18
Nlikaniso wa namaphuka wootakhala rooho
1 Yinsa khuwooza anakhiyoni awe nlikaniso mmote yoori aarina yoolompa woohilikheleli wala woohinyoonyeyi.
2 Ye khulupa yoori: “Sitati moote aariwo namaphuka mmote ahaari omoovaaye Nnyizinku, wala ahaari onshitahaaye ntthu.
3 Sitati ethiitile aariwo nunu mmote woofweliwa ti mannawe aalawiiyeeyo onvekela namaphuka otule araka: ‘Okaawanyele haakhi khwa muumani aka.’
4 Khunkatthalela wakathi mwinkeene, ila omwiisho waya khusala alupa nroho mwawe yoori: ‘Nakihimoovi Nnyizinku na ohinshitahi ntthu,
5 nunu otu aaza raku okantipu; kintta omwaawanyela haakhi na paathuli yoori ahirutele okiwuti.’ ”
6 Mbwana Yinsa khuvira alupaka yoori: “Mwisiileze saana etthu anlupaaye namaphuka otu woohiiyi wa shariya.
7 Nnyizinku khaniwaawanyela shariya ananthawuliwa awe apale aninvekelaaye nthana na osikhu, hatha nkhama Ye eetta orupaza owaajipu?
8 Kiniwuuzani yoori Ye oniwaawanyela shariya woohirupazi. Aphano Mwaana wa Pinaatamu wakathi anrutelaavo voolumwenku apha, onteela osikanavo amini?”
Nlikaniso wa mfwarizeewu na namariphisa lumpuru
9 Yinsa khulupa nlikaniso mmote awoozaka atthu apale aari ojoonaaye wiiya makhaamili khusala awaatarawu azaaya. Ye khuri:
10 “Alume awiri aaviriye Nnyupa wa Nnyizinku khusala alompa; mmote aari mfwarizeewu, nkina aari namariphisa lumpuru.
11 Mfwarizeewu ari wa weemela, aari olompa nkatthi-nkatthi araka: ‘Nnyizinku, miiyo kinuushukhurwela maana miiyo aki nkhama atthu, apale oheettetteli shariya, malatarawu anamararuwa, wala nkhama namariphisa lumpuru oto ariiye apho.
12 Miiyo kimfuka siikhu piiri wakhula sumana na kininkha zaakha khwa lifunku lakhuumi ya wakhula etile kimpatthaaye.’
13 Ila namariphisa lumpuru eemeliye peetiwene, ye hatha khaari wiinuwa yoori eekese otulu, ila ajipiyaka veefuwa aari ori: ‘Oo Nnyizinku koonele huruma, miiyo ki natwampi.’
14 Miiyo kiniwuuzani yoori, namariphisa lumpuru aalawiye owawe ari woohakikhiwa ti Nnyizinku, ila otule woojikhupali wala. Maana otule anjiwulisaaye ontta opushuwisiwa, ila otule anjipushuwisaaye ontta owulisiwa.”
Yinsa oniwaaparikhiya asimaana
15 Atthu akina khusala awaatiisa asimaana yoori asapiwe ti Yinsa. Ila anakhiyoni awe n'oowoona khusala awaamaruwela.
16 Ila Yinsa khuwaakhuwela asimaana apale araka: “Mwiwaalikhe asimaana akiteele miiyo, mwihiwaakhattaze; maana Ofwalume wa Nnyizinku pu waaya apale eeyiye nkhama asimaana.
17 Miiyo kiniwuuzani khweele yoori wakhula otule ahimpokherelaaye Ofwalume wa Nnyizinku nkhama nsimaana, khanteela weettamo.”
Thaajiri na Yinsa
18 Nttunkhulu mmote khumuuzela Yinsa yoori: “Mwanliimu woosaana, kirette niini yoori kipatthe ohaayi wa mileele?”
19 Yinsa khunjipu araka: “Mwaasa wa niini okikhuwelaka yoori woosaana? Khaavo ntthu woosaana woohiiyi Nnyizinku paasi.
20 Weeyo onjuwa mirumo za Nnyizinku: ohiraruwe, ohuule, ohiiye, wala ohilawele oshaahiti woovonyeya, onhishimu papaawo na mamaawo.”
21 Mwinyi otule khujipu yoori: “Waaza osimaana aka zooshi epo kinretta.”
22 Yinsa n'oosiila mattakhuzi apale khumuuza yoori: “Enuusaleela etthu moote. Wuuzanyise vitthu zawo zooshi nzurukhu aya owenkhe asikhini, toowo ontta wiiyana maali pinkuuni; nawiisha ote okilotte.”
23 N'oosiila mattakhuzi apale khwiiya woozinkuwa venkivene, mwaasa yoori ye aari thaajiri nwulweene.
24 Yinsa n'oomoona yoori azinkuwa khulupa yoori: “Nanna enlipaazo thaajiri weetta muufwalume wa Nnyizinku!
25 Ti yookhweya enkamiiya ovira valiphotto la sikano zayita thaajiri weettamo muufwalume wa Nnyizinku.”
26 Apale aari onsiilaaye khumuuzela yoori: “Nkhama pi toowo, paani anwahaaye wuusurukha?”
27 Yinsa khujipu yoori: “Etile pinaatamu ahinwahaaye Nnyizinku onwahi.”
28 Aphano Pheeturu khumuuza Yinsa yoori: “Woone! Fweeyo nalikha vitthu zetthu zooshi, khusala nuulotta.”
29 Yinsa khujipu araka: “Miiyo kiniwuuzani khweele yoori, wakhula otule anlikhaaye nyuupa yawe ama muukhaawe, ama attwiize ama apapaze, ama aanaawe mwaasa wa Ofwalume wa Nnyizinku,
30 oto onteela opokhera venkivene vathi attaapha, na omwiisho waya apokhere ohaayi wa mileele.”
Yinsa oniwooza anakhiyoni awe ofwa na osisimuwa wawe
31 Yinsa khuwaakhuwelela othetekele anakhiyoni awe apale khumi na awiri khuwooza yoori: “Mwisiileze! Apha nintta Yeruzaleemu, ottuukho zinttelaawo orettikhana zooshi epile zaatikhiweeyo pi manapiyu monkoni wa Mwaana wa Pinaatamu.
32 Ye onttela winkheleliwa mmakhono wa amalapo, antheye, anveyise, antthemele,
33 anjaphe na amuule. Ila siikhu yattaatthu onttela osisimuwa.”
34 Anakhiyoni awe khuhiweeleyi mattakhuzi aya apale maana aari oovitheya, yo khuhijuwi etthu aari olupaaye.
Ovonisiwa wa ntthu woohooni wa Yeriko
35 Yinsa asaleelaka ofiya Yeriko, mwinyi mmote woohooni eekhaliye nshini wa tarikhi alolaka zimola.
36 N'oosiila shintto za atthu aari oviraaye, ye khuuzela etthu yaari orettikhanaaye.
37 Khuuziwa yoori: “Yinsa wa Nazareeti ti ye anviraaye.”
38 Aphano ye khusala akhuwa araka: “Yinsa, Mwaana wa Daawuuda, koonele huruma!”
39 Atthu apale aari oviraaye khusala ammaruwela yoori anyamale, ila ye khusala atepa okhuwa araka: “Yinsa, Mwaana wa Daawuuda, koonele huruma!”
40 Aphano Yinsa khweemela khuruma yoori atiiseliwe mwinyi otule. N'ootiiseliwa khumuuzela yoori:
41 “Ontakha yoori kuurettele niini?”
Ye khujipu yoori: “Mbwana, kintakha kirutele woona.”
42 Attaaphale Yinsa khumuuza yoori: “Ona! Amini yawo yoovonisa.”
43 Nasaapiru ye khurutela woona, khusala anlotta Yinsa ansifwaka Nnyizinku. Wakathi atthu ooniyeevo etile yaarettikhaniyeeyo, khunsifu Nnyizinku.