2
1 Ti nanna yiishisiweezo ophattuchiwa pinku na vathi na zooshi ziriimo.
2 Nluku amarisiyeevo khaazi yawe, siikhu yasaapa khuvumula.
3 Siikhu ethiito yasaapa, Nluku khuparikhiya na khuttakatthisa mwaasa woovumula khwa khaazi yawe aakholiyeeyo yoophattucha.
4 Eti hatiithi yoophattuchiwa pinku na vathi.
Nanna apuwiyeezo pinaatamu
Siikhu Mbwana Nnyizinku aphattuchiyeevo pinku na vathi,
5 vatuniya khawaarivo hatha muutthi wala nyaani zaari zihinootthe, maana Mbwana Nnyizinku aari ahinanyisele vuula vathi na khaarivo hatha ntthu woolima tuniya.
6 Ila maati aari opuwa vathi khusala anaanisa tuniya yooshi.
7 Aphano, Nnyizinku khumumpa pinaatamu khwa ottophe wa vathi. Khunvitelela mphula mwawe khumwinkha phuumu y'oohaayi, pinaatamu khwiiya yumpe haayi.
8 Mbwana Nnyizinku khuzala woorotha nti wa Eeteni, phantte y'ookhu lintthamuwaawo njuwa, khuntthaamo pinaatamu otule aamumpiyeeyo.
9 Mbwana Nnyizinku khootthisa miitthi za wakhula nanna, zooshapweya woona na zootuva oja mishumo zaya. Vakatthi wa woorotha khuzalavo muutthi woohaayi, na muutthi onjuwisaaye yooshapweya na yootakhala.
10 N'Eeteni nttumpho waarimo muuttho waari okhuwaraaye woorotha opule; muuttho otthuupo khwaawanyeya khupuwavo nyuuttho mine.
11 Wamwanzo oniitthiwa Pishoni, opo wazukulela nti wooshi wa Havila, ohali wa waattawo thahapu.
12 Thahapu za nti opo pi zooshapweya na theenya ewaakho miitthi enlazaaye manlela oonukhela na mawe ootafikhana.
13 Muuttho opu waphiiri oniitthiwa Kihoni, ozukuleliyeeyo nti wooshi wa Kuushi.
14 Muuttho opo wattaatthu, onviraaye phantte lintthamuwaawo njuwa ya nti wa Shuuru, oniitthiwa Tiikiri. Opu wanne Efwarathi.
15 Mbwana Nnyizinku khunthuula pinaatamu otule khunttha nwoorotha wa Eeteni yoori asala alimela na weekesela.
16 Mbwana Nnyizinku khunruma pinaatamu otule yoori: “Miitthi epi ziriiye nwoorotha mphu oje mishumo zaya woohiina hatha shaakha.
17 Ila muutthi opo woojuwisa yooshapweya na yootakhala ohije; siikhu onttelaaye oja satakithu ontta ofwa.”
18 Aphano Mbwana Nnyizinku khuri: “Khahi yooshapweya pinaatamu wiiya otthwe, kintta omumpa pinaatamu wa wiiya nkhama ye asala ankhiza.”
19 Paata ya Mbwana Nnyizinku wumpa khwa ottophe wa vathi nyama zooshi za ntthuttu na anyannyi apa o'otulu, zooshi khuntiisela Adamu yoori amoone nanna aari weettelaazo otthaja; wakhula yumpe aari otthajaaye, nzina laya laari wiiya nttinttho.
20 Adamu khutthaja mazina mifuwo za vaje, anyannyi o'otulu na nyama zooshi za ntthuttu. Ila khuhipuwivo hatha moote ya wiiya nkhama ye yaari weettelaaye onkhiza.
21 Aphano, Mbwana Nnyizinku khuntiisela Adamu osikizi wa waatta. Eettaka olala, khunlaza likhonkolo limote la pavu yawe, aphale vaya aalaziyeevo khuttiyavo na nyama.
22 Likhonkolo limote la pavu anlaziyeeyo Adamu, Mbwana Nnyizinku khumumpa muukha, khumwinkha Adamu.
23 Ye khuri:
“Ahee! Ntthi likhonkolo la likhonkolo laka
na nyama ya nyama yaka.
Nka eetthiwaka oriwa muukha,
maana alaziwa vamwiili wanlume.”
24 Ti eto nlume oninlikha papaawe na mamaawe khukusanyeya na muukhaawe oowiiri khwiiya nyama moote.
25 Oowiiri, Adamu na muukhaawe aari wiiya waazu woohiina haaya.