38
Judaba idji ãĩgu ume warrarã ununa
1 Maʌ̃ ewarid̶e Judara idji djabarãnebemada ãyã wãsia. Adulaʌ̃ purud̶e ẽberã Hira abadama b̶ad̶e wãsia.
2 Mama Judaba cananeo Súa cauda unusia. Judaba Súa caura edaped̶a idji ume cãĩsia.
3 Dji wẽrãra b̶iogoa b̶eped̶a umaquĩrã warrada tosia. Judaba idjira trʌ̃ b̶ʌsia Ere.
4 Dji wẽrãra wayacusa b̶iogoa b̶eped̶a umaquĩrã warrada tosia. Idjira trʌ̃ b̶ʌsia Onaʌ̃.
5 Wayacusa b̶iogoa b̶eped̶a umaquĩrã warrada tosia. Idjira trʌ̃ b̶ʌsia Sela. Sela tosid̶ad̶e Judara Quezib purud̶e b̶asia.
6 Juda warra iwina Ere cũdra bad̶acarea Judaba idji itea wẽrãda jʌrʌsia. Maʌ̃ wẽrãra Tamará abadjid̶aa.
7 Juda warra iwina Erera Ãcõrẽ quĩrãpita dji cadjirua basía. Maʌ̃ carea Ãcõrẽba idjira beubisia.
8 Mãwãnacarea Judaba idji warra Onaʌ̃a jarasia:
–Bʌ djaba quima bad̶ara edadua dadjia obada quĩrãca. Mãwã bʌa bʌ djaba b̶asi itea warrada oya.–
9 Baribʌrʌ Onaʌ̃ba cawa b̶asia maʌ̃ warrara idjid̶ead̶a ad̶aẽ́da, ãtebʌrʌ idji djaba b̶asid̶ead̶a ad̶ida. Maʌ̃ carea dji wẽrã ume cãĩ b̶ʌd̶e wagabadjia wẽrã b̶iogoa b̶erãmãrẽã. Mãwã idji djaba b̶asi itea warra oẽ́ basía.
10 Idjia mãwã o b̶ʌda Ãcõrẽba biẽ́ unusia. Maʌ̃ bẽrã Onaʌ̃ sid̶a beubisia.
11 Mãwãnacarea Judaba idji ãĩgu Tamaráa jarasia:
–Mʌ̃ warra Sela waribʌrʌmisa quima edaẽ́ bʌ zeza ded̶e b̶ad̶e wãdua. Sela drõã bad̶acarea idjia bʌra edaya.–
Ara maʌ̃da Tamarára dji zeza ded̶e b̶ad̶e wãsia. (Idji zezara Timnata purud̶e b̶abadjia.) Baribʌrʌ Judaba wãrãda quĩrĩãẽ́ b̶asia Selaba Tamará edaida. Waya b̶asia Sela sid̶a dji djabarã quĩrãca beuida.
12 Dãrã b̶ad̶acarea Juda quimara beusia. Idji quimara Súa cau basía. Idji sopua jõnacarea Judara Timnata purud̶aa wãsia idji oveja cara tʌbadamaa. Idji dji bia Hira Adulaʌ̃ purud̶ebemara idji ume wãsia.
13 Maʌ̃ne Timnatad̶ebemarãba Tamaráa jarasid̶aa:
–Bʌ zãwãrẽra namaa zebʌrʌa idji oveja cara tʌbi carea.–
14 Maʌ̃ ũrĩsid̶e Tamarába pẽdrarãba jʌ̃bada jʌ̃ b̶ad̶ara ẽrãped̶a idji quĩrãra quẽbʌ daucha wuaba bʌrasia ni ab̶aʌba cawarãnamãrẽã. Maʌ̃be Enaiʌ̃ purud̶aa wãsia. Maʌ̃ purura Timnatad̶aa wãbada o caita b̶asia. Tamarára dji purud̶e ed̶a wãbadama chũmesia wẽrã aud̶uaba obada quĩrãca. Idjia mãwã osia Judara idji ume cãĩmãrẽã. Cawa b̶asia Selara cũdra b̶ʌmĩna Judaba idjía diaẽ́da idji quima bamãrẽã.
15 Judaba Tamará unubʌrʌd̶e wẽrã aud̶uada crĩchasia, idji quĩrãra wuaba bʌrá erob̶ʌ bẽrã.
16 Judaba adua b̶asia idji ãĩguda mãwã b̶ʌda. Maʌ̃ bẽrã Tamarámaa wãped̶a jarasia:
–¿Bʌra mʌ̃ ume cãĩca?–
Tamarába panusia:
–Mʌ̃da bʌ ume cãĩbʌrʌ, ¿bʌa mʌ̃́a cãrẽda diai?–
17 Judaba jarasia:
–Mʌ̃ animarãnebema chiwatu zaqueda ab̶a diabueya.–
Tamarába jarasia:
–Bia b̶ʌa, baribʌrʌ maʌ̃ diabuebʌrʌmisa bʌa nebia erob̶ʌd̶ebemada mʌ̃ ume b̶eedua cawai carea bʌa wãrãda diabueida.–
18 Judaba iwid̶isia:
–¿Cãrẽ nebiada mʌ̃a bʌ́a diai?–
Maʌ̃ne Tamarába panusia:
–Mʌ̃ ume b̶eedua bʌa sẽyã obarida dji jʌ̃cara bara, idjab̶a bacuru bʌ jʌwad̶e erob̶ʌ sid̶a.–
Ara maʌ̃da idjia iwid̶id̶ara Judaba diaped̶a idji ume cãĩsia. Mãwã Tamarába Juda warrada b̶iogoa b̶esia.
19 Mãwãnacarea Tamarára diguid̶a wãsia. Idji quĩrã bʌrá erob̶ʌ wuara ẽrãped̶a wayacusa pẽdrarãba jʌ̃badara jʌ̃sia.
20 Maʌ̃be Judaba idji dji bia Hira Adulaʌ̃nebemara diabuesia chiwatu zaquera wẽrã aud̶uaa diamãrẽã. Diaped̶a Hiraba Juda nebia b̶eed̶ara wayacusa edaida b̶asia. Baribʌrʌ Hiraba dji wẽrãra unuẽ́ basía.
21 Maʌ̃ carea idjia mamabemarãa iwid̶isia:
–Wẽrã aud̶ua nama Enaiʌ̃ purud̶aa zebada o icawa chũmanara ¿sãma b̶ʌ?–
Ãdjirãba panusid̶aa:
–Nama wẽrã aud̶uara ni ab̶a bid̶a neẽ́a.–
22 Maʌ̃be Hirara Judamaa jẽda zeped̶a jarasia:
–Jãʌ̃ wẽrãra mʌ̃a unuẽ́ basía. Arimabemarãba jarasid̶aa jãma wẽrã aud̶uara ni ab̶a bid̶a neẽ́da.–
23 Maʌ̃ne Judaba jarasia:
–Mʌ̃a nebia b̶eed̶ara idjid̶e baya. Mʌ̃a chiwatu zaquera idji itea diabued̶amĩna bʌa idjira unuẽ́ basía. Waa diabueẽ́a jãmabemarãba dadjira ipid̶a jararãnamãrẽã.–
24 Jed̶eco ũbea babʌrʌd̶e Judaa nãwã jarasid̶aa:
–Bʌ ãĩgu Tamarába aud̶uada od̶a bẽrã b̶iogoa b̶esia.–
Maʌ̃ carea Judaba jĩgua jarasia:
–¡Purud̶eba dajadaa eded̶aped̶a bá bead̶adua!–
25 Ara maʌ̃da Tamará edad̶e wãsid̶aa. Baribʌrʌ dajadaa edebʌdad̶e Tamarába dji zãwãrẽ Judaa nãwã bed̶ea diabuesia: “Naʌ̃ nebia djibariba mʌ̃ra b̶iogoa osia. Acʌdua za b̶ʌ sẽyã obarida dji jʌ̃cara bara, idjab̶a za b̶ʌ bacuru sid̶a. ¿Caida djibari?”
26 Judaba maʌ̃ nebiara idjid̶eda cawad̶a bẽrã nãwã jarasia:
–Jãʌ̃ wẽrãba od̶ara mʌ̃a od̶a cãyãbara jipaara b̶ʌa, mʌ̃ warra Selara idjía diad̶aẽ́ bẽrã.–
Idjira ẽdrʌ b̶ʌped̶a Judara idji ume waa cãĩẽ́ basía.
27 Tamará warra toi ewarid̶e cawasia mĩguisoda toida.
28 Tobʌrʌd̶e jʌwada na odjasia. Maʌ̃ne dji warra careba tobibari wẽrãba maʌ̃ jʌwad̶e jʌ̃cara purruda jʌ̃ b̶ʌsia. Jarasia: “Za b̶ʌda na odjasia.”
29 Baribʌrʌ jʌwara waya ed̶a wãsia. Maʌ̃ne dewarabemada na tosia. Dji careba tobibari wẽrãba jarasia: “Bʌra ¿sãwãbʌrʌ na tosi?” Mãwã idjira trʌ̃ b̶ʌsid̶aa Paré.
30 Mãwãnacarea idji djaba, jʌwad̶e jʌ̃cara purru jʌ̃ b̶ʌda tosia. Maʌ̃ carea idjira trʌ̃ b̶ʌsid̶aa Zará.