24
Opwechiwa wa Nyuupa Woosifwiwamo
1 Yinsa khusaruwa Nnyupa Woosifwiwamo, khusala alawa, anakhiyoni awe khumwaattama yoori anthoonyeze manyupa apale ooshapweya.
2 Yinsa khuwooza yoori: “Mweeyo mwinoona ooshi apa? Weekhweele miiyo kiniwuuzani yoori khalinsalavo apha liwe vatulu wa liwe lihinttelaaye opwechiwa.”
Alama za mwiisho wa wakathi
3 Wakathi Yinsa eekhaliyeevo va mwaako Oluveera, anakhiyoni khulawa khwiitthaalana othetekele na khunvekela yoori: “Nkanuuze, zinttela orettikhana lini vitthu zaya epo, wala amana otaaka, alama-ni enttelaaye wiiyavo na alama-ni ya mwiisho wa olumwenku?”
4 Ye khuwaajipu yoori: “Phoole, ti ahiiyevo hatha ntthu anttelaaye wuuttettekhani!
5 Maana atthu awaatta anlawa ate khwa nzina laka, alupaka yoori: ‘Miiyo ki Al-Masiihu’ na owaattettekha atthu awaatta.
6 Amana mwisiila hapari za viittha ama nzuuzu la viittha, mwihoove.
7 Khapila enttela wuumanana khapila kiina, ofwalume na ofwalume nkina, enttela opuwa esikinyaatthi na jala phantte zawaatta.
8 Zooshi epo yaazo ya vitthu za olwaaza.
9 Aphano yo anteela owinkhelelani yoori mwilupatthiwe na muuliwe, mwinlawa mweeniwe ti khapila zooshi mwaasa wa nzina laka.
10 Wakathi aya opo, atthu awaatta anteela wanswi amini anttela wiiya anamazinkula, na wiinana mmote na nzaawe.
11 Anlawa apuwe manapiyu awaatta oojipanka na awaattettekhe atthu awaatta.
12 Vitthu zootakhala zinttela weekezeleya, na pheta ya atthu awaatta enttela ovukuwa.
13 Ila otule anttelaaye ovilela mpakha mwiisho ontta wuusurukha.
14 Enttela olaleyiwa hapari epi za Ofwalume wa Nluku olumwenku wooshi, nkhama oshaahiti khwa khapila zooshi aphano osala ota mwiisho.
Ohoowa nwuulweene
15 “Mwinteela woona okufuru wa woopisa wa pala onttelaaye opuwa Puuro Ttakatthiifu, etile alupiyeeyo napiyu Daniyeele - osome na eweeleye.
16 Aphano apale anttelaaye wiiya Yudeya atthirele omwaako.
17 Otule anttelaaye wiiya vatulu wa nyuupa ahishukhe yoori alazemo etthu nnyupa mwawe,
18 na otule anttelaaye wiiya omashapa ahirutele onti weettela ajapi yawe.
19 Siikhu etile ti ya woopisa khwa apale awiimittha na anaamwisaaye.
20 Mwilompe yoori miswipa epo ehirettikhane mwiita ama jumwa-monsi.
21 Maana wakathi aya opo onlawa wapuwe ohoowa nwulweene, thanku mwanzo wa olumwenku, na khunteela opuwa nkina nkhama otthuupo.
22 Eriwaka wakathi aya opo wa ohoowa khawaavukuliwe, khina aari weettelaaye wuusurukha, ila mwaasa wa apale oothawuliwa, siikhu zaya epo enttela wiiya zoovukuliwa.
23 Aphano amana ntthu awuuzani yoori: ‘Otu ari apha Al-Masiihu!’ ama: ‘Otule ari okhule!’ mwihinkhupalele.
24 Maana anlawa apuwe a al-Masiihu oojipanka na manapiyu oojipanka anttelaaye oretta alama khulukhulu na vitthu zootikinisa yoori awaahate hatha apale oothawuliwa.
25 Miiyo kawuuzani khapula zihinarettikhane epo zaya.
26 Nakataalikha, amana muuziwa yoori: ‘Ori n'yaara,’ mwihilawe, ama oriwa: ‘Ori nnyupa,’ mwihikhupali.
27 Maana, nkhama etthiipo taari enlankhaaye malawa-juwa, na ojithoonyeza okhu lintupweelaawo njuwa, etthiipo onttela wiiya ota wa Mwaana wa Pinaatamu.
28 Vahali aniiyaavo muufwi, akhwaazi ankusanyeya attaapho.
Ota wa mwaana wa Pinaatamu
29 Paata ya mashakha a siikhu epo, njuwa linttela ozima na mweezi onttela olikha waara, matthottowa anttela okwa otulu na owahi wa pinkuuni onttela osakhinyeya.
30 Aphano epuwe pinkuuni alama za Mwaana wa Pinaatamu; khapila zooshi za vatuniya enttela ojikhupanyisa na enttela omoona Mwaana wa Pinaatamu ataaka mmawiku a pinkuuni khwa owahi na siifwa yawaatta.
31 Ye onttela operekha malayikha awe na ovuma nwulweene wa malope, yo anttela owaakusanya ananthawuliwa aya ooshi khwa phantte nne zinlankhaawo pheevo, phantte khwa phantte kiina ya pinku.
Nlikaniso wa nfikeera. Ohirimiziwa monkoni wa ojeekesela
32 Mwijinozele osomisa wa nfikeera: Amana virapi zaya zootthelaka mathapa mwinjuwa yoori onsaleela ofiya mwiita.
33 Etthiipo na mweeyo, amana moona vitthu epo zooshi, mwijuwe yoori wakathi wafiya, ensaleela waaza.
34 Weekhweele kiniwuuzani yoori, khanteela ovira atthu apa aleelo zihirettikhaneene vitthu zaya epo.
35 Pinku na vathi zooshi zinteela ovira, ila mattakhuzi aka khanviraru.
Siikhu na wakathi khijuweyeeni
36 Ila monkoni wa siikhu na wakathi khina anjuwaaye, wala malayikha a pinkuuni, wala Mwaana, ila Paapa paasi.
37 Nkhama etthiipo zaarettikhaniyeeyo wakathi wa Nuuhi, enttela wiiya etthiipo etelo ya Mwaana wa Pinaatamu.
38 Nkhama etthiipo siikhu ziviriyeezo za nnyeri, atthu aari oja na aari onywa, aari oralana na aari oloozana, mpakha ofiya siikhu Nuuhi eettiyeemo mmwaaraka.
39 Yo kaajuwiyevo hatha etthu mpakha wakathi otiiyeevo nnyeri na khuwaathuula ooshi. Enttela wiiya etthiipo ota wa Mwaana wa Pinaatamu.
40 Aphano awiri anttela wiiya omashapa; mmote athuuliwe, alikhiwe mmote.
41 Aakha awiri achilaka tiriku; mmote athuuliwe, mmote alikhiwe.
42 Mwaasa wa ethiito, mwijeekesele, maana khamwinjuwa siikhu anttelaaye ota Mbwana enu.
43 Ila eweeleyeni vitthu zaya epo; maana, mweenyewe nyuupa eriwaka eetta ojuwa wakathi antaavo anamwiiya, eetta ojeekesela na khaari olikhelela opwechiwa nyuupa yawe.
44 Tiito, mweeyo theenya mwiiye woojilikanisa, maana wakathi antaavo Mwaana wa Pinaatamu pi opule mwihinaakhipwelaaye.
Karumeya wawaamineya na karumeya woohaamineyi
45 “Ti tuuvi karumeya wawaamineya na waakhili, otule Mbwana awe amwinkhiyeeyo osala vaje vawe yoori asala awenkha atthu etthu-yoojiwa wakathi khaamili?
46 Wooparikhiyiwa karumeya otule mbwana awe ataaka anttelaaye onsikana arettaka etthiipo.
47 Weekhweele kiniwuuzani yoori onttela olikheliwa weettettisa maali zooshi za mbwana awe.
48 Ila karumeya otule amana eeya wootakhala rooho, ajilupezaka mweenyewe yoori: ‘Mbwana aka ontta orupaza,’
49 na khusala awaapiya ashirikhaawe na oja na onywa na ananhapaliwa,
50 onttela ota mbwana wa karumeya otule khwa siikhu ahaari waakhipwelaaye na wakathi ahinjuwaaye.
51 Ye onta onhukhumu saaneene antthe puuro ya manaafikhi, ottuukho onttelaaye wiiyawo olila na oluma meeno.