10
Ãcõrẽba ad̶ichichi diabued̶a
1-2 Maʌ̃be Ãcõrẽba Moisea jarasia:
–Mʌ̃a Egiptod̶ebema borora, dji dromarã sid̶a so zarea b̶ʌsia ne ununacada ãdjirã tãẽna oi carea. Mãwãra bãrã warrarãa, bãrã wiuzaquerãa bid̶a nẽbʌrʌd̶ia sãwã maʌ̃ ne ununacad̶eba mʌ̃a unubisida egiptorãra siriẽ́ b̶eada. Mãwã bãrãba cawad̶ia mʌ̃drʌ Ãcõrẽda. Jãʌ̃be Egiptod̶ebema boromaa jarad̶e wãdua mʌ̃a ad̶ichichida zocãrã idji druad̶e b̶aebida.–
3 Ara maʌ̃da Moisera Aaroʌ̃ sid̶a Egiptod̶ebema boromaa wãnaped̶a nãwã jarasid̶aa:
–Dai hebreorã Ãcõrẽba nãwã jara b̶ʌa: “¿Bʌa sãʌ̃bebʌrʌ mʌ̃ra wayai? Mʌ̃ purura idu wãbidua mʌ̃́a animarãda babue diad̶amãrẽã.
4 Baribʌrʌ mʌ̃ puruda idu wãbiẽ́bʌrʌ, nu mʌ̃a ad̶ichichida bʌ druad̶e zocãrã b̶aebiya.
5 Maʌ̃ne bʌ druara ad̶ichichiba jũma biraya. Egorora ab̶ed̶a poya ununaẽ́a. Maʌ̃ ad̶ichichiba bãrã néu hieloba ãrĩnaẽ́ra jũma cod̶ia. Bacuru quedua sid̶a bãrã ẽjũãne ad̶ichichiba jũma cod̶ia.
6 Bʌ dera, dji dromarã dera, jũma waabema egiptorã de sid̶a ad̶ichichiba biraya. Bãrã drõã naẽnabemarãba, bãrã zeza bid̶a ununaca basía ad̶ichichira naʌ̃ quĩrãca b̶aebʌrʌda. Naʌ̃ druad̶e jũẽped̶ad̶a ewarid̶eba wad̶ibid̶a naʌ̃ quĩrãca ununacaa.”–
Moiseba Egiptod̶ebema boroa mãwã jaraped̶a wãsia.
7 Maʌ̃be Egiptod̶ebema dji dromarãba dji boroa jarasid̶aa:
–¿Bʌa wad̶ibid̶a jãʌ̃ ẽberãa idu dadjirãra mĩã sẽbi b̶aica? Israelerãra idu wãbidua ãdji Ãcõrẽa animarãda babue diad̶amãrẽã. ¿Bʌa wad̶ibid̶a adua b̶ʌca Egipto druara jũma ãrĩbʌrʌda?–
8 Maʌ̃be Egiptod̶ebema boroba Moisera Aaroʌ̃ sid̶a wayacusa trʌ̃biped̶a nãwã jarasia:
–Bãrã Ãcõrẽa animarãda babue diad̶e wãnida panʌa. ¿Baribʌrʌ bãrãra jũmasãwã wãni?–
9 Moiseba panusia:
–Dairãra jũma wãnia. Warra zaquerãra, drõãrãra, dai warrarãra, dai caurã sid̶a wãnia. Dai animarã sid̶a eded̶ia. Dairãra jũma wãnia Ãcõrẽa animarã babue diad̶i bẽrã.–
10-11 Baribʌrʌ Egiptod̶ebema boroba panusia:
–Mãwãẽ́a. Ebud̶a b̶ʌa bãrãba biẽ́ o quĩrĩã panʌda. Ãcõrẽba bãrãra careba b̶ʌad̶a a panʌa. Baribʌrʌ mʌ̃a bãrãra warrarã bara idu wãbiẽ́a. Ab̶abe drõãrãda wãnida panʌa Ãcõrẽa animarãda babue diad̶i carea. ¿Maʌ̃drʌ bãrãba iwid̶i panʌẽ́ca?–
Maʌ̃be Egiptod̶ebema boroba Moisera Aaroʌ̃ sid̶a idji quĩrãpitabemada ãyã jʌretabisia.
12 Ãcõrẽba Moisea jarasia:
–Bʌ jʌwara naʌ̃ Egipto druad̶e wadua ad̶ichichida zocãrã b̶aemãrẽã. Mãwã jũma Egipto druara ad̶ichichiba biraya. Maʌ̃ ad̶ichichiba jũma chirua hieloba ãrĩnaẽ́ra cod̶ia.–
13 Ara maʌ̃da Moiseba idji jʌwad̶e erob̶ʌ bacurura Egiptod̶e wasia. Maʌ̃ne Ãcõrẽba nãũrãda ʌ̃mãdau odjabariareba tʌbisia. Ãsa, diamasi bid̶a Egipto druad̶e tʌ nũmasia. Maʌ̃ nãũrãba nurẽma diaped̶a ad̶ichichida zocãrã b̶aebisia.
14-15 Maʌ̃ne jũma Egipto druara ad̶ichichiba birasia. Ab̶ed̶a egorora poya ununaca basía. Maʌ̃ ewari naẽna ad̶ichichira maʌ̃ quĩrãca Egipto druad̶e ununaca basía idjab̶a waa maʌ̃ quĩrãca ununaẽ́a. Hieloba ãrĩnaẽ́ chiruara, nejõ b̶ea sid̶a ad̶ichichiba jũma cosid̶aa. Jũma Egipto druad̶e chiruada, bacuru quedua sid̶a ab̶ed̶a neẽ́ b̶esia.
16 Maʌ̃be Egiptod̶ebema boroba Moisera, Aaroʌ̃ sid̶a isabe trʌ̃biped̶a nãwã jarasia:
–Id̶ibʌrʌ bãrã Ãcõrẽ quĩrãpita, bãrã quĩrãpita bid̶a mʌ̃a biẽ́ osia.
17 Maʌ̃ bẽrã mʌ̃a bãrãa bed̶ea djuburiaya mʌ̃a biẽ́ od̶ada quĩrãdoad̶amãrẽã. Idjab̶a bãrã Ãcõrẽa iwid̶id̶adua naʌ̃ ad̶ichichira mʌ̃ druad̶e jõbimãrẽã. Mãwã od̶aẽ́bʌrʌ dairãra jarrababa quininia.–
18 Ara maʌ̃da Moisera Egiptod̶ebema boromaʌba ẽdrʌped̶a Ãcõrẽa iwid̶isia.
19 Iwid̶ibʌrʌd̶e Ãcõrẽba nãũrãda dji cãbãyã ʌ̃mãdau b̶aebariareba tʌbisia. Maʌ̃ nãũrãba ad̶ichichira Pusa Purru abadad̶e jũma b̶atabuesia. Ab̶ed̶a ad̶ichichira Egipto druad̶e ni ab̶a bid̶a b̶eẽ́ basía.
20 Baribʌrʌ Ãcõrẽba Egiptod̶ebema borora so zarea b̶ʌd̶a bẽrã idjia israelerãra idu wãbiẽ́ basía.
Ãcõrẽba ewari quibid̶a
21 Maʌ̃be Ãcõrẽba Moisea jarasia:
–Bʌ jʌwara ʌ̃taa bajãnaa wadua. Maʌ̃ne ewarira qui dogoya. Jũma Egipto druad̶e ab̶ed̶a pãĩsosoa nũmeya.–
22 Ara maʌ̃da Moiseba idji jʌwara ʌ̃taa bajãnaa wasia. Maʌ̃ne ewarira qui dogoped̶a ewari ũbea Egipto druad̶e bio pãĩsosoa nũmesia.
23 Maʌ̃ ewari ũbead̶e ni ab̶aʌda idji diguid̶aʌba poya ãyã wãnaẽ́ basía. Ni ãdji caita b̶ea sid̶a poya ununaẽ́ basía. Baribʌrʌ israelerã panʌma ʌ̃na b̶asia.
24 Maʌ̃be Egiptod̶ebema boroba Moisera trʌ̃biped̶a nãwã jarasia:
–Bãrãra bãdji warrarã bara wãnida panʌa Ãcõrẽa animarãda babue diad̶i carea. Baribʌrʌ bãrã animarãra amenida panʌa.–
25 Moiseba panusia:
–Mãwãẽ́a. Bʌa dai animarãra idu edebida b̶ʌa ʌ̃cʌrʌ dai Ãcõrẽa bea diad̶ida panʌ bẽrã idjab̶a ʌ̃cʌrʌ idjía babue diad̶ida panʌ bẽrã.
26 Maʌ̃ bẽrã dai animarã sid̶a eded̶ia. Ni ab̶a bid̶a amenaẽ́a. Dai animarãnebemada ʌ̃cʌrʌ dai Ãcõrẽa babue diad̶ida panʌmĩna ara nawena adua panʌa sãʌ̃gʌdrʌ mãwã od̶ida panʌda. Araa jũẽped̶ad̶acarea cawad̶ia.–
27 Baribʌrʌ Ãcõrẽba Egiptod̶ebema borora so zarea b̶ʌsia. Maʌ̃ bẽrã Egiptod̶ebema boroba israelerãra idu wãbiẽ́ basía.
28 Maʌ̃ne idjia Moisea jarasia:
–Mʌ̃ quĩrãpitabemada ãyã wãdua. Mʌ̃maa waa zerãdua. Bʌda mʌ̃maa zeibʌrʌ, mʌ̃a bʌra beaya.–
29 Moiseba panusia:
–Bia b̶ʌa. Mʌ̃ra bʌmaa waa zeẽ́a.–