋgi ki yɛn ma ndanlafɔ wi na ma saa wɛ nambala sanmbala pe na ma,
fɔ a maa we yɛnri ŋgbanga ma?
(Sumboro wi sɛnyoro)
10 Na ndanlafɔ wì yanlaga ma yɔn, wi wire ti yɛn na yɛngɛlɛ.
Wi yɔngɔ woro ali nambala waga kɛ (10 000) sɔgɔwɔ.
11 Wi go ki yɛn paa tɛ piiri yɛn,
wi yinzire ti yɛn milɔnli milɔnli ma tɔnlɔndɔnlɔ na yɔlɔ,
ti yɛn ma wɔ binriw paa kaankaan sire yɛn.
12 Wi yɛnmbigile ke yɛn ma yɔn paa lɔgɔ yɔn keteŋgele yɛn,
ŋgele kè woli nɔnɔ ni ma filige, ke cɛnlɔmɔ pi yɛn ma yɔn.
13 Wi kanŋguŋgolo ke yɛn paa naŋgɔ kɔlɔgɔ laga ŋga ki yɛn yan wɛrɛ nuwɔ taan woro ni ki yɛn,
ŋga wusuna nuwɔ taan tipire yɛn wa ki ni.
Wi yɔngbasɛŋgɛlɛ ke yɛn ma yɔn paa masho pɔlɔ yarifyɛɛnrɛ yɛn,
ŋgele miiri sinmɛ nuwɔ taan yɛn na yinrigi wa ke ni.
14 Wi kɛyɛn yi yɛn paa tɛ kannjiŋgele kɛɛ wogolo yɛn,
ŋgele pè kɛnlɛgi kɛnlɛgi kirizoliti sinndɛlɛgɛ sɔnŋgbanga wogo ka ni.
Wi witige ki yɛn ma yɔn paa solo ŋganla yɛn, na li yɛn ma wɔlɔgɔ,
na pè safiri sinndɛlɛgɛ sɔnŋgbanga wogo ka wo li na mali fo.
15 Wi jegele ke yɛn ma yɔn paa maribiri sinndɛɛrɛ sɔnŋgbanga woro fire fire ti yɛn,
nda pè yerege yerege tɛ piiri na.
Wi yɛgɛ yanwa pi yɛn ma yɔn paa Liban tara yanwira ti yɛn,
wi tiyɔnwɔ pi yɛn paa sɛdiri tige yɛn, ŋga ki yɔngɔ woro tire sannda ti sɔgɔwɔ.
16 Wi yɔn sɛnrɛ tì tanla,
wi lagapyew ki yɛn mala ndanla.
Pa na ndanlafɔ wi yɛn ma, pa na wɔnlɔ wi yɛn ma,
yoro Zheruzalɛmu ca sumbonɔ wele.