17
Ãcõrẽba mõgarad̶eba baido zebid̶a
1 Maʌ̃be israelerãra ẽjũã põãsa ewaraga b̶ʌ Siʌ̃ abadad̶eba jũma wãbʌrʌsid̶aa. Wãnane Ãcõrẽba cawabibadjia sãma wãnida panʌda idjab̶a sãma cãĩnida panʌda. Maʌ̃ne Repidiʌ̃ abadama jũẽne wãsid̶aa. Baribʌrʌ mama baidora neẽ́ basía dod̶i carea.
2 Maʌ̃ bẽrã ãdjirãba quĩrũbid̶eba Moiseda biẽ́ jarasid̶aa:
–Bʌa dairãa baidora diaida b̶ʌa dod̶i carea.–
Maʌ̃ne Moiseba ãdjirãa jarasia:
–¿Cãrẽ cãrẽã jãwã mʌ̃́a biẽ́ bed̶ea panʌ? ¿Ãcõrẽba sãwã oi cawaya jãwã panʌca?–
3 Baribʌrʌ israelerã opichia panʌ bẽrã quĩrũbid̶eba Moisea jara duanasia:
–¿Cãrẽ cãrẽã dairãra Egiptod̶eba ẽdrʌ enesi? Dairãra, dai warrarãra, idjab̶a dai animarã sid̶a opichiaba jũma quininia.–
4 Maʌ̃ne Moiseba Ãcõrẽa quĩrã djuburiada nãwã iwid̶isia:
–Mʌ̃a naʌ̃ ẽberãrãra ¿sãwã oi? Mʌ̃a isabe baidoda diaẽ́bʌrʌ ãdjirãba mʌ̃ra mõgaraba tab̶ari bead̶ia.–
5 Ãcõrẽba panusia:
–Israelerã duanʌmaʌba nocod̶aa wãdua. Israelerã bororãda bʌ ume ededua. Idjab̶a bʌ bacuru Egiptod̶e Nilo dod̶e tawed̶ara bʌ jʌwad̶e ededua. Maʌ̃be wãnadua Horeb eyad̶aa.
6 Mama mõgara waib̶ʌa b̶ʌda ununia. Mʌ̃ra ara maʌ̃ mõgara ʌ̃rʌ̃ b̶aya bʌ carebai carea. Bʌ bacuruba maʌ̃ mõgarara udua. Ara maʌ̃da baidora wea dogoya israelerãba dod̶amãrẽã.–
Ara maʌ̃da Moiseba israelerã bororã quĩrãpita Ãcõrẽba jarad̶a quĩrãca osia. Maʌ̃ne baidora wea dogosia jũma israelerãba dod̶amãrẽã.
7 Israelerã baido neẽ́ pananama Moiseba trʌ̃ b̶ʌsia Masá idjab̶a Meribá. Idjia trʌ̃ b̶ʌsia Meribá, israelerãba quĩrũbid̶eba biẽ́ bed̶easid̶a bẽrã. Idjab̶a trʌ̃ b̶ʌsia Masá, Ãcõrẽba sãwã oi cawaya israelerãba nãwã jarasid̶a bẽrã:
–¿Ãcõrẽra dadjirã tãẽna b̶ʌca wa neẽ́?–
Amalecitarã ume djõped̶ad̶a
8 Israelerãra wad̶i Repidiʌ̃ne panasid̶ad̶e amalecitarãda zed̶aped̶a ãdjirã ume djõni carea panasid̶aa.
9 Maʌ̃ bẽrã Moiseba idji carebabari Josueda trʌ̃ped̶a jarasia:
–Ʌ̃cʌrʌ umaquĩrãrãda jʌrʌ pedua nu amalecitarã ume djõne wãni carea. Maʌ̃ne mʌ̃ra eya zaque borod̶e b̶aya. Ãcõrẽba ne ununaca obi b̶ad̶a bacuruda mʌ̃ jʌwad̶e erob̶aya.–
10 Nurẽma Josuera idjia jʌrʌ ped̶a ẽberãrã sid̶a amalecitarã ume djõne wãsid̶aa Moiseba jarad̶a quĩrãca. Maʌ̃misa Moisera, Aaroʌ̃ra, Hur sid̶a eya zaque borod̶aa wãsid̶aa.
11 Mama Moiseba idji jʌwara ʌ̃taa wa nũmesia. Idji jʌwa ʌ̃taa wa nũmʌne israelerãba amalecitarãra poyabʌda basía. Baribʌrʌ idji jʌwara sẽped̶a ed̶aa norrab̶aribʌrʌd̶e amalecitarãba israelerãra poyabʌda basía.
12 Maʌ̃ne Moise jʌwara bio norrab̶ari b̶ʌ bẽrã Aaroʌ̃ba Hur ume mõgara waib̶ʌada enesid̶aa Moisera maʌ̃ ʌ̃rʌ̃ chũmemãrẽã. Maʌ̃be Aaroʌ̃ba Hur bid̶a idji jʌwara ʌ̃taa jira eropanesid̶aa, ab̶aʌba jʌwa acʌare, dewarabemaba jʌwa araare. Mãwã Moiseba idji jʌwara ʌ̃taa jira erob̶asia ab̶a ʌ̃mãdau b̶aebʌrʌd̶aa.
13 Maʌ̃ne Josueba idjia edad̶a ẽberãrã ume amalecitarãra poyasid̶aa.
14 Maʌ̃be Ãcõrẽba Moisea jarasia:
–Bãrãba amalecitarã poyaped̶ad̶ara cartad̶e b̶ʌdua israelerãba quĩrãdoarãnamãrẽã. Idjab̶a Josuéa jaradua mʌ̃a amalecitarãra naʌ̃ ẽjũãne jũma jõbida.–
15 Moiseba mõgarada ʌ̃tʌ pã buesia Ãcõrẽba poyabid̶ada quĩrãnebad̶i carea. Maʌ̃ mõgara ʌ̃tʌ pã bued̶ara Moiseba trʌ̃ b̶ʌsia “Ãcõrẽba dadjirãa poyabibaria.”
16 Moiseba nãwã jarasia:
–Amalecitarãra Ãcõrẽ ume djõne zeped̶ad̶a bẽrã id̶iba ʌ̃taa Ãcõrẽra ãdjirã ume djõ b̶aya.–