27
Alabatobaga jigi bɛ Ala le kan
1 Dawuda ta Zaburu.
Matigi Ala le ye ne ta yeelen ye, ani ne ta kisiri tigi;
ne bɛna siran jɔntigi le ɲa?
Matigi Ala le ye ne nin karifayɔrɔ ye;
ne ja bɛna tigɛ jɔntigi le ɲa?
2 Ni mɔgɔjuguw nana ne kama,
ko o bɛ na ne sogo ɲimi,
olugu minw ye ne kɛrɛbagaw ni ne juguw ye,
olugu yɛrɛ le bɛ talon ka benben.
3 Hali ni kɛrɛkɛjama dɔ le nana ne lamini,
siranya si tɛna kɛ ne jusu ra.
Hali ni o ka kɛrɛ dɔ wuri ne kama,
o bɛɛ n’a ta, jigiba le belen bɛna kɛ ne fɛ.
4 Fɛn kelen bɛ yi, ne bɛ o le daari Matigi Ala fɛ,
ne bɛ o le ɲini a fɛ kosɛbɛ:
ne b’a fɛ ka to Matigi Ala ta so kɔnɔ
ne si bɛɛ ra,
ka to ka Matigi Ala ta cɛɲa nɔɔrɔ flɛ,
ani ka to a ɲa kɔrɔ a ta batoso kɔnɔ.
5 Sabu ni lonjugu sera, a bɛna ne dogo a ta so kɔnɔ;
a bɛna ne dogo fɔ a ta fanibon kɔnɔnɔyɔrɔ ra.
A bɛna ne yɛlɛn ka ne lɔ fara dɔ kunna, janko foyi kana ne sɔrɔ.
6 Sisan ne kun kɔrɔtara;
ne jugu minw tun ka ne lamini, ne bɛ olugu bɛɛ kunna.
O ra ne bɛna saraka bɔ Matigi Ala ye a ta batoso kɔnɔ, ni ɲagarikanbaw ye;
ne bɛna dɔnkiriw la, ka Alatandodɔnkiriw la Matigi Ala ye.
7 Ne kan lamɛn Matigi Ala, ne bɛ i wele;
makari ne ra, ka ne jaabi!
8 I ka min fɔ ko: «Aw ye jija ka ne ta nɛɛma ɲini!» O kuma bɛ ne jusukun na.
E, Matigi Ala, ne bɛ ele ta nɛɛma le ɲinina.
9 I kana i ɲada dogo ne ma,
i kana dimi ka ban i ta baaraden na.
Ele le ye ne dɛmɛbaga ye,
i kana taga ka ne to, i kana ban ne ra,
ne kisibaga Ala!
10 Hali ni ne facɛ ni ne bamuso banna ne ra,
Matigi Ala bɛna ne ladon.
11 Matigi Ala, i ta siraw yira ne ra,
ne bla terenninya sira kan,
ne juguw kosɔn.
12 I kana ne kɛ ne juguw sago ye,
sabu seerejugu dɔw wurira ne kama,
kuma farimanw dɔrɔn le bɛ o daw ra.
13 Ne tun bɛna a kɛ di le sa,
ni ne tun ma la a ra ko ne bɛna Matigi Ala ta nɛɛma ye tuun
dunuɲa ra yan ni mɔgɔ ɲanaman tɔw ye!
14 Matigi Ala makɔnɔ;
baraka don i yɛrɛ ra, ka jija,
ka Matigi Ala makɔnɔ.