17
Zuda mara ta mɔgɔw ta jurumun
1 «Zuda mara ta mɔgɔw ta jurumun sɛbɛra ni nɛgɛ le ye,
a sɛbɛra ni lulu dabɔnin le ye;
a sɛbɛra o jusukun ta walaka kan,
a sɛbɛra o ta sarakabɔnanw gbanw kan.
2 O ra, o dencɛw hakiri bɛna to o sarakabɔnanw na,
o hakiri bɛna to o ta jo musoman Asera ta berew ra,
o ka minw turu yiriba flaburumanw kɛrɛ fɛ, ani kongorijanw kunna,
3 ani kuruyɔrɔw ra, ani kongokɔnɔyɔrɔw ra.
Aw borofɛnw, ani aw ta naforow bɛɛ,
ne bɛna a to mɔgɔw ye o bɛɛ cɛ,
hali aw ta sɔnnikɛyɔrɔw!
Ne bɛ o kɛ aw ta jurumun le kosɔn,
aw ka jurumun minw kɛ aw ta jamana yɔrɔ bɛɛ ra.
4 Ne ka jamana min di aw ma, aw yɛrɛ le bɛna a to o bɛ bɔsi aw ra.
Ne bɛna aw lataga jamana dɔ ra, aw ma jamana min lɔn,
ka taga aw kɛ aw juguw ta jɔnw ye;
sabu aw ka ne ta dimi lawuri, i ko tasuma,
tasuma min tɛna faga tuun.»
Ala kelen le ye jigiɲuman ye
5 Matigi Ala ko:
«Mɔgɔ min b’a jigi la adamaden kan, o tigi danganin lo,
min b’a boromala mɔgɔw ma,
k’a ta miiriya bɔ Matigi Ala kan.
6 O tigi bɛ i ko ŋaniyiri min bɛ kongokolon kɔnɔ;
ale tɛna hɛra ye a ɲa ra fiyewu.
A siginin bɛ to kongokolon yɔrɔ janinw le ra yi,
kɔgɔ kabakuruw cɛ ra, mɔgɔ si tɛ yɔrɔ min na.
7 «Nka mɔgɔ min b’a jigi la Matigi Ala kan,
ni Matigi Ala ye mɔgɔ min jigiya ye, o tigi ta ɲana.
8 A bɛ i ko yiri min turura jida ra,
min bɛ a ta lilinw don ka taga ji fan na;
a tɛ bɔ fundɛninwagati kala ma,
a flaburuw kɛnɛ lo tuma bɛɛ.
Hali ni sanji ma na san min na, a tɛ hami,
a fana bɛ den wagati bɛɛ.»
Minw bɛ ban Matigi Ala ra
9 «Janfa bɛ adamaden jusukun na ka tɛmɛ fɛn bɛɛ kan,
fla tɛ yi, min bɛ se k’a kɛnɛya.
Jɔntigi le bɛ se ka adamaden jusukun cogo lɔn?
10 Ne Matigi Ala, ne bɛ mɔgɔ jusukun sɛgɛsɛgɛ,
k’a kɔnɔnɔkow bɛɛ jate mina,
janko ka bɛɛ sara ka kaɲa ni a tagamacogo ye,
ka bɛɛ sara ka kaɲa ni a ta kɛwalew ye.
11 «Wɔlɔnin ma fan minw la, a bɛ taga biri o kan;
mɔgɔ min bɛ naforo sɔrɔ terenbariya ra, o tigi fana ta bɛ ten.
K’a si to a cɛmancɛ ra, a bɛ ta ka bɔ a ta naforo kɔrɔ,
a ta kow bɛ laban i ko naloman ta kow.
12 «Masasiginan nɔɔrɔman dɔ bɛ yi, min kɔrɔtanin lo tuma bɛɛ;
an ta Ala ta batoso saninman bɛ o yɔrɔ le ra.
13 E, Matigi Ala, ele min ye Izirayɛli jigi ye,
ni mɔgɔ o mɔgɔ ka ban ele ra, o tigi bɛna maroya le.
Minw bɛ o yɛrɛ mabɔ ele Ala ra olugu tɔgɔ bɛ to dugukolo buguri ra;
sabu o banna bununji ɲanaman na, min ye Matigi Ala ye.»
Yeremi ta Aladaari
14 «E, Matigi Ala, ne kɛnɛya, ni o kɛra, ne bɛna kɛnɛya;
ne kisi, ni o kɛra, ne bɛna kisi,
sabu ne ta tandori kun ye ele le ye.
15 «A flɛ, o b’a fɔra ne ma ko:
‹Matigi Ala ta kuma ko kɛra di le?
A ka min fɔ, a ye o kɛ!›
16 Nka ne kɔni, ne ma ban ka tugu ele kɔ,
ka kɛ i ta sagagbɛnbaga ye.
Ne tun t’a fɛ nin tɔɔrɔ ye se o ma; i yɛrɛ ka o lɔn.
Kuma o kuma bɛ bɔ ne da ra, i ka o bɛɛ lɔn,
a si ma dogo i ma.
17 I kana kɛ ne fɛ jatigɛko ye;
sabu ni kojugu ka se ne ma, ne dogoyɔrɔ ye ele le ye.
18 A to ne tɔɔrɔbagaw le ye maroya,
nka ne yɛrɛ kana maroya;
olugu jigi le ye tigɛ,
nka ne yɛrɛ jigi kana tigɛ.
Kojugu lase o ma,
ka cɛnri ben o kan fɔ siɲaga fla.»
Ala ta mɔgɔw ma Nɛnɛkirilon jate
19 Matigi Ala k’a fɔ ne ye ko: «Dugu donda min tɔgɔ ye ko Jamanadenw ta donda, Zuda masacɛw bɛ don ka bɔ da min fɛ, taga lɔ o da ra. O kɔ, i ye taga lɔ Zeruzalɛmu dugu donda tɔw bɛɛ ra ten.
20 I y’a fɔ mɔgɔw ye ko: ‹Aw ye Matigi Ala ta kuma lamɛn, aw Zuda masacɛw, ani aw Zuda mara mɔgɔw bɛɛ, ani aw Zeruzalɛmukaw bɛɛ, aw minw bɛ tɛmɛ nin daw fɛ!
21 Matigi Ala ko: Aw ye aw yɛrɛ kɔrɔsi, aw kana to ka doniw ta Nɛnɛkirilon* na, ka don ni doniw ye Zeruzalɛmu dugu kɔnɔ.
22 Aw kana bɔ ni doni ye aw ta bonw kɔnɔ fana Nɛnɛkirilon na, aw kana baara si kɛ; aw ye Nɛnɛkirilon kɛ lon saninyanin ye, i n’a fɔ ne tun k’a fɔ aw bɛmaw ye cogo min na.
23 « ‹Nka o ma sɔn ka ne lamɛn, o ma o toro malɔ. O ka o kun gbɛlɛya, ka ban ka mɛnni kɛ, o ma sɔn ne ta ladirikan ma.
24 « ‹Ayiwa, ni aw sɔnna ka ne lamɛn can ra, Matigi Ala ko ten, ni aw ma don ni doniw ye nin dugu dondaw fɛ Nɛnɛkirilon na, ni aw ka Nɛnɛkirilon kɛ lon saninyanin ye, ni aw ma baara si kɛ o lon na kɔni,
25 o tuma masacɛw ni fagamaw bɛna to ka tɛmɛ nin dugu dondaw fɛ. O bɛna sigi masacɛ Dawuda ta masasiginan kan; o bɛna don sowotorow kɔnɔ, ka yɛlɛ sow kan, olugu ni o ta jamana ɲamɔgɔw, ani Zuda mara mɔgɔw, ani Zeruzalɛmu dugumɔgɔw; mɔgɔw bɛna sigi nin dugu kɔnɔ wagati bɛɛ.
26 Ni o kɛra, mɔgɔw bɛna na ka bɔ Zuda duguw ra, ani Zeruzalɛmu kɛrɛfɛduguw ra, ani Boniyaminu ta mara ra, ani jamana dugumayanfan na, ani kuruyɔrɔw ra, ani jamana woroduguyanfan na, ka na saraka jɛnitaw*, ani saraka wɛrɛw, ani siman sarakaw*, ani wusunan sarakaw* bɔ, ka barakalari sarakaw* bɔ Matigi Ala ta so kɔnɔ.
27 Nka ni aw ma ne lamɛn, ni aw ma Nɛnɛkirilon kɛ lon saninman ye, ni aw ka to ka doniw ta ka don Zeruzalɛmu dugu dondaw fɛ Nɛnɛkirilon na, o tuma ne bɛna tasuma don dugu dondaw ra; tasuma bɛna Zeruzalɛmu masabonbaw jɛni, a fana tɛna faga tuun.› »