5
Peewu ya Adamu
1 Eti warakha yoovokola wa peewu ya Adamu.
Wakathi Nluku amumpiyeeyo pinaatamu, aamumpiye wa wiiya nkhama ye;
2 nlume na muukha ti ye awompiyeeyo. N'oowompa khuwaaparikhiya. Khuwaatthaja nzina la “anaatamu”.
3 Adamu afiiyeevo nyaakha miiya na talaathiini khumpattha mwaana wa wiiya nkhama ye na khwa wumpo awe khuntthaja nzina la Seethi.
4 Paata yonvokola Seethi, Adamu khwiikhala theenya nyaakha miiya naane khuwaapattha aana a waatta aalume na aakha.
5 Adamu afwa arina nyaakha miiya tiisiya na talaathiini.
6 Seethi afiiyeevo nyaakha miiya na mithaanu, khunvokola Enooshi.
7 Paata yonvokola Enooshi, Seethi khwiikhala theenya nyaakha miiya naane na sapa khuwaapattha aana akina aalume na aakha.
8 Seethi afwa arina nyaakha miiya tiisiya na khumi na miwiri.
9 Enooshi afiiyeevo nyaakha tiisiini, khunvokola Kenaani.
10 Paata yonvokola Kenaani, Enooshi khwiikhala theenya nyaakha miiya naane na khumi na mithaanu, khuwaapattha aana akina aalume na aakha.
11 Enooshi afwa arina nyaakha miiya tiisiya na mithaanu.
12 Kenaani afiiyeevo nyaakha sapiini, khunvokola Mahalaleeli.
13 Paata yonvokola Mahalaleeli, Kenaani khwiikhala theenya nyaakha miiya naane na arupayiini, khuwaapattha aana akina aalume na aakha.
14 Kenaani afwa arina nyaakha miiya tiisiya na khumi.
15 Mahalaleeli afiiyeevo nyaakha siithiini na mithaanu, khumpattha mwaana khuntthaja nzina la Yareeti.
16 Paata yonvokola Yareeti, Mahalaleeli khwiikhala nyaakha miiya naane na talaathiini khuwaapattha aana akina aakha na aalume.
17 Mahalaleeli afwa arina nyaakha miiya naane na tiisiini na mithaanu.
18 Yareeti afiiyeevo nyaakha miiya na siithiini na miwiri, khumpattha mwaana khuntthaja nzina la Henookhi.
19 Paata yonvokola Henookhi, Yareeti khwiikhala nyaakha miiya naane, khuwaapattha aana akina aalume na aakha.
20 Yareeti afwa arina nyaakha miiya tiisiya na siithiini na miwiri.
21 Henookhi afiiyeevo nyaakha siithiini na mithaanu, khumpattha mwaana khuntthaja nzina la Methuseela.
22 Paata yonvokola Methuseela, Henookhi khulotta mwentto wa Nnyizinku nyaakha miiya ttatthu, khuwaapattha aana akina aalume na aakha.
23 Ye eekhaliye nyaakha miiya ttatthu na siithiini na mithaanu.
24 Henookhi aarina osiilana nwulweene na Nluku. Ye eettiye woophaziwa ti Nluku.
25 Methuseela afiiyeevo nyaakha miiya na thamaaniini na sapa, khunvokola Lameekhi.
26 Paata yonvokola Lameekhi, Methuseela khwiikhala nyaakha miiya sapa na thamaaniini na miwiri, khuwaapattha aana akina aalume na aakha.
27 Methuseela afwa arina nyaakha miiya tiisiya na siithiini na tiisiya.
28 Lameekhi afiiyeevo nyaakha miiya na thamaaniini na miwiri khumpattha mwaana mmote.
29 Mwaana otule mmote ampatthiyeeyo khuntthaja nzina la Nuuhi, ye khulupa yoori: “Khwa khaazi zoolwaaza ninkholaazo nilimaka tuniya eti elaaniweeyo ti Nnyizinku, mwaana otu ti ye anttela wiitthaaza rooho zetthu.”
30 Paata yonvokola Nuuhi, Lameekhi khwiikhala theenya nyaakha miiya thaanu na tiisiini na mithaanu, khuwaapattha aana akina aalume na aakha.
31 Lameekhi afwa arina nyaakha miiya sapa na sapiini na sapa.
32 Nuuhi eekhaliye nyaakha miiya thaanu khuwaapattha aana aalume khuwaatthaja mazina: Sheemu, Haamu na Yafeeti.