AMƆSI
TA KITABU
Kitabu faamucogo
Amɔsi tun ye bɛgan marabaga le ye. A tun bɛ bɔ Tekoha dugu kɔnɔ; o yɔrɔ tun bɛ Bɛtilɛhɛmu dugu kɛrɛ fɛ, Zuda mara ra. Amɔsi k’a ta ciraya kɛ ka kɔn cira Oze ni cira Ezayi ni cira Mise ɲa. Amɔsi k’a ta cirayakuma fɔ k’a ɲasin jamana sahiliyanfan mɔgɔw le ma. O mɔgɔw tun bɛ sɔnni kɛ Betɛli.
O wagati ra Izirayɛlimɔgɔw tun ka se sɔrɔ o juguw kan, ka fanga ni naforo caman sɔrɔ. O kɛra sababu ye ka wasoya ni fɛrɛ don o mɔgɔw ra, ka o bla terenbariyakow ra, ani ɲɔgɔntɔɲɔri; hali sarakalasebagaw tun tɛ terenna Ala ye tuun. O tun b’a fɔra ko olugu bɛ Matigi Ala ta lon le makɔnɔna, ko Ala bɛna koɲuman kɛ olugu ye o lon na. Nka cira Amɔsi k’a fɔ o ye ko Matigi Ala ta lon tɛna kɛ hɛralon ye o fɛ, o ta jurumunw kosɔn (5.18,20). O kosɔn a k’a fɔ o ye ko o ka kan ka o ta kɛwalew yɛlɛma, ka Ala sago kɛ; ni o tɛ, o ta sarakaw, ani o ta Alabato tɛna foyi ɲa (5.24); Ala fana bɛna o labla o juguw ye.
Amɔsi ko naforotigi minw bɛ fagantanw, ani dɛsɛbagatɔw tɔɲɔ, ko Ala ta kiti bɛna ben olugu kan. Nka a k’a fɔ fana ko minw bɛ kojuguw dabla, Ala bɛna makari olugu ra, ka o dɛmɛ.
Kitabu kɔnɔkow
Ala bɛna kiti ben Izirayɛli kɛrɛfɛjamanaw kan (1.1–2.5)
Ala bɛna kiti ben Izirayɛli jamana kan (2.6–6.14)
Ala bɛ tagamasiyɛn looru yira Amɔsi ra Izirayɛli ta ko ra (7.1–9.15)
1
Matigi Ala kumakan
1 Nin ye Amɔsi ta kumaw le ye. Ale tun ye Tekoha dugu bɛgantigi dɔ le ye. Ala ka nin kow yira a ra Izirayɛli jamana ko ra, Zuda masacɛ Oziyasi ta wagati ra, ani Izirayɛli masacɛ Yerobohamu min tun ye Yohasi dencɛ ye, o ta wagati ra. San fla le tɛmɛna o kɔ fɛ, dugukoloyɛrɛyɛrɛ sɔrɔra ka kɛ.
2 Amɔsi ko:
«Matigi Ala pɛrɛnkan bɔra Siyɔn, i ko waraba mankan.
A kan bɔra Zeruzalɛmu minkɛ,
bɛgantigiw ta bɛganw ta domuniyɔrɔw binw fagara,
Karimɛli kuru sanfɛyɔrɔw jara.»
Damasikaw
3 Matigi Ala ko:
«Damasikaw ta kojugu saba kosɔn, a fɔ kojugu naani yɛrɛ,
ne ka min latigɛ o kama, ne tɛna o to kɛbari ye;
sabu o ka Galadikaw sɛnɛ ni misidaba nɛgɛraman ta ɲinw le ye.
4 O ra, ne bɛna tasuma lajigi Hazahɛli ta masabonw kan,
ka Bɛni Hadadi ta masabonbaw jɛni pewu.
5 Ne bɛna Damasi dugu donda ta sɔgɔnanw kari,
ka Bikati Avɛni mɔgɔw halaki;
masacɛbere bɛ min boro, ne bɛna o halaki ka bɔ Bɛti Edɛni.
O bɛna Sirikaw mina ka taga ni o ye Kiri jamana ra.
Matigi Ala ko ten.»
Gazakaw
6 Matigi Ala ko:
«Gazakaw ta kojugu saba kosɔn, a fɔ kojugu naani yɛrɛ,
ne ka min latigɛ o kama, ne tɛna o to kɛbari ye;
sabu o ka jamana mɔgɔw bɛɛ cɛ,
ka taga o don Edɔmukaw boro.
7 O ra ne bɛna tasuma lajigi Gaza dugu kogo kan,
ka o ta masabonbaw jɛni pewu.
8 Ne bɛna Azidɔdi dugutigi halaki.
Masacɛbere bɛ min boro, ne bɛna o halaki ka bɔ Asikalɔn.
Ne bɛna wuri Ekurɔnkaw kama;
ni o kɛra, Filisika tɔw bɛɛ bɛna halaki.»
Dunuɲatigi Ala ko ten.
Tirikaw
9 Matigi Ala ko:
«Tirikaw ta kojugu saba kosɔn, a fɔ kojugu naani yɛrɛ,
ne ka min latigɛ o kama, ne tɛna o to kɛbari ye;
sabu o ka mɔgɔ caman mina ka o don Edɔmukaw boro;
balemaya min tun bɛ o cɛ, o ma o hakiri to o ra.
10 O ra ne bɛna tasuma lajigi Tiri dugu kogo kan
ka o ta masabonbaw jɛni pewu.»
Edɔmukaw
11 Matigi Ala ko:
«Edɔmukaw ta kojugu saba kosɔn, a fɔ kojugu naani yɛrɛ,
ne ka min latigɛ o kama, ne tɛna o to kɛbari ye;
sabu o ka kɛrɛkɛmuru ta ka o balemaw nɔgbɛn;
o ma sɔn ka hina o ra fiyewu.
O dimina, ka to ka cɛnri kɛ wagati bɛɛ;
o ta dimiba ma mala ka ye.
12 O ra, ne bɛna tasuma lajigi Teman dugu kan,
ka Bɔsira ta masabonbaw jɛni pewu.»
Amɔnkaw
13 Matigi Ala ko:
«Amɔnkaw ta kojugu saba kosɔn, a fɔ kojugu naani yɛrɛ,
ne ka min latigɛ o kama, ne tɛna o to kɛbari ye;
sabu ka o to kɛrɛ ra ko o bɛ dɔ fara o ta jamana kan,
o ka Galadi dugu musokɔnɔmanw kɔnɔw faran.
14 O ra, ne bɛna tasuma mana Raba dugu kogo kan
ka o ta masabonbaw jɛni pewu.
O mankan bɛna kɛ i ko kɛrɛkɛlon ta kulekanbaw,
ka kɛ i ko sanfɔɲɔba, sanjiba nalon na.
15 O bɛna o ta masacɛ mina ka taga ni a ye;
ale ni a ta jamana kuntigiw bɛɛ.
Matigi Ala ko ten.»