5
Moise Aaroʌ̃ sid̶a Egiptod̶ebema boro ume bed̶eaped̶ad̶a
1 Mãwãnacarea Moisera, Aaroʌ̃ sid̶a Egiptod̶ebema boromaa wãnaped̶a jarasid̶aa:
–Israelerã Ãcõrẽba nãwã jara b̶ʌa: “Mʌ̃ purura ẽjũã põãsa ewaraga b̶ʌd̶e idu wãbidua mʌ̃́a animarãda babue diad̶amãrẽã.”–
2 Maʌ̃ne Egiptod̶ebema boroba panusia:
–¿Cai maʌ̃ Ãcõrẽ mãwã idjia israelerã idu wãbiduad̶a ad̶ara mʌ̃a ĩjãi carea? Mʌ̃a idjira adua b̶ʌa. Maʌ̃ bẽrã mʌ̃a bãrã israelerãra idu wãbiẽ́a.–
3 Moiseba Aaroʌ̃ bid̶a jarasid̶aa:
–Dai hebreorã Ãcõrẽda daima odjaped̶a jarasia idji itea animarãda babue diad̶e wãnamãrẽã. Maʌ̃ bẽrã dairãra ẽjũã põãsa ewaraga b̶ʌd̶e ewari ũbea idu wãbidua mãwã od̶i carea. Mãwã od̶aẽ́bʌrʌ, Ãcõrẽba dairãra cacua biẽ́ b̶ʌped̶a quinibiya wa necoba quenabiya.
4-5 Baribʌrʌ Egiptod̶ebema boroba jarasia:
–¡Moise, Aaroʌ̃! Israelerãra zocãrã panʌa. ¿Cãrẽ cãrẽã bãrãba ãdjirã trajura obi ama panʌ? Bãrã israelerãra jũma trajad̶e wãbʌrʌd̶adua.–
6 Ara maʌ̃ ewarid̶e Egiptod̶ebema boroba dji traju obibada bororãa, dji traja panʌ bororã israelerãa bid̶a jarasia:
7 –Id̶iba ʌ̃taa israelerãa chiruada waa diarãnadua. Ãdjirãbʌrʌ chiruara jʌrʌ ped̶e wãnaped̶a de obada mõgarara od̶ida panʌa.
8 Baribʌrʌ wad̶ibid̶a ãdjia o panana quĩrãca obid̶adua. Ni ab̶a bid̶a ed̶aara od̶iẽ́ panʌa. Ãdjirãra coaid̶a tab̶ea bẽrã nãwã jara panʌa: “Dairãra idu wãbidua dai Ãcõrẽa animarãda babue diacuad̶i carea.”
9 Israelerãra wetara trajabid̶adua bari b̶earãnamãrẽã. Mãwã ãdjirãba Moise sewara ĩjãnaẽ́a.–
10 Ara maʌ̃da dji traju obibada bororãra, dji traja panʌ bororã israelerã sid̶a Egiptod̶ebema boromaʌba ẽdrʌd̶aped̶a israelerãa nãwã jarad̶e wãsid̶aa:
–Egiptod̶ebema boroba nãwã jara b̶ʌa: “Mʌ̃a waa chiruara diabiẽ́a de obada mõgara od̶amãrẽã.
11 Bãdjiabʌrʌ chiruara jʌrʌ ped̶e wãnida panʌa bãdjia jʌrʌbʌdamaa. Baribʌrʌ naãrã o panana quĩrãca od̶ida panʌa. Ni ab̶a bid̶a ed̶aara od̶iẽ́ panʌa.”–
12 Maʌ̃ bẽrã israelerãba jũma Egipto druad̶e chiruara jʌrʌ ped̶e wãsid̶aa.
13 Mãwã dji traju obibada bororãba israelerãra wetara trajabisid̶aa. Nãwã jarasid̶aa:
–Ewariza daucha od̶adua naẽna chirua diabadjid̶ad̶e o panana quĩrãca.–
14 Idjab̶a dji traju obibada bororãba dji traja panʌ bororã israelerãda ubadjid̶aa ãdjia b̶ʌped̶ad̶amĩna. Dji traju obibada bororãba ãdjirãa iwid̶ibadjid̶aa:
–¿Sãwãẽrã nuena, id̶i bid̶a bãrãba de obada mõgarara daucha od̶aẽ́ panʌ? Naẽna bãrãba ewariza daucha obadjid̶aa.–
15 Maʌ̃ bẽrã dji traja panʌ bororã israelerãra Egiptod̶ebema boromaa wãnaped̶a nãwã jarasid̶aa:
–Dairã bʌ nezocarãra bʌa jãwã oiẽ́ b̶ʌa.
16 Id̶ira chiruada diad̶aẽ́ panʌa, baribʌrʌ wad̶ibid̶a dji traju obibada bororãba de obada mõgarara ab̶arica daucha obi panʌa. Mãwã poya od̶aẽ́ panʌ carea ãdjirãba dairãra ubadaa. Baribʌrʌ dairãra bed̶ead̶e panʌẽ́a, ãtebʌrʌ bʌa b̶ʌcuad̶a traju obibada bororãda bed̶ead̶e panʌa.–
17 Maʌ̃ne Egiptod̶ebema boroba panusia:
–Bãrãra coaid̶a tab̶eaa. Maʌ̃ bẽrã nãwã jara panʌa: “Dairãra wãnia Ãcõrẽa animarãda babue diacuad̶i carea.”
18 Wãnadua bãdji trajud̶aa. Daiba chiruara bãrãa waa diad̶aẽ́a. Baribʌrʌ bãrãba de obada mõgarara naãrã o panana quĩrãca od̶ida panʌa.–
19 Maʌ̃ ũrĩsid̶ad̶e dji traja panʌ bororãba cawasid̶aa nẽbʌrad̶e panʌda.
20 Ãdjirã Egiptod̶ebema boromaʌba ẽdrʌbʌdad̶e unusid̶aa Moiseba Aaroʌ̃ bid̶a dajadaare ãdji jʌ̃ã panʌda.
21 Dji traja panʌ bororãba ãdjía jarasid̶aa:
–Ãcõrẽba bãrãra cawa oya. Bãrãdrʌ bed̶ead̶e panʌa dairãra Egiptod̶ebema boro quĩrãpita, dji dromarã quĩrãpita bid̶a biẽ́ panebʌda carea. Id̶ibʌrʌ bãrãba dairãra quenabid̶ia.–
Moiseba Ãcõrẽa iwid̶id̶a
22 Maʌ̃be Moiseba Ãcõrẽa iwid̶isia:
–¡Mʌ̃ Boro! ¿Cãrẽ cãrẽã bʌ purura biẽ́ o b̶ʌ? ¿Cãrẽ cãrẽã mʌ̃ra diabuesi?
23 Mʌ̃a Egiptod̶ebema boro ume bʌ trʌ̃neba bed̶ead̶amĩna, maʌ̃ ewarid̶eba idjia Israel purura wetara biẽ́ o b̶ʌa. Maʌ̃ awara bʌa ẽdrʌ b̶ʌyad̶a ad̶ara wad̶ibid̶a oẽ́ b̶ʌa.–