☰ APOSELE 15
15
Jetusaleme kambuiyamino doko
1 Dopa** pyoo kateaminopa Juta mendapuame ipupala masoo miningi kaiminingi dupa mana lamaiyoo pituu, “Nyakamame Moseseme mana seteamoli pyoo elya pingi kambu kepala nayatamino kandao doko, Goteme nyakama pyoo nyala nayatana,” lamaiyami-pyaa.
2 Dopa* lao mana lamaiyoo kateaminosa Polo Banapasapame etete imbu kayapala dupa-pipa pii yanda pyoloo piami-pyaa. Dopa piaminopa masoo miniamino dupame Polo Banapasa-pipa dee nyakamanya akali mendatupapi yapao nyepala Jetusaleme yuu dokonya aposelepi isingi akalipi dupa-pipa pii lao tolasala pena leami-pyaa. 3 Sosa dokome akali dupa pena lateaminopa Pinisiapa Samatiapa yuu dolaponya-kaita peami-pyaa. Pao pituu Goteme endakali tata waka dupanya mona dopa pyoo kapilyakamaiyana lao pii doko lamaiyoaka peami-pyaa. Pii dokome masoo miningi kaiminingi dupanya mona etete yaepasakamaiyami-pyaa. 4 Dupa* Jetusaleme yuu dokonya pao pyakamateaminopa Jetusaleme tange sosa dokopi, aposele dupapi, isingi akali dupapi dupame akali epeamino dupa taeme ipamini lamo lao lanyiami-pyaa. Dopa peteaminopa Polo Banapasapame Goteme nalimba-pipa awapa kalai dupa pitaka piana lao panao lamaiyambi-pyaa. 5 Dopa* lao lamaiyambiaka doko, Patasi dupanya masoo miningi akali mendapuame sakatao lao pituu, “Nyakamame akali dupanya elya pingi kambu kepatakamaitala, Moseseme mana setapae nyiamo dupa watao minina lao lamaipengena,” leami-pyaa.
6 Dopa leaminosa aposele dupapi isingi akali dupapi dutupame pii dokonya lao wasalanya limbiami-pyaa. 7 Limbatala* pii longo lao yanda pyoloo pyoo peteaminopa, Pitame toya katapala pii mende dupa kandao lao pituu, “Kaimia paluma, wamba Goteme naima-kisa kalai mokosoo pituu, endakali tata waka dupame Wai Pii Epe doko sepala masoo minina lao nambame lamaitinopa lao baame namba yapao nyiamo doko nyakamame masilyamino. 8 Mona* kandenge Gote dokome endakali tata waka dupa lanyetona lao masiamo doko laitaka pyaanya Oli Sipitisa doko naima diamoliaka pyoo dupa maiya. 9 Goteme* naima-kisa mana waka mende minatala, tata waka dupa-kisa mana waka mendeaka pyoo minala naya. Masoo miniamino ongonya baame dupanya koo dupa kunanya nepakamaiya. 10 Dopana,* aipuma nyakamame indupa Gote minao makande pyaanya kenda pipae naimanya yumbange dupapi naimapimi kapa pao nasiamano doko masoo miningi endakali dupa-ketae setamana lao masilyamipi? 11 Dopaka* doko, naimame dapa lao masoo minilyamano: Kamongo Jisasanya mona epe palenge dokome naima pyoo nyepea. Endakali tata waka dupa dopaka peteana,” lea-pyaa.
12 Pitame* dopa lateamopa endakali longo limbiamino dupame pii mende naleami-pyaa. Banapasa Polopame nalimba-kisa endakali tata waka dupanya kainanya Goteme kongalipi kalai paka pipaepi dupa piana lao leambino doko dupame soo peteami-pyaa. 13 Dokopa* Jemesame lao pituu, “Kaimia paluma, nambame pii mende lelyona salapape. 14 Goteme* wambao endakali tata waka dupa-kisa ipupala dupa baanya joo katatamina lao lanyiamo doko Saimoneme panao nyakama langitalamo. 15 Potopesa dupame pii mendai dokoaka lao pepa piamino doko dapa lao pyapae mee silyamo:
16 ‘ “Maitakao* namba pilyetala
Dapitinya anda*lakembatae silyamo doko dee pito.
Anda dokonya koyatamo dupa nambame dee wasoo pinya katato.
17-18 Dopana, nambanya latae endakali tata waka dupa pitakame namba kutatami.”
Wamba waka pitona lao panasetala pilyamo Kamongo dokomeaka dopa lelyamona,’ lao pepa pyapae silyamo.
19 “Tenge* dokonya minao tata waka dupame Gote lao mona kapilyilyamino endakali dupa kenda pisala nayamana lao nambame masilyo. 20 Dopa* napinya, dupame sambo gote lao kundi maitae nee dupapi, mena yakapi mange minao kaimindokao kumasetae dupapi, taiyoko pyapae dupapi dupanya nala nayao kepo kolenge mana dupa watao napayalapape lao pepa pyasakamaimana. 21 Doko,* wamba waka akali dupame yuu taono dupa pitakanya Sambasa dii lao Jutamanya losuu anda dupanya Mosesenya pii doko itaki pyao lamaiyamino doko lamaiyoaka kalyaminona,” Jemesame dopa lea-pyaa.
Endakali tata waka dupanya pepa pyao pyasakamaiyamino doko
22 Dokopa* aposelepi, isingi akalipi, sosanya endakali dupa pitakapimi nyakamanya akali mendapua yapao nyepala Polopa Banapasapa-pipa Andioko yuu taono dokonya pena leami-pyaa. Dupame Sailasapa Jutasa baa kenge mende Basapasa lenge dokopa dolapo pena leami-pyaa. Dolapo masoo miningi kaiminingi dupanya andake joo kateambi-pyaa. 23 Dolapo-kisa* dupame dapa lao u pepa mende pyapala pyasiami-pyaa. “Naima aposelepi isingi akalipi masoo miningi kaiminingi dupame nyakama tata waka masoo miningi kaiminingi Andioko yuu dokopi, Sitia yuu dokopi, Silisia yuu dokopi yuu dutupanya kalyamino dupa nyakama auu pyoo kalyepape lelyamano. 24 Naimanya* akali mendapuame nyakamanya masingi sakatasakao dupanya pii dokome nyakamanya mona koo palisekelyamino leamino pii doko sepeama. Dopaka doko, naimame dopa pina naleama. 25 Dopana, indupa naimame mona mendai paliuu akali mendalapo yapao nyepala, naimanya auu kaenge Polo Banapasa-pipa awapa nyakama kalyamino ongonya epekena lelyamano. 26 Polo* Banapasapa dolapome naimanya Kamongo Jisasa Kataisanya kenge doko lao minalyoo katao kumingi doko paka nakaengemba. 27 Dopana, naimame Jutasa Sailasapa dolapo epekena latala dolapome pii datupaka nyakama langina lelyamano: 28 Naimapi* Oli Sipitisa dokopimi nyakama-kisa kenda pipae mende setala nayamana lao masilyamano. Nyakamame mana datupa iki dapa pyoo minalapape: 29 sambo* gote dupa kundi maitae dupapi, taiyoko pyapae dupapi, mena yakapi mange minao kaimindokao kumasetae dupapi dupa nala nayalapape. Kepo kolala nayalapapeaka. Mana koo dupa nepatala wakale katatamino kandao doko, nyakama auu pyoo katatami. Pii utupaka iki lelyamanona,” lao pepa pyasakamaiyami-pyaa.
30 Dopa lao pepa pyapala minao pena lateaminopa akali dolapome Andioko yuu dokonya pyakanatala sosanya endakali dupa limbina latala pepa doko dupa maiyambi-pyaa. 31 Maitiambinopa Andioko tange dupame pii auu pipae siamo dupa itaki pyao kandatala mona yaepeami-pyaa. 32 Jutasa* Sailasapa dolapo potopesa joo kateambiaka-pyaa. Dolapome pii longo lao lamaiyoo masoo miningi kaiminingi dupanya mona minao sakatasetakamaitala pupu lasiambi-pyaa. 33 Dolapo* kote mendatupa yuu dokonya katapeambinopa masoo miningi kaiminingi dupame dolapo auu pyoo lasa latala epena leamino endakali dupa kateamino yuu dokonya pilyina leami-pyaa. 34 [Dopaka doko, Sailasa dokome Andioko yuu dokonya mee katatoakana lao masetala katea-pyaa.] 35 Polo* Banapasapa Andioko yuu dokonya kote mendatupa apata dee kateambiaka-pyaa. Dokopa akali mendapua-pipa awapa katao Kamongonya Wai Pii Epe doko endakali dupa lamaita mana lamaita pyoo kateambi-pyaa.
Polo Banapasapa tale piambino doko
36 Kote mendatupa pateamopa Polome Banapasa lamaiyoo, “Nalimba dee pilyetala yuu taono dupa pitakanya Kamongonya pii doko lamaiyambano masoo miningi kaiminingi dupa aipa pyoo kalyamipi lao kanja bonalena,” lea-pyaa. 37 Dopa* leamopa Banapasame Jone Make lenge doko apata mona lanyimbuali lao masia-pyaa. 38 Dopa* lao masiamopa Polome akali dokome nalimba Pambilia yuu dokonya yakinatala kalai pyaanya awapa napeamano doko lanyoo patambanopa kapa napatana daa lao masia-pyaa. 39 Dokonya akali dolapome pii imbu kayao laloo petala tale piambi-pyaa. Tale petala Banapasame Make lanyepala sipi mendenya pituu Saipotasa yuu dokonya pea-pyaa. 40 Polome* Sailasa yapao nyepeamopa masoo miningi kaiminingi dupame Kamongonya mona epe palenge doko emba-pipa awapa pupape lateaminopa pea-pyaa. 41 Pupala* baame Sitiapa Silisiapa yuu dolaponya sosa dupa pupu lasoo paya-pyaa.
* 15:1 Lep 12:3; Ap 21:21,25; Ga 5:2 * 15:1 Ga 2:1-10 * 15:2 Ap 11:30 * 15:4 Ap 14:27; 21:19 * 15:5 Ap 15:1 * 15:7 Ap 2:14; 10:1-43 * 15:8 Ap 2:4; 10:44-47; 11:15 * 15:9 Ap 10:34-35; 11:17 * 15:10 Mt 11:30; 23:4; Ga 3:10; 5:1 * 15:11 Lo 7:1-25; Ga 2:16; 3:10-12 * 15:12 Ap 14:3,27; 21:19; Ga 2:7 * 15:13 Ga 2:9 * 15:14 Ap 13:47; 15:7-9; 18:10; Lo 9:26; 15:9-12; 16:26 * 15:16 Emo 9:11-12 * 15:16 dapitinya anda Dapitinya anda lelyamo doko Dapiti tata dupa dee sakatasalanya kongali lao lea-pyaa. * 15:19 Ap 3:19; 21:25 * 15:20 Jen 9:4; Eke 34:15-17; Lep 17:10-16; 18:6-23; 1 Ko 8:7 * 15:21 Ap 13:15,27 * 15:22 Ap 15:40; 1 Te 1:1; 2 Te 1:1; 1 Pi 5:12 * 15:23 Ap 16:4 * 15:24 Ap 15:1; Ga 2:12 * 15:26 Ap 9:15-16 * 15:28 Mt 23:4; Ap 1:8; 5:32; 21:25 * 15:29 Ap 15:20 * 15:32 Ap 11:27; 13:1; 14:22 * 15:33 Ap 14:22 * 15:35 Ap 2:42; 14:28 * 15:37 Ap 12:12 * 15:38 Ap 13:13 * 15:40 Ap 13:3; 15:22 * 15:41 Ap 14:22
☰