5
Kojugu minw bɛna se Izirayɛli ma
1 E, Izirayɛlimɔgɔw, aw ye nin kuma lamɛn!
Ne bɛ nin sangadɔnkiri min lara aw kunna, aw ye o dɔnkiri lamɛn!
2 E, Izirayɛli, sunguru cɛɲuman benna, a tɛ wuri tuun!
A lanin bɛ a yɛrɛ ta dugukolo le kan;
mɔgɔ si ma sɔrɔ k’a lawuri;
3 sabu Dunuɲatigi Ala ko:
«Cɛ waga kelen bɛ bɔ dugu min kɔnɔ ka taga kɛrɛ ra,
cɛ kɛmɛ dɔrɔn le bɛna sekɔ o dugu kɔnɔ.
Cɛ kɛmɛ bɛ bɔ dugu min kɔnɔ ka taga kɛrɛ ra,
cɛ tan dɔrɔn le bɛna sekɔ o dugu kɔnɔ.
A bɛna kɛ ten le Izirayɛli jamana ra.»
4 O kosɔn Matigi Ala ko Izirayɛli ta somɔgɔw ma ko:
«Aw ye ne Ala ta jɛnɲɔgɔnya ɲini,
janko aw ye si sɔrɔ.
5 Aw kana taga foyi ɲini Betɛli,
aw kana taga Giligali,
aw kana se Bɛri Seba;
sabu o bɛna Giligalikaw bɛɛ cɛ ka taga,
Betɛli bɛna kɛ tomo le ye.
6 Aw ye Matigi Ala ta jɛnɲɔgɔnya ɲini,
janko aw ye si sɔrɔ.
Ni o tɛ, Ala bɛna jigi Yusufu ta somɔgɔw kan, ka o halaki i ko tasuma;
mɔgɔ tɛna sɔrɔ ka tasuma faga Betɛli dugumɔgɔw ye.
7 «Aw bɛ can yɛlɛma k’a kɛ jalaji ye;
aw bɛ terenninya firi dugu ma.
8 Ala min ka teremana wagati ta lolow, ani samiya wagati ta lolow dan,
min bɛ dibikuruba yɛlɛma ka o kɛ kɛnɛbɔda ye,
ka tere yɛlɛma k’a kɛ su ye,
min bɛ kɔgɔji ta jiw wele
ka o bɔn dugukolo kɔ kan,
ale tɔgɔ le ye ko Matigi Ala!
9 Ale le bɛ halakiri lase fangatigiw ma,
ka o ta so barakamanw bɛɛ halaki.
10 «Mɔgɔ min bɛ kiti tigɛ ka aw jaraki aw ta terenbariya kosɔn, aw bɛ o tigi kɔninya.
Mɔgɔ min bɛ can fɔ aw ye, aw bɛ o tigi haramuya.
11 Ayiwa, i n’a fɔ aw bɛ fagantanw dɔndɔn ni aw senw ye,
ka o jagboya ka siman di aw ma,
o ra, aw ka kabakurubonba minw lɔlɔ,
aw tɛna don o bonw kɔnɔ.
Aw ka rɛzɛnforoɲuman minw sɛnɛ,
aw tɛna o rɛzɛnw ji min.
12 Sabu ne k’a lɔn ko aw ta kojuguw ka ca,
ko aw ta jurumunw ka bon.
Aw bɛ mɔgɔ terennin minako juguya.
Aw bɛ bonyafɛnw mina dogo ra, ka jo bɔsi fagantanw na kititigɛyɔrɔ ra.
13 O le kosɔn nin wagatiw ra, mɔgɔ hakirimanw bɛ je,
sabu nin wagatiw man ɲi.
14 Aw ye tugu koɲuman le kɔ, janko aw ye si sɔrɔ;
aw kana tugu kojugu kɔ;
ni o kɛra, Matigi Ala, Fangatigi Ala bɛna kɛ ni aw ye,
i ko aw yɛrɛ k’a fɔ cogo min na.
15 Aw ye kojugu kɔninya, aw ye koɲuman le kanu,
aw ye kiti tigɛ ka kaɲa ni terenninya le ye;
ni o kɛra, a bɛ se ka kɛ ko Matigi Ala, Fangatigi Ala bɛna hina aw ra, aw minw ye Yusufu ta mɔgɔ tɔw ye.
16 «O kosɔn Matigi Ala, Fangatigi min ye Matigi ye, ale ko:
Sangakasikan le bɛna bɔ kɛnɛgbɛyɔrɔw bɛɛ ra;
siradaw bɛɛ ra mɔgɔw bɛna a fɔ ko: ‹E, Ala! Bɔnɔ ka an sɔrɔ!›
O bɛna sɛnɛkɛbagaw wele sukasi ra,
ka sukasibagaw wele ka na sangadɔnkiriw la;
17 sabu ni ne nana tɛmɛ aw cɛ ra tuma min na,
mɔgɔw bɛna kasi rɛzɛnforow bɛɛ ra.
Matigi Ala ko ten.»
Matigi Ala ta lon
18 Aw minw kɔrɔtɔnin lo ko Matigi Ala ta lon ye se, bɔnɔ bɛna aw sɔrɔ dɛ!
Aw b’a miiri ko Matigi Ala ta lon bɛna kɛ mun le ye?
Matigi Ala ta lon bɛna kɛ dibiba le ye, a tɛna kɛ yeelen ye dɛ!
19 Aw ta bɛna kɛ i n’a fɔ mɔgɔ min bɛ borira jara ɲa,
ka taga bɛn ni waraba dɔ ye;
a sera so kɔnɔ, a k’a boro la kogo kan minkɛ,
sa dɔ k’a kin.
20 Ayiwa, sigiya t’a ra, Matigi Ala ta lon bɛna kɛ dibiba le ye;
a tɛna kɛ yeelen ye fiyewu.
A bɛna kɛ dibikuruba le ye,
hali yeelen dɔɔnin tɛna kɛ a ra.
Izirayɛlimɔgɔw ta batori ma bɛn Ala ma
21 «Ne tɛ aw ta Alabato ɲanagbɛw fɛ, o man di ne ye;
aw ta jamalajɛnlonw lɔgɔ bɛɛ bɔra ne ra pewu.
22 Ni aw bɛ aw ta saraka jɛnitaw* ni aw ta siman sarakaw* bɔ ne ye,
ne tɛ o sarakaw si mina.
Aw bɛ misi tɔrɔnin minw faga ka o kɛ aw ta ninsɔndiya sarakaw* ye,
ne tɛ o si flɛ.
23 Aw ye aw ta dɔnkirilakanw mabɔ ne ra.
Ne t’a fɛ ka aw ta gɔnifɔkan mɛn.
24 Ne b’a fɛ ko aw ta kititigɛyɔrɔw ra, can le ye woyo i ko ji;
terenninya ye caya i ko baji min tɛ ja.
25 Aw ka san binaani min kɛ kongokolon kɔnɔ,
yala aw tun bɛ aw ta bɛgan sarakaw* ni aw ta siman sarakaw bɔra ne le ye wa, aw Izirayɛlimɔgɔw?
26 Aw yɛrɛ boro ka o ala minw lalaga,
aw ta alaw ta masacɛ Sakuti,
ani aw ta ala lolotigi Kewan,
aw ka olugu le ta.
27 O kosɔn ne bɛna a to o ye aw mina ka taga ni aw ye fɔ Damasi kɔ fɛ.
Matigi Ala, Fangatigi le ko ten.
O le bɛ ne tɔgɔ ye.»