Ãcõrẽ Bed̶ea NUMERO 12

Mariaba Aaroʌ̃ bid̶a Moise biẽ́ jaraped̶ad̶a

1 Mariaba, Aaroʌ̃ bid̶a ãdji djaba Moiseda biẽ́ jara panesid̶aa ãĩbema wẽrã edad̶a carea.* 2 Ãdjia nãwã jarasid̶aa:

–¿Ãcõrẽra ab̶abe Moised̶eba bed̶eabarica? ¿Dadjid̶eba bid̶a bed̶eacaca?–

Mãwã bed̶ea panʌra Ãcõrẽba biẽ́ ũrĩsia. ( 3 Jũma naʌ̃ ẽjũãne Moisera dji dromaara b̶ai crĩchara neẽ́ b̶asia.) 4 Ara maʌ̃da Ãcõrẽba Moisea, Aaroʌ̃a, Mariaa bid̶a jarasia:

–Bãrã ũbea mʌ̃ wua demaa zed̶adua.–

Ara maʌ̃da wãsid̶aa. 5 Maʌ̃ne Ãcõrẽra jʌ̃rãrã ʌ̃tʌba ed̶aa drasoa jira b̶ʌd̶e ed̶aa zesia idji wua ded̶e ed̶a wãbadamaa. Mama Aaroʌ̃ra Maria sid̶a caitaara trʌ̃sia. Ara maʌ̃da caitaara wãsid̶aa. 6 Maʌ̃be Ãcõrẽba ãdjía jarasia:

–Mʌ̃a jarabʌrʌda bio ũrĩnadua. Mʌ̃neba bed̶eabadarã bãrã tãẽna b̶ea ume mʌ̃ra cãĩmocarad̶eba idjab̶a cãĩmocara quĩrãca ne unubi b̶ʌd̶eba bed̶eabaria. 7 Baribʌrʌ mʌ̃ nezoca Moise ume mãwã bed̶eacaa. Jũma mʌ̃ ẽberãrã cãyãbara idjiabʌrʌ mʌ̃ra biara ĩjã b̶ʌa.† 8 Idji ume mʌ̃ra nẽbʌrʌbaria. Ne jara b̶ʌd̶eba idji ume bed̶eacaa. Ãtebʌrʌ ebud̶a jarabaria. Idjia mʌ̃ra unubaria. Mãwã b̶ʌ bẽrã ¿bãrãba cãrẽ cãrẽã wayad̶aẽ́ basi mʌ̃ nezoca Moisera biẽ́ jarad̶i carea?–

9 Ãcõrẽra ãdji ume bio quĩrũped̶a wãsia. 10-11 Ãcõrẽ wua demaʌba jʌ̃rãrã ʌ̃taa wãbʌrʌd̶e Mariara aid̶aba bira nũmesia.‡ Maʌ̃ unusid̶e Aaroʌ̃ba Moisea nãwã bed̶ea djuburiasia:

–Mʌ̃ boro, mʌ̃ quĩrã djuburia daiba crĩchad̶aẽ́ne cadjirua oped̶ad̶ara quĩrãdoadua. 12 Maria cacuara idu jũma ãrĩ b̶ebirãdua warra ʌradʌgad̶a quĩrãca.–

13 Ara maʌ̃da Moiseba Maria carea Ãcõrẽa quĩrã djuburiada nãwã iwid̶isia:

–Ãcõrẽ, mʌ̃ quĩrã djuburia mʌ̃ djabawẽrã Mariara biabidua.–

14 Ãcõrẽba panusia:

–Idji zezaba cawa obʌrʌd̶e idji quĩrãdarrad̶e id̶od̶abara, ¿siete ewari puru jĩga b̶ʌd̶aẽ́ bacasid̶aca quĩrã peramãrẽã?§ Ara maʌ̃ quĩrãca bãrãba idjira siete ewari puru jĩga b̶ʌd̶ida panʌa. Mãwãnacarea poya jẽda zeya.

15 Ara maʌ̃da israelerãba Mariara puru jĩga b̶ʌd̶e wãsid̶aa siete ewari mama b̶amãrẽã. Maʌ̃ siete ewarid̶e israelerãra nocod̶aa wãnaẽ́ basía ab̶a Maria jẽda zebʌrʌd̶aa. 16 Zed̶acarea Hazerod̶eba Paraʌ̃ ẽjũã põãsa ewaraga b̶ʌd̶e jũẽne wãsid̶aa.

* 12:1 Ãĩbema wẽrã. Hebreo bed̶ead̶e b̶ʌ́ b̶ʌa: “Cusita wẽrã.” Ebud̶a b̶ʌẽ́a maʌ̃ wẽrãra Seporá basida wa Moiseba dewarada edasida. † 12:7 Idjiabʌrʌ mʌ̃ra biara ĩjã b̶ʌa. Ʌ̃cʌrʌmaarã nãwã jara b̶ʌa: “Mʌ̃ purura idjía diasia wagamãrẽã.” ‡ 12:10-11 Mariara aid̶aba bira nũmesia. Hebreo bed̶ead̶e b̶ʌ́ b̶ʌa: “Mariara aid̶aba nieve quĩrãca b̶asia.” § 12:14 Ab̶aʌba djãrã quĩrãdarrad̶e id̶osira maʌ̃ ẽberãra Ãcõrẽ quĩrãpita biẽ́ b̶esia.