26
Shawuri za otakha wuuliwa Yinsa
1 Paata ya olupa vitthu epile, Yinsa khuwooza anakhiyoni awe yoori:
2 “Nkhama mwinjuwaazo, ensaleela siikhu piiri ofiya siikhu ya njampo la Paashikowa, na Mwaana wa Pinaatamu onttela winkheleliwa yoori akhomeliwe.”
3 Aphano mahaakhimu a tiini na attunkhulu a tiini khukusanyeya onyuupa wa haakhimu nwulu aari wiitthiwaaye Kayifwa;
4 khuwaza shawuri yoori ankhole Yinsa sirini na amuule.
5 Ila khusala alupa yoori: “Nihirette wakathi wa njampo yoori atthu ahipuwise nzuzu.”
Yinsa onvaaziwa mafuttha oonukhela nti wa Betaaniya
6 Yinsa eettiye Betaaniya, owawe Simawu otule raku aariinaaye makuttula.
7 Aphano muukha mmote khuta aphale aariivo Yinsa athuuliye suupha ya mafuttha oonukhela awaatta nzurukhu, khwiitthela eeshwa ya Yinsa wakathi ansikaniyeevo eekhaliye vameeza.
8 Anakhiyoni ooniyeevo vitthu epile khushanka na khuri: “Mwaasa aya niini oharipwaka mafuttha apa?
9 Mafuttha apa ahoozanyisiwe, nzurukhu aya enkhiwa asikhini!”
10 Ila Yinsa ajuwiyeevo etthu aari olupaaye, khuri: “Mwinimwantipwelani muukha otu? Ye aretta etthu yooshapweya khwa miiyo.
11 Maana asikhini aniiya vamote na mweeyo wakhula siikhu, ila miiyo wala.
12 Mafuttha apa eettheliyeeyo mwiili aka, ye aretta khwa ontthenkeza ozikhiwa waka.
13 Kiniwuuzani khweele yoori: Wakhula vahali entafusiriwaavo hapari zooshapweya khwa olumwenku wooshi, epi arettiyeeyo muukha otu, zeettaka olupiwa noofikhiriwa ye.”
Yuuda oninzinkula Yinsa
14 Aphano mmote wa apale khumi na awiri, aariwitthiwaaye Yuuda Eshikariyoote, khulawa okutthanana mahaakhimu a tiini.
15 Khuwoozela yoori: “Mwinikiripha kavi amana miiyo kiwinkhelelani?” Yo khusiilana onripha nzurukhu talaathiini wa feeta.
16 Waaza wakathi otthuupule Yuuda khusala eekesaka nanna ya omwinkhelela Yinsa mmakhono wa maatuwi awe.
Anakhiyoni antthenkeza njampo la paashikowa
17 Siikhu ya mwanzo ya Njampo la Phaawu Yoohiina Fwaramento, anakhiyoni khumwaattama Yinsa khumuuzela yoori: “Ontakha yoori nitthenkeze vayi etthu-yoojiwa ya Paashikowa?”
18 Yinsa khujipu yoori: “Mwilawe nsitati mwakutthanane mwinyi mmote mwimuuze yoori: ‘Mwaaliimu alupa yoori: Wakathi aka onsaleela ofiya. Kinttela onja Paashikowa na anakhiyoni aka vaje vawo.’ ”
19 Anakhiyoni khuretta etthiipile ooziweezo ti Yinsa na khuntthekeza Paashikowa.
20 Weettelaka oripa, Yinsa khulawa khwiikhala vameeza na anakhiyoni awe apale khumi na awiri.
21 Eettaka oja, khulupa yoori: “Kiniwuuzani khweele, mmote wa mweeyo onlawa akizinkule.”
22 Yo khwiiya oohuzunikha channu na khwaaza wuuzelana yoori: “Weekhweele khahiyo miiyo Mbwana?”
23 Yinsa khujipu yoori: “Nlupa anttelaaye okizinkula kinjana sahani moote.
24 Mwaana wa Pinaatamu onlawa afwe, nkhama etthiipo yaatikhiweeyo monkoni wa ye. Ila wootakhaliwa ti otule anttelaaye onzinkula Mwaana wa Pinaatamu! Afwataali ahivokoliweeni.”
25 Aphano Yuuda, namazinkula, khuri: “Talili ti miiyo Mwaaliimu? Yinsa khujipwela araka: “Ayo, ti weeyo.”
Njampo la Mbwana
26 Eettaka oja, Yinsa khuthuula phaawu, khuparikhiya, khumeya na khuwenkha anakhiyoni awe araka: “Mwithuule na mwirafune; opu mwiili aka”.
27 Elottelanaka khuthuula jiikira, khushukhurwela na khuwenkha araka: “Mwinywe mooshi mweeyo.
28 Eti taamu yaka ya wahati yiitthiweeyo khwa zwaamu ya atthu awaatta yoori eswaamiheliwe twampi.
29 Miiyo kiniwuuzani yoori, waaza nasaapi mpakha okho ninttaawo, akinlawa onywa nshumo wa nrayi wa wuuva mpakha siikhu kinttelaaye onywa theenya nshumo wa nrayi wa wuuva na mweeyo muufwalume wa Paapa.
30 Paata ya yo wiipa liipo limote, khusala alawa omwaako Oluveera.
Yinsa onlupa yoori Pheeturu onteela onkhana
31 Aphano Yinsa khulupa yoori: “Osikhu opu, mooshi mweeyo mwinteela okitthira. Maana yaatikhiwa yoori: ‘Kininvulalisa nshuki, pwittipwitthi za liphanko lawe zimwazeye.’
32 Ila paata ya osisimuwa waka, kinttela olokoza Kalileya.”
33 Pheeturu khujipu yoori: “Hatha nkhama ooshi eetta wuutthira, miiyo akinteela wuutthira.”
34 Yinsa khumuuza araka: “Weekhweele kiniwuuza yoori osikhu otthuupu, likukhuwi lihineekhe, weeyo onlawa wakikhane swaafu ttatthu.”
35 Pheeturu khujipu theenya yoori: “Hatha nkhama ofwa vamote na weeyo, akinteela wuukhana!” Anakhiyoni ooshi khulupa etthiipo.
Yinsa nwoorotha wa Yetemaani
36 Aphano Yinsa khulawa na anakhiyoni awe puuro eniitthiwaaye Yetemaani khuwooza yoori: “Mwiikhale apha, miiyo kinttela olompa aphale.”
37 Khunthuula Pheeturu na aana awiri a Zepeteewu, Yinsa khwaaza ohuzunikha na othunkuwikha.
38 Yinsa khuwooza yoori: “Nafusi yaka ti ya ohuzunikha venkivene, woosaleela ofwa. Apho mwisale apha na nijeekesele fooshi.”
39 Khususa vattitthiiru, khukokhora khufiisa ajihi yawe vathi, khusala alompa araka: “Paapa, nkhama enwaheya, okaattuwanize jiikira eti ya ohoowa; ila ehirettikhane nkhama kintakhaazo, ila nkhama ontakhaazo.
40 Paata ya toole, khurutela aphale aariivo anakhiyoni awe khuwaasikana eettaka olala. Yinsa khumuuzela Pheeturu yoori: “Mweeyo khamwiwaheeni nenkawu ojeekesela fooshi wakathi mmote paasi?
41 Mwijeekesele na mwilompe yoori mwihikwele muuzayiniwa. Rooho ti yookhomaala ila mwiili pi woottettheya.”
42 Khurutela olawa olompa theenya khuri: “Paapa, nkhama khinwaheya okattuwananisa jiikira eti khapula kihinyweeni, ti arettikhane matakhelo awo.”
43 Wakathi arutiyeevo theenya khuwaasikana eettaka olala, maana maasho aya eetta owaalemela.
44 Aphano khuwaalikha theenya, khulawa olompa swaafu ya ttaatthu, alupaka mattakhuzi atthaapale.
45 Nawiisha khurutela attaaphale aariivo anakhiyoni awe na khuwoozela yoori: “Mweeyo nalelo mwintta olala na wiitthuuwa? Wafiya wakathi! Moone yoori Mwaana wa Pinaatamu onttela winkheleliwa mmakhono wa anatwampi.
46 Mwilankhe, nilawe; oto antaaye apho namazinkula!
Okholiwa wa Yinsa
47 Eettaka ottakhula etthiipile, khuta Yuuda, mmote wa apale khumi na awiri, vamote na khuntti khuluyeene athuuliye phanka na puutta, zaaperekhiweeyo ti mahaakhimu a tiini na attunkhulu a tiini.
48 Namazinkula aawenkhiye alama apale aasiilananiyeeyo araka: “Otule kinttelaaye ompatikha ti othuuto, mwinkhole.”
49 Wakathi Yuuda aari omwaattamaavo Yinsa khuri: “Salaama, Mwaaliimu!” Na khumpatikha.
50 Yinsa khumuuza yoori: “Swaahipu, etile oteeliyeeyo oretta, waakuve orette”. Attaaphale khususeliwa, khukholiwa Yinsa khufukiwa.
51 Mmote wa apale aarina Yinsa khookola nkhono khuthuula phanka khushija nshiilo la karumeya wa haakhimu nwulu wa tiini.
52 Aphano Yinsa khuwooza anakhiyoni awe yoori: “Mwipwehe phanka! Maana wooshi otule anlipanaaye phanka, ofwa khwa phanka ethiito.
53 Mweeyo mwinoona yoori miiyo akinwahi onvekela Paapa khukiperekheza nasaapi khuntti khumi na piiri za malayikha?
54 Nkhama etthiipo enlupaaye Zawaatikhiwa Ttakatthiifu yoori vitthu zaarina ya orettikhana nkhama etthiipi?”
55 Wakathi otthuupule Yinsa khuwoozela atthu apale yoori: “Mwateela okikhola na phanka na puutta, nkhama nlokozi wa anazompere? Siikhu zooshi miiyo kaari osomisa Nnyupa Woosifwiwamo, khi mweeyo ohikikholi!
56 Ila zooshi epi zarettikhana yoori emarisele zawaatikhiwa za manapiyu. Aphano anakhiyoni ooshi khumwanswi na khuntthira.
Yinsa vakatthi wa mashawuriiya
57 Apale ankholiyeeyo Yinsa khunthuula khunlawana wa Kayifwa, haakhimu nwulu wa tiini ottuukho aakusanyeyiyeeyo anamanozela a kano na attunkhulu a tiini.
58 Pheeturu eetta owaalotta peetiwene mpakha vaje wa haakhimu nwulu wa tiini, khuvira khwiikhala na anamweekesela yoori oone zooshi nanna zaari weettelaaye wiishela.
59 Mahaakhimu a tiini na mashawuriiya ooshi aari weekesa oshaahiti woovonyeya khwa Yinsa yoori anhukhumwele ofwa.
60 Ila khuhinsikanani, aapuwiye-ru atthu awaatta oolaza oshaahiti woovonyeya. Omwiisho khujithoonyeza atthu awiri,
61 khulupa yoori: “Mwinyi otu alupa yoori: ‘Miiyo kinwahi opwecha Mwimpari Nluku na khujeka khwa siikhu ttatthu.” ’
62 Aphano haakhimu nwulu wa tiini khulankha khumuuza Yinsa yoori: “Khunjipu epo onlupeziwaaye?”
63 Ila Yinsa nalelo khwiiya woonyamala. Haakhimu nwulu wa tiini khumuuza yoori: “Kinuuvekela yoori weeyo olaphe khwa Nluku woohaayi, nkhama weeyo o Al-Masiihu, mwaana wa Nluku, onuuze.”
64 Yinsa khujipu yoori: “Weeyo walupa. Ila miiyo kiniwuuzani mooshi mweeyo yoori: enttela ofiya siikhu mwinttelaaye omoona Mwaana wa Pinaatamu eekhaliye nkhono nlume wa nwahi zooshi, ataaka khwa mawiku a pinkuuni.
65 Aphano wakathi haakhimu nwulu wa tiini avaruliyeeyo kuwo zawe na khulupa yoori: “Akufuru! Mwaasa wa niini nihithajiyaka oshaahiti nkina theenya? Mweeyo mwasiila nasaapi okufuru wawe!
66 Mwinuupuwela toovi?” Khujipu yoori: “Oninsuhi ofwa!”
67 Akina khusala antthemela omaasho na ompiya, akina khusala ampwakula araka:
68 “Onlupe, Oo Al-Masiihu, ti paani oopiyeeyo?
Pheeturu oninkatthala Yinsa
69 Pheeturu eettiye wiikhala vaje. Njaazi mmote khumwaattama khumuuza yoori: “Na-weyo waari na Yinsa nkalileya.”
70 Ila ye khukhana vakatthi wa atthu ooshi araka: “Akinjuwa etthu onttakhulaaye.”
71 Paata ya toole khuthoonya phantte ya omilako, njaazi nkina khumoona khuwooza apale aari attaaphale yoori: “Mwinyi otu aari na Yinsa wa Nazareeti.”
72 Ye khukhana theenya khwa olapha araka: “Akininjuwa mwinyi aya otu!”
73 Elottelanaka, apale aari attaaphale khumwaattama Pheeturu khumuuza yoori: “Weekhweele weeyo o wawe! Ottakhula wawo onthoonyeza.”
74 Attaaphale ye khwaaza ojilaani na olapha araka: “Akininjuwa!” Nasaapiru likukhuwi khwiikha.
75 Aphano Pheeturu khufikhiri nttakhuzi ooziweeyo ti Yinsa yoori: “Likukhuwi lihineekhe onteela okikhana swaafu ttatthu.” Noolaavo aphale vaya khulila wakatapuvo.