36
Peewu ya Ezawu
1 Eti peewu ya Ezawu anjuwaniwaaye nzina la Edomu.
2 Ezawu khuwaarala aakha a Kanaani. Mmote aari wiitthiwa Aada aari mwaana wa Elooni, nhiiti. Nkinoko aari wiitthiwa Olipama mwaana wa Anahi ntuulu wa Zipiyooni Nhiivi,
3 na Basemaathi mwaana wa Esumayila nlupuwe Nepayoothi.
4 Aada aavokoleliwe mwaana ti Ezawu khuntthaja nzina la Elifazi, na Basemaathi khunvokola Rewele.
5 Na Olipama khunvokola Yewuushi, Yalaamu na Koora. Apa aari aana Ezawu awaavokoliyeeyo tuniya ya Kanaani.
6 Ye khuwaathuula aakhaawe na aanaawe na atthu ooshi aari wiikhalanaaye na vitthu zooshi aapatthiiyeezo tuniya ya Kanaani waaza pwittipwitthi zawe, puuzi na mompe zawe zooshi, khumwazeyanana ttwiiye Yaakhumpa khulawa khwiikhala nti nkina.
7 Ye khuthama mwaasa wa nti opule aari wiikhalaaye khawaarina etthu-yooja yoofiyela oja nyama zaya zooshi, mali zaya zaari za waatta khuhisala ewaheya wiikhala vahali vamote.
8 Ezawu, otu aniitthiwaaye Edomu, khuthama khulawa khwiikhala onyaako wa Seyiiri.
9 Eti peewu ya Ezawu paapa wa Meedomu aniikhalaaye onyaako wa Seyiiri.
10 Apa mazina a aana a Ezawu:
Elifazi mwaana wa Aada muukha wa Ezawu, Rewele mwaana wa Basemaathi muukha wa Ezawu.
11 Apa mazina a aana a Elifazi:
Teemani, Omari, Zeefo, Katamu na Kenaazi.
12 Tinna, muukha nkina wa Elifazi mwaana wa Ezawu, aavokoleliwe mwaana aari wiitthiwaaye Amaleekhi. Apa atuulu a Aada muukha wa Ezawu.
13 Apa aari aana a Rewele:
Nahathi, Zeera, Shaama na Miiza. Apa atuulu a Basemaathi muukha wa Ezawu.
14 Apa aana a Olipama muukha wa Ezawu, mwaana wa Anahi, ntuulu wa Zipiyooni:
Yewuushi, Yaalamu, na Koora.
15 Apa mahaakhimu a mahimo a peewu ya Ezawu:
Elifazi, mwaana wamwanzo wa Ezawu, aanaawe aari apa:
Haakhimu Teemani, haakhimu Omari, haakhimu Zeefo, haakhimu Kinaazi,
16 haakhimu Koora, haakhimu Katamu, na haakhimu Amaleekhi. Apo aari mahaakhimu a peewu ya Elifazi nti wa Edomu. Aari atuulu a Aada.
17 Aana a Rewele, mwaana wa Ezawu aari apa:
Haakhimu Nahathi, haakhimu Zeera, haakhimu Shaama na haakhimu Miiza. Apa mahaakhimu a Rewele nti wa Edomu na atuulu a Basemaathi muukha wa Ezawu.
18 Aana a Olipama muukha wa Ezawu, aari apa:
Haakhimu Yewuushi, haakhimu Yaalamu na haakhimu Koora. Apa mahaakhimu a peewu ya Olipama muukha wa Ezawu mwaana wa Anahi.
19 Ooshi apa mahaakhimu na aana a Ezawu otu anjuwaniwaaye nzina la Edomu.
Peewu ya Seyiiri
20 Apa aana a Seyiiri, nhoori aari wiikhalaaye nti otthuupule; Lotaani, Shobaali, Zipiyooni, Anahi,
21 Diishoni, Eseeri na Diishani. Apa aari mahaakhimu a nti wa Hoori, aana a Seyiiri nti wa Edomu.
22 Aana a Lotaani aari apa:
Hoori, Hemani, na Tinna nlupu wa Lotaani.
23 Aana a Shobaali aari apa:
Aluvani, Manahati, Ebali, Shefo na Onamu.
24 Aana a Zipiyooni aari apa:
Aaya na Anahi othuuto ooneliyeeyo nlipu wa maati oolukuza n'yaara ashukisaka apuuru za papaawe Zipiyooni.
25 Aana a Anahi aari apa:
Diishoni na Olipama.
26 Aana a Diishoni aari apa:
Hemetaani, Eshipaani, Ethirani na Keerani.
27 Aana a Eseri aari apa:
Bilani, Zaawani na Akani.
28 Aana a Diishani aari apa:
Wuuzi na Araani.
29 Apa aari mahaakhimu a Ahoori:
Lootani, Shopali, Zipiyooni, Anahi,
30 Diishoni, Eseeri na Diishani. Apa aari mahaakhimu a ahoori, ti nanna aawanyeyiyeezo mahimo aya nti wa Seyiiri.
Afwalume na mahaakhimu a nti wa Edomu
31 Apa afwalume aariina yenzi nti wa Edomu ahineeyevo hatha mfwalume mmote wa mwiizirayeele.
32 Beela mwaana wa Bewoori ti ye aathawaliyeeyo tuniya ya Edomu, sitati yawe yaari wiitthiwa Dinaapa.
33 N'oofwa Beela, khuthawala Yobaabu mwaana wa Zeera wa sitati ya Bozara.
34 Yobaabu khufwa, khuthawala Hushaamu wa nti wa Temaani.
35 Khufwa Hushaamu, khuthawala Hadaadi mwaana wa Bedaadi aawaashinttiyeeyo Amidiyaani nti wa Mowaabu. Sitati yawe yaari wiitthiwa Avithi.
36 Hadaadi khufwa, khuthawala Samula wa nti wa Masareka.
37 Samula khufwa, khuthawala Shawulu wa nti wa Rohopoothi waattameliyeeyo muuttho Efwarathi.
38 Shawulu khufwa, khuthawala Baali-Hanani mwaana wa Akiboori.
39 Afwiiyeevo Baali-Hanani mwaana wa Akiboori khuthawala Hadaari, sitati yawe yaari wiitthiwa Paawu, muukhaawe aari Mehetabeeli mwaana wa Matereeti ntuulu wa Mezahaabu.
40 Mahaakhimu apa aari a peewu ya Ezawu, na mahimo aya na miti zaya:
Haakhimu Tinna, Aluvani, Yeteeti,
41 Oholipama, Elaahi, Pinoni,
42 Kenaazi, Temaani, Mibizaari,
43 Makidiyeeli na Iramu. Apa aari mahaakhimu a Edomu; wakhula mmote aari wiikhala puuro etile aari othawalaaye.
Meedomu ooshi peewu ya Ezawu.