69
Ala le bɛ mɔgɔ kisi
1 Dɔnkirilabagaw kuntigi. Nin dɔnkiri bɛ la dɔnkiri min lacogo ra, o tɔgɔ ye ko «Yirifiyeren». Dawuda ta Zaburu.
2 E, Ala, ne kisi,
sabu ji ka ne mina fɔ ne kan kɔrɔ.
3 Ne bɛ jigira jibɔgɔ jukɔrɔ, dan tɛ min dunya ra,
foyi tɛ yi ka ne lalɔ;
ne bɛ jigira fɔ ji jukɔrɔyɔrɔ ra,
jiwoyo bɛ tagara ni ne ye.
4 Ne kulera fɔ ka ne baraka ban,
ne kan jara fɔ a bɛ ne jɛni;
ne ka ne ta Ala maflɛ,
fɔ ka na ne ɲadenw sɛgɛ flɛri ra.
5 Mɔgɔ minw bɛ ne kɔninya gbansan,
olugu ka ca ka tɛmɛ hali ne kunsigiw kan.
Minw b’a fɛ ka ne halaki, olugu baraka ka bon kosɛbɛ;
ne juguw bɛ bagara ne ma le.
Ne ma fɛn min sonya,
o ko ne ye o sekɔ jagboya ra!
6 E, Ala, ele ka ne ta hakirintanya lɔn,
ne ta hakɛkow fana ma dogo i ma.
7 Minw jigi bɛ i kan, i kana a to olugu ye maroya ne kosɔn,
Matigi Fangatigi Ala.
Minw bɛ i ta jɛnɲɔgɔnya ɲinina, i kana a to olugu kun ye suuru ne kosɔn,
Izirayɛli ta Ala.
8 Sabu ele le kosɔn mafiyɛnyari bɛ ne kan,
ele le kosɔn ne kun suurura.
9 Ne kɛra mɔgɔ wɛrɛ ye ne yɛrɛ balemaw cɛ ra,
ne kɛra siya wɛrɛ mɔgɔ ye ne balemaw cɛ ra,
10 sabu i ta so ko hami bɛ ne jɛnina ne jusukun na i n’a fɔ tasuma.
I mafiyɛnyabagaw bɛ mafiyɛnyarikuma minw fɔ i ma, o kumaw bɛ ben ne le kan.
11 Ni ne bɛ kasi ka sun don,
o bɛ dɔgɔyari le lase ne ma.
12 Ni ne ka bɔrɔfani don ne yɛrɛ ra,
o bɛ ne tɔgɔ le don o ta zanaw ra.
13 Minw bɛ sigi dugu donda ra, olugu bɛ ne kɔrɔfɔ,
dɔrɔminbagaw bɛ ne tɔgɔ le don o ta dɔnkiriw ra.
14 Nka ne kɔni, Matigi Ala, ne bɛ ne ta daariri fɔra ele le ye;
nin ye kɛ wagatiɲuman ye.
E, Ala, ne jaabi i ta ɲumanyaba kosɔn,
i ye ne kisi ka kaɲa ni i ta kankelentigiya ye.
15 Ne sama ka bɔ bɔgɔ ra, janko ne kana jigi tuun,
ne bɔsi ka bɔ ne kɔninyabagaw boro;
ne sama ka bɔ ji jukɔrɔ,
16 jiwoyo kana taga ni ne ye,
jidunbaw kana ne datugu,
saya dinga kana datugu ne da ra.
17 Ne jaabi, Matigi Ala, sabu i ta ɲumanya ka di;
a kɛ i ta hinaba kosɔn, i ye i ɲa munu ka ne flɛ.
18 I kana i ɲada dogo i ta jɔn ma;
i teliya ka ne jaabi sabu ne degunin lo.
19 Gbara ne ra, i ye ne kisi;
ne kunmabɔ ka bɔ ne juguw boro.
20 O ka ne dɔgɔya, ka ne lamaroya, ka ne kun suuru cogo min na, i yɛrɛ ka o lɔn;
i ka ne juguw bɛɛ lɔn.
21 O ta dɔgɔyari ka ne jusu kasi
fɔ ka ne bana;
ne tun b’a miiri ko dɔ bɛna makari ne ra, nka mɔgɔ si ma makari ne ra,
ne tun ko jususaarobaga bɛna sɔrɔ ne ra, nka mɔgɔ ma sɔrɔ.
22 O ka fagarifɛn kɛ ne ta domuni na,
ka minnifɛn kumunin dɔ kɛ ne ta minji ye.
23 Ala y’a to o ta domunibaw ye kɛ jan ye ka o mina,
o ta hɛra ye kɛ jɔ ye ka o mina.
24 O ɲaw ye fin, o kana yeri kɛ tuun;
o kɔ kurunin ye to tuma bɛɛ.
25 I ta jusugban ye jigi o kan,
i ta dimiba ye ben o kan.
26 O ta sigiyɔrɔw ye kɛ yɔrɔ lakolonw ye,
mɔgɔ si kana kɛ o ta bonw kɔnɔ.
27 Sabu ele ka kojugu ben mɔgɔ minw kan, o bɛ wuri olugu le kama ka o tɔɔrɔ;
ele ka dimi ben mɔgɔ minw kan, o bɛ to ka olugu ta sɛgɛkow le lakari.
28 O ta kojuguw bɛɛ jate,
o kana i ta terenninya sɔrɔ ka ye.
29 O tɔgɔ ye jɔsi ka bɔ ɲanamanya kitabu kɔnɔ,
o tɔgɔ kana sɛbɛ ni mɔgɔ terenninw tɔgɔw ye.
30 Ne kɔni ye ɲanibagatɔ ye, ne sɛgɛnin lo;
Ala, ne kisi, ka i janto ne ra.
31 Ne bɛna dɔnkiri la ka Ala tɔgɔ tando,
ne bɛna a bonya ka baraka la a ye.
32 O le ka di Matigi Ala ye ka tɛmɛ misisaraka kan,
ka tɛmɛ misitoran ni a gbanw ni a sengbɔgɔrɔw bɛɛ kan.
33 Ni mɔgɔ majigininw ka o ye, olugu bɛna ninsɔndiya.
Aw Alaɲinibagaw, Ala ye sijan di aw ma!
34 Sabu Matigi Ala bɛ fagantanw lamɛn;
o k’a ta mɔgɔ minw mina, a tɛ ɲina olugu kɔ.
35 Sankolo ni dugukolo bɛɛ y’a tando,
ani kɔgɔji ni a fɛnɲanamanw bɛɛ;
36 sabu Ala bɛna Siyɔn dugu kisi,
ka Zuda duguw lɔ kokura.
A ta mɔgɔw bɛna sigi o duguw kɔnɔ tuun, k’a kɛ o ta ye;
37 o yɔrɔw bɛna kɛ a ta jɔnw ta durujaw ta ye.
A tɔgɔ ka di minw ye, o yɔrɔ bɛna kɛ olugu le sigiyɔrɔ ye.