6
(Dugu sunguruw kumakan)
1 Musow bɛɛ ra cɛɲuman,
i jarabi tagara min le?
I jarabi tagara fan juman fɛ sa?
A fɔ an ye janko an ye i dɛmɛ k’a yɔrɔɲini.
(Sunguru kumakan)
2 Ne jarabi tagara a ta nankɔ le ra,
wusunanyiriw falennin bɛ yɔrɔ min na.
A tagara to ni a ta bɛganw ye nankɔw kɔnɔ,
a bɛ yirifiyerenw tigɛra yi.
3 Ne ye ne jarabi ta ye,
ne jarabi fana ye ne ta ye.
A bɛ ni a ta bɛganw ye, o bɛ bin ɲimina yirifiyerenw cɛ ra.
Sunguru ta cɛɲa
(Kanbelen kumakan)
4 E, ne kanuɲɔgɔn, i cɛ ka ɲi, i ko Tirisa dugu,
i saraman lo i ko Zeruzalɛmu dugu;
i bɛ mɔgɔ ja tigɛ i ko kɛrɛkɛjamaba lajɛnnin.
5 I ɲa bɔ ne ra,
sabu i ta flɛri bɛ ne hakiri wuri le.
I kunsigi cɛ ka ɲi, i ko bakuru
minw bɛ jigira ka bɔ Galadi kuru kan.
6 I ɲinw gbɛra i ko sagakuru
min konin bɛ bɔra kɔ ra.
I ɲinsira fla bɛɛ dafanin lo,
dɔ ma fɔn a si ra.
7 I dafuru bɛɛ kelen kelen bɛ i ko gerenadi cɛtigɛ,
i ta lankana jukɔrɔ.
8 Masamuso biwɔɔrɔ bɛ masacɛ fɛ,
jɔnmuso biseegi ye a musow ye;
sunguruw da tɛ lɔn.
9 Nka ne ta tugani, ne ta dafanin ye kelenpe le ye.
A ɲɔgɔn wɛrɛ tɛ a bamuso fɛ.
A ko ka di a woroba ye ka tɛmɛ fɛn bɛɛ kan.
Ni sunguru tɔw k’a ye, olugu b’a fɔ a ma ko a ta ɲana.
Masamusow, ani jɔnmusow minw ye a musow ye, olugu b’a tando.
(Teriw kumakan)
10 E, nin ye sunguru juman natɔ ye i ko dugugbɛda bɔtɔ?
A cɛ ka ɲi i ko karo,
a bɛ manamana i ko tere;
a bɛ mɔgɔ ja tigɛ i ko kɛrɛkɛjamaba lajɛnnin.
11 Ne jigira nankɔ ra, yiridentaw bɛ nankɔ min na,
ka taga yiriw falentɔ flɛ,
k’a flɛ ni rɛzɛnsunw bɛ nugura,
ni gerenadisunw bɛ fiyerenna.
12 Fɛn min k’a to ne nege ka ne sama
ka taga ni ne ye fɔ ne ta jamana ta kɛrɛkɛwotoro cɛ ra, ne ma o lɔn.