33
Okutthana wa Ezawu na Yaakhumpa
1 Yaakhumpa khweekesa okhule aari weettaawo khumoona Ezawu eettaka ota na atthu awe miiya nne. Khuwaawanya aanaawe khumwinkha Liiya, Rakeele na akarumeyaawe apale awiri aakha.
2 Khuwaalokozisa akarumeyaawe apale na aanaaya, khusala alottiwa ti Liiya na aanaawe, khwiishela Rakeele na Yuusufu.
3 Yaakhumpa khuwaalokozela, khukokhora khwiinama swaafu sapa mpakha nttunkhulu awe ofiya aphale aariivo.
4 Ezawu khutthira khulawa khumpatikha khumpejari, oowiiri khusala alila.
5 Ezawu khulansa maasho khuwoona aakha na aana, ye khuuzela yoori: “Khi apa apaani?”
Yaakhumpa khunjipu: “Aana apa rehema Nnyizinku amwinkhiyeeyo karumeyeenu.”
6 Aphano akarumeya apale na aanaaya khumwaattama khukokhora khwiinama.
7 Elottelanaka Liiya khuta attaaphale na aanaawe khukokhora khwiinama. Wa wiishela aari Yuusufu na Rakeele, na-yo khuta khukokhora khwiinama.
8 Ezawu khuuzela yoori: “Nyama epile zooshi kisikaniyeeyo ntarikhi ontakhela-ni?”
Yaakhumpa khujipu: “Kintakha kipatthe osuhi mmakhono mwenu mbwanaaka.”
9 Ezawu khulupa yoori: “Miiyo kinaaye pure ttwiiyaku, epo zaawo osalane omwennyewe.”
10 Yaakhumpa khusala ankhanyarela araka: “Mwihikatthale! Nkhama kinsuhi mmakhono mwenu safwatali pokherani vitthu epi, maana n'oowoonani mweeyo koona nkhama kimooniye Nnyizinku khwa nanna mwituveliweezo ti miyo.
11 Kinuuvekelani yoori mwipokherele vitthu epi kuutiiseliyeenini mwaasa yoori Nnyizinku akiparikhiya, akinkha zooshi epile kinhithajiyaaye.” Ye khunkhanyarela Ezawu mpakha okhupali.
12 Ezawu khuri: “Nlawe nivire neettettaka.”
13 Ila Yaakhumpa khuri: “Mbwanaaka, mwinjuwa yoori aana apa nalelo asimaana na kinaaye pwittipwitthi na mompe zinaamwisaaye. Amana kikhanyarela weettettisa channu zooshi zintta ofwa siikhu moote.
14 Apho mwilokoze mbwanaaka, miiyo kintta ota vattiitthi-vattiitthi khwa mwentto wa aanaaka na nyama zaka, mpakha ofiya nti wa Seyiiri.”
15 Ezawu khuri: “Kintakha atthu aka akina kuulikhele weeyo.”
Yaakhumpa khuuzela yoori: “Mwaasa wa niini? Khinhithajiya. Ethiiti mwikipokhereliyeeyo saana paasi.”
16 Siikhu ethiitile Ezawu khulankha khusala arutela owawe Seyiiri.
17 Yaakhumpa khulankha khusala alawa Sokoota. Ottuukhule khujeka nyuupa yawe na mazizi a nyama zawe. Ti eto atthajiyeevo nzina la Sokoota.
Yaakhumpa ontta Shekemu
18 Yaakhumpa arutiyeevo Paata-Araamu khufiya Shekemu tuniya ya Kanaani ari nkumi, khweemesa heema zawe kharipu ya sitati ethiitile.
19 Khuuzanya phantte moote ya nshapa puuro ethiitile eemesiyeevo heema zawe, na aana a Hamori, paapa wa Shekemu, khwa hisapu miiya nzurukhu wa feeta.
20 Attaaphale khunjeka alitaari khuntthaja “Nluku yoori Nluku wa Ezirayeele.”