4
Okholiwa wa Pheeturu na Yaahaya phi Atthunkhulu a Mayaahuuti
Wakathi Pheeturu na Yaahaya aari ottakhulaavo owoozaka atthu, khutavo mahaakhimu na attunkhulu a anamweekesela a nyuupa ya Nnyizinku na masatukhi. Yo aari ookafilikha venkivene mwaasa wa yoori maaswihaapa entta owaasomisa atthu, na owooza yoori owaapho osisimuwa wa ananfwa nkhama etthiipile Yinsa asisimuweyiyeezo. Aphano yo khunkhola Pheeturu na Yaahaya, khuwaattha nkalapooso yaari makaaripi khuwaalikha mpakha ocha. Ila atthu asiiliyeeyo hapari epile aari olupaaye enkeene eyiye omwamini Yinsa. Khwa etthiipo mamuuni khusala avira eekezeleyaka khufiya etthu ya alufu thaanu.
Siikhu yaphiiri khuthukumana afwalume, mashawuriya na anamwaatikha nti wa Yerusaleemu. Atthu aarivo pi apa: Anaasi, nttunkhulu wa mahaakhimu a tiini, Khayiifwa, Yaahaya, Alishantere na atthu ooshi apale aari oojama wa nttunkhulu wa mahaakhimu a tiini. Yo khuruma okhuweliwa maaswihaapa apale awiri Pheeturu na Yaahaya. Khusala owoozela araka: “Mwirettaniyeeyo vitthu epi owahi-ni wala nzina-ni?”
Pheeturu aari wa wiitaazaniwa Rooho Ttakatthiifu, khusala alupa awoozaka: “Afwalume na mashawuriya, yoori mweeyo mwanikhuwela leelo yoori mwinuuzele vitthu zooshaphe ninretteliyeezo ntthu otule woorakala na nanna ovonisiweezo. 10 Ila apho mwijuwe saana mweeyo mooshi mpakha na atthu a nti wa Ezirayeele yooshi yoori khwa nzina la Yinsa Al-Masiihu wa Nazareeti, othuutule mweeyo ena mwankhomeliyeeyo na othuuto Nnyizinku ansisimuliyeeyo muufwa, nzina lawe tthi linvoniyeeyo namarakala otu mwinimoonaaye apha. 11 Yinsa othuuto
 
‘liwe lookatthaliwa ti mweeyo
anamajeka manyupa,
ila khurettiwa wiiya
ti liwe linkhomaazaaye nyupa.’
 
12 Khaavo ntthu nkina ariina owahi wa owoosuru atthu: vathi apha wooshivo khahiivo nzina la ntthu nkina linuusurwaaye.”
13 Attunkhulu apale ooshi khwiiya onshankela Pheeturu na Yaahaya mwaasa wa ominyala aarinaaye, yo khuhaakikhi yoori khweele apa Yinsa ori vamote na-yo. 14 Mwaasa yoori aari oretta omoonaka ntthu otule woorakala aavonisiweeyo, yo khuhisala oona hatha paatuli khwa Yaahaya na Pheeturu. 15 Khuwooza yoori asaruliwemo nnyupa mphule aathukumaneliweemo. Aphano atthunkhulu apale khwaaza onyakulisana atthaaporu, 16 oozelanaka yoori: “Nkahayani niwaarettele niini? Atthu ooshi Yeruzaleemu eti ajuwa yoori yo aretta minjuza zawooneya zihinikheeteyaazo. 17 Apho yoori vitthu epo zihitepe omwajeyela mmuti wooshimo, nlaweni na atthu ooshi asiila, nlaweni niwoopopisa niwoozaka yoori ahirutele owooja atthu vitthu monkoni wa nzina la Yinsa.”
18 Aphano khukhuweliwa Pheeturu na Yaahaya khurutela nnyupa nttumpule aasaruliyeemo, khuriwa yoori ahittakhule hatha etthu na ahisomise monkoni wa Yinsa. 19 Pheeturu na Yaahaya khuwaajipu araka: “Mwinoona yoori etthu ya eto ti yoohaakhi mmakhono wa Nnyizinku wuushututelani mweeyo khunlikha Nnyizinku. 20 Fweeyo khaninwahi olikha olupa epile nooniyeezo na nisiiliyeezo.”
21 Khuwaatutushu khuwoojela khuwaalikha, maana khaari woona etthu woowaahukhumwela na atthu ooshi aari onsifwu Nnyizinku mwaasa wa minjuza epile zarettikhiyeeyo. 22 Mwinyi otule aavonisiweeyo wa minjuzavo aarina hirimu yooziti nyaakha arupayiini.
Lompa ya anamalothela a Yinsa a mwanzo
23 Wakathi Pheeturu na Yaahaya aleviweevo, n'oofiya vahali aarivo ashirikhaaya, khusala awaathatelela zooshi epile aari wuuziwaaye phi attunkhulu a mahaakhimu na anamalokozela a tiini. 24 Paata ya ashirikhaaaya apale osiila mattakhuzi apale, ooshi aya khusala alompa araka: “Mbwana, ti weyo wumpiyeeyo pinku na vathi, pahari na vitthu zooshi ziriye voolumwenku. 25 Weeyo wattakhula khwa Rooho Ttakatthiifu vakatthi wa papeetthu Daawuuda nrumeya awo oraka:
 
‘Makaafiri ankatipukhaka-ni
wala atthu anaakanyerelaka-ni vitthu zoohiiyi etthiipo?
26 Attunkhulu a vathi ajilokottela
na afwalume akhusanyeya yoori
anlupatthe Mbwana na alupatthe Al-Masiihu
otule Ye anthawuliyeeyo.’
 
27 Ekhweele-khweele, Herooti na Pontiyu Pilaatu akusanyeya na makaafiri na atthu akina a Ezirayeele, ooshi ari sitati ethiiti na niiya yonlupattha Yinsa nrumeya awo othuutu onthawaziyeeyo. 28 Na theenya amarisela maana aretta zooshi epile weeyo walakeliyeeyo oretta khwa owahi orinaaye. 29 Apho weeyo Mbwana, woone shawuri ariinazo zootakhala khwa fweeyo na onikhomaze yoori nilaleye nttakhuzi lawo woohoovi hatha etthu. 30 Wookole nkhono awo waaze ovonisa na oretta minjuza na vitthu zooshankisa khwa nzina la nrumeya awo Yinsa.”
31 Paata ya maaswihaapa apale wiisha olompa puuro etile aari akhusanyeyiyeevo, khusala esakhinyeya ooshi khuweelaala Rooho Ttakatthiifu, khusala alaleya nttakhuzi la Nnyizinku woohoovi hatha etthu.
Anakhiyoni vitthu zaya eeta omelana
32 Ooshi rooho zaya zaari moote, akhili zaya zaari sawa-sawa. Khaarivo hatha mmote aari yoonaaye etthu yawe wiiya yaawe. Apale aari opatthaaye ama apattha etta waawanya na azaaya zooshi aari wiiyanaazo. 33 Maaswihaapa aari ovira alawelaka oshaahiti osisimuwa wa Bwana Yinsa na owahi nwulweene, na yaaweeshukheliye rehema khuluyeene. 34 Vakatthi vaya khaarivo hatha ntthu mmote woothowiwa, apale aarina mapuwa ama manyupa eetta wuuzanyisa, nzurukhu aya n'ootiisa, 35 n'oowenkha maaswihaapa yoori awaawanyeze atthu ooshi wakhula ntthu khwa khiima yoothowiwa wawe.
36 Yuusufu, antthajiweeyo nzina la Baranabe, aari haakhimu, owawe waari Shiipere, nzina lawe lirina maana oori ‘maatumerela’, 37 khuuzanyisa nshapa lawe, nzurukhu aya khutiisa khuwenkhe maaswihaapa.