9
Yinsa oninvonisa ntthu aavokoliweeyo ahoonaka.
Yinsa alawaka, ntarikhi khumoona mwinyi mmote aavokoliweeyo ari woohooni. Anakhiyoni awe khumuuzela yoori: “Rabi, otu ovokoliwa ahoonaka, mwaasa wa twampi zawe, ama, twampi za apapaze?”
Yinsa khuwaajipu yoori: “Khahiyo ye wala apapaze akosiyeeyo, ila vitthu epi zarettikhana yoori owahi wa Nluku othoonyezeye muuhaayi mwawe. Maana enihithajiya okhola khaazi nthana otthuupu za otule akiperekhiyeeyo, amana oripa khina anwahaaye okhola khaazi. Wiiya kiri voolumwenku, ki nuuru ya olumwenku.”
Paata ya olupa mattakhuzi apale khutthemela vathi, maattha awe khuphakanya na mattophe khuttukunttela mmaasho wa mwinyi otule. Aphano khumuuza yoori: “Olawe wajoose nkulaathayini ya Siloowe” (liriina maana a “operekhiwa”). Mwinyi otule khulawa khujoosa khuruti eettaka woona.
Anamwaattamanana awe na apale aamoniyeeyo raku alolaka zimola khuuzela yoori: “Khahiyo mwinyi othuutu aari wiikhalakhaaye na olola zimola?” Akina khusala alupa yoori aari ye. Akina khusala alupa yoori: “Khahiyo, eetta olattanana.” Ila mweenyeweene khusala akhanyarela yoori: “Ti miiyo ena.”
10 Aphano khusala amuuzela yoori: “Afunuliwa toovi maasho awo?”
11 Mwinyi otule khuwaajipu yoori: “Mwinyi anitthiwaaye Yinsa eetheyiye mattophe, khuttha mmaasho mwaka na khukuuza olawa ojoosa okulaathayini ya Siloowe. Miiyo khulawa khujoosa apha kinoona.”
12 Yo khumuuzela yoori: “Ori vayi mwinyi aya oto?” Mwinyi otule khujipu yoori: “Akijuweeni.”
Mafwarizeewu animuuzela nanhooni
13 Khuthuuliwa mwinyi otule ahaari woonaaye khulawaniwa wa mafwarizeewu. 14 Siikhu Yinsa eetheyiyeeyo mattophe khufunulana maasho a mwinyi otule, yaari Saapatu. 15 Aphano mafwarizeewu khumuuzela theenya mwinyi otule nanna awahiyeezo woona. Mwinyi otule khujipu yoori: “Ye eettiye weetheya mattophe khuttha mmaasho mwaka miiyo khulawa khujoosa, apha kinoona.”
16 Mafwarizeewu akina khulupa yoori: “Mwinyi oto khahiyo wa Nluku, maana khanshitahi Saapatu.” Akina aya khusala oozela yoori: “Natwampi onretta nanna-ni alama nkhama epo zootikinisa?” Attaaphale khupuwavo ohisiilani.
17 Khurutela omuuzela otule ahaariwoonaaye yoori: “Khi weeyo onttela olupa niini monkoni wa oto aya, maana oofunula maasho awo?” Mwinyi otule khujipu yoori: “Ye napiyu.”
18 Mayaahuuti khaari okhupalela yoori ye khaari woonaka apha ti anwahaaye woona. Tiito khukhuweliwa apapaze. 19 Khuwoozela yoori: “Otu mwanenu othuutu mwaari onlupaaye yoori avokoliwa woohooni? Khi nanna-ni anoonaavo nasaapi ti?”
20 Apapaze khujipu yoori: “Fweeyo ninjuwa yoori otu mwanetthu na avokoliwa ari woohooni; 21 ila khanijuweeni nanna oniyeezo nasaapi eti na ntthu anfunuliyeeyo maasho khaninjuweeni. Mwimuuzele mweenyewe, hirimu eto ariina, onwahi onlupa.” 22 Apapaze aajipwiye toowo mwaasa wa owoova mayaahuuti; maana eettiye olupa yoori otule anttelaaye olupa yoori Yinsa ti Al-Masiihu, ontta wiikariwa nsinakooka. 23 Tiito apapaze alupiyeeyo yoori: “Khwa hirimu eto ariina, mwimuuzele mweenyewe.”
24 Khunkhuwela swaafu ya phiiri mwinyi otule ahaari woonakaaye khumuuza yoori: “Olaphe khwa Nluku na olupe haakhi. Maana najuwa yoori mwinyi aya oto natwampi.”
25 Mwinyi otule khujipu yoori: “Nkhama natwampi miiyo akijuweeni; etthu kinjuwaaye ti yoori miiyo akaari woona ila apha kinoona!”
26 Khumuuzela theenya yoori: “Oorettela niini? Ama oofunula toovi maasho?”
27 Mwinyi otule khujipu yoori: “Miiyo kawuuzani! Mweeyo khuhikisilezi. Mwaasa niini mwintakhelaaye osiila theenya? Na-mweyo mwintakha mwiiye anakhiyoni awe?”
28 Aphano khunttukhana na khulupa yoori: “Nakhiyoni awe ti weyo! Fweeyo na anakhiyoni a Munsa! 29 Fweeyo ninjuwa yoori Nluku attakhula na Munsa; ila mwinyi oto fweeyo wala khaninjuwa ohali alankhiyeewo.”
30 Mwinyi otule ahaari woonakaye khujipu yoori: “Eto etthu yootikinisa! Mweeyo khamwinjuwa ohali alankhiyeewo, ila akifunula maasho miiyo. 31 Ninjuwa yoori Nluku khaninsileza natwampi; ila olikha toowo, nkhama ntthu onimoova Nluku na khusala aretta matakhelo awe, oto Nluku ontta onsiila. 32 Tokhiya olumwenku wumpiwe khina hatha ntthu mmote ana siile yoori maasho a ntthu woovokoleliwa ohooni afunuliwa. 33 Eriwaka mwinyi oto khaari wa Nluku, khaari owahi oretta hatha etthu.”
34 Mayaahuuti khunjipu yoori: “Weeyo wavokoliwa ntwampi; onaaye makhaamu oonisomisa fweeyo?” Attaaphale khumwiikara.
Ohooni wa nroho
35 Yinsa khusiila yoori mwinyi otule eekariwa nsinakooka. Khulankha olawa omweekesa nonsikana khumuuzela yoori: “Weeyo oninkhupali Mwaana wa Pinaatamu?”
36 Ye khujipu yoori: “Mbwana, paani oto aya yoori na miiyo kinkhupali?”
37 Yinsa khumuuza yoori: “Weeyo wamoona ti othuutu onttakhulanaaye.”
38 Aphano mwinyi otule khulupa yoori: “Oo Mbwana, kookhupali!” Khunkokhorela.
39 Yinsa khuri: “Miiyo kata voolumwenku apha oteela ophuka, na yoori apale ahinoonaaye oone, apale anoonaaye azukuluwe eeye oohooni”.
40 Mafwarizeewu akina aya aari attaaphale nonsiila alupaka mattakhuzi apale khumuuzela yoori: “Talili na-fweyo khaninoona?”
41 Yinsa khuwaajipu yoori: “Eriwaka mweeyo mweettiye wiiya woohooni, khamwaari wiiyana paathwili ya twampi; ila apha wiiya mwinlupa yoori mwinwahi woona, paathwili yenu nalelo mwinaaye.”