10
Yawe Yɛnŋɛlɛ lìgi yɔn fɔlɔ lɛ
mbe Zhuda tara woolo pe shɔ
1 Ye Yawe Yɛnŋɛlɛ li yɛnri tisaga ki ni, li tisara puŋgo woro ti kan ye yeri.
Yawe Yɛnŋɛlɛ lo li ma tifɛliŋgbɔrɔ tisara ti yirige,
li yaa tisara lɛgɛrɛ kan ye yeri.
Li yaa ti yariluguro ti fi wa ye ni fuun nuŋgba nuŋgba ye kɛɛrɛ ti ni.
2 Katugu ye go yarisunndo ti maa go fu sɛnrɛ yuun ye kan.
Ye jɛlɛfɛnnɛ pe maa yagbogowo kagala yaan na yuun ye kan.
Wɔɔnrɔ wɔnlɔfɛnnɛ pe wɔɔnrɔ ti yɛn wagafe,
pe kotogo sogowo sɛnrɛ ti yɛn go fu sɛnrɛ.
Ki kala na, leele pe yɛn na yanri na toro faa paa yaayoro ŋgbelege yɛn,
pe yɛn na jɔlɔ paa simbaala yɛn mbele kɔnrifɔ woro pe na.
3 Mì nawa ŋgban jɛŋgɛ yaayoro kɔnrifɛnnɛ pe ni.
Mi yaa jɔlɔgɔ wa yɛkeele pe na,
katugu mi ŋa Yawe Yɛnŋɛlɛ na yawa pi ni fuun fɔ mì pan mbanla woolo pe gbogolomɔ pi kɔn mbe wele,
po mba pi yɛn Zhuda cɛnlɛ woolo wele.
Mi yaa ka pe pye paa na malaga gbɔnshɔn jɛnŋɛ yɛn.
4 Teele pe cɛnlɛ pyew pele yaa ka yiri wa Zhuda cɛnlɛ li ni,
mbe sheli paa go yɛnlɛ sinndɛlɛgɛ yɛn,
mbe liri paa paraga go ki kankanŋgala yɛn,
mbe pye fanŋga ni paa malaga gbɔnsandiga yɛn.
5 Pe yaa ka pye paa maliŋgbɔɔnlɔ wɛlimbɛlɛ yɛn,
mbe pe ta malaga ki na, pe yɛn na pe juguye pe tangala na kee paa konɔ fɛnrɛgɛ yɛn.
Pe yaa ka malaga ki gbɔn, katugu mi ŋa Yawe Yɛnŋɛlɛ, mi yaa ka pye pe ni.
Kona, pe yaa ka fɛrɛ wa pe juguye mbele pe yaa ka pye shɔnye na pe na.
6 Mi yaa ka fanŋga gbɔgɔ le Zhuda cɛnlɛ woolo pe ni.
Mi yaa ka Zhozɛfu setirige piile pe shɔ.
Mi yaa ka sɔngɔrɔ mbe pan pe ni wa pe tara naa,
katugu pe yinriwɛ yɛn na na.
Ki yaa ka pye ndɛɛ mi sila je pe na.
Muwi mi yɛn Yawe Yɛnŋɛlɛ, pe Yɛnŋɛlɛ le.
Mi yaa ka pe yɛnrɛwɛ pi logo.
7 Efirayimu cɛnlɛ woolo pe yaa ka pye paa nambala kotogofɛnnɛ yɛn.
Pe nawa pi yaa ka yinŋgi pe na ndɛɛ leele mbele duvɛn wɔ.
Pe piile pe yaa kaga wogo ki yan mbaa yɔgɔri.
Yɔgɔrimɔ gbɔɔ yaa ka pye wa pe kotogo na Yawe Yɛnŋɛlɛ li kala na.
8 Mi yaa ka wofele win mbe pe gbogolo,
katugu mi yaa ka pe shɔ.
Pe yaa sɔngɔrɔ mbe lɛgɛ naa paa yɛgɛ ŋga na pàa pye faa we.
9 Mì pe jaraga wa dunruya cɛngɛlɛ ke sɔgɔwɔ.
Ɛɛn fɔ mbe pe ta wa ki taleere ti ni, pe yaa nawa to na na.
Poro naa pe piile pe ni pe yaa kaa pe yinwege ki piin.
Ko puŋgo na, pe yaa ka yiri wa, mbe sɔngɔrɔ mbe pan.
10 Mi yaa ka pe yirige mbe pe wɔ wa Ezhipiti tara.
Mi yaa ka pe wɔ wa Asiri tara, mbe pe gbogolo.
Mi yaa ka pan pe ni wa Galaadi tara konaa wa Liban tara.
Pe cɛnsaga ki yaa ka kologo pe na yɛrɛ.
11 Pe yaa ka kɔgɔje wi kɔn mbe wɔ wa jɔlɔgɔ ki ni.
Yɛnŋɛlɛ li yaa ka kɔgɔje tɔnmɔ mba pi maa yinrigi na tuun pi gbɔn mboo sinŋge.
Nili gbaan wi latijuro ti ni fuun ti yaa ka waga.
Asiri tara fɛnnɛ pe yɛɛ gbɔgɔwɔ pi yaa ka kɔ.
Ezhipiti tara fɛnnɛ pe wunluwɔ kanŋgala li yaa ka shɔ pe yeri.
12 Mi ŋa Yawe Yɛnŋɛlɛ, mi yaa kanla fanŋga ki le na woolo pe ni.
Pe yaa kaa tanri na nandanwa kala lo na.
Yawe Yɛnŋɛlɛ lo lì yo ma.