11
Polopi sambo aposele dupapi
Nambame* kyakaenge pii kuki mende latalale lao nyakamame kayapimi laka lao masilyona, kaimini etete, dopa pitoo kayalapape! Goteme* pingili pyoo nambame nyakama neame kumilyo. Doko, nyakamame akali mendai iki nyalapale lao nambame nyakama makande peteo. Nambame nyakama enda mapuakae mende napingi etete epe mende joo Kataisa maitoo lao masetala dopa pio. Dopaka* doko, kanopato dokome baanya waa katenge mana dokome enda Epa minakasiamo dokaita doko, nyakama kyakapala mona epe mendai palyoo Kataisa watao miningi doko yakinatamini lao paka kaelyo. Doko,* endakali mendeme nyakama katamisa ipupala naimame langiamano Jisasa dokonya lao langya naenya, Jisasa waka mendenya lao langilyamo dokonyapi, dee wamba nyakama Sipitisa nyiamino doko nyala naenya sipitisa waka mende nyilyamino dokonyapi, dee Wai Pii Epe wamba siamino doko sala naenya waka mendepale mende silyamino dokonyapi nyakama kukipi mende mona kenda nakaengema.
Nyakamanya* aposele etete wakane dupame namba mendaipi mendeme ita naminilyaminona lao masilyo. Dopaka* doko, pii lamaiyanya namba mana nanyingi akali mende joo katato kandawapi, namba masingi daa jala naenge. Daa, naimame mana minilyamano dupa pitakame endakali dupa pitakanya enombanya nyakama laitaka pingi.
Nambame* nyakama minalyalanya namba tange koo joo katao, Gotenya Wai Pii Epe doko nyakama mee langio. Dopa pio doko koo piope? Nambame* nyakamanya kaina dokonya kalai pio dokopa sosa waka dupame namba nisiami dupa nyio. Dopa pio doko, nambame nyakama nisalanya dupa-kisa waa nyili pio. Wamba* namba nyakama-pipa awapa katao namba oapi daa joo kateo dokopa nyakamanya mende kenda pisala nayo. Daa, masoo miningi kaiminingi Masetonia katao epeamino dupame namba daa jiamo dupa kapa pisiami. Nambame nyakama opale mendenya minao kenda pisala nayatoo latala kandao isoo kateona dee nambame dopaka pito. 10 Kataisanya* kiningi pii doko namba-kisa silyamo dokaita doko, Akaya yuu doko pitakanya endakali mendeme namba tange lalyilyo pii doko kaita lyokala nayata etete mauwa. 11 Doko* aipuma nambame dopa lelyope? Nambame nyakama auu nakayapala dopa lelyope? Daa, Goteme kandelyamo.
12 Akali mendapuame kalai pilyamino dokonya luiyao katao endakali dupanya lengelyaapi dokonya naima yale joo kalyanya kaitini kutao kalyamino. Dopa pilyaminoaka doko, dupame kutao nakandena lao nambame indupa pilyoliaka pyoo pyoo katato. 13 Doko,* akali dupa sambo aposele. Dupame sambo lao minakasoo kalai pyoo katao mana minilyamino dupa Kataisanya aposele kiningimi minili pingima. 14 Dopaka doko, dokonya walu lapenge daa. Doko, Satane tangeme baa tii pipae dokonya enjele mendeaka paele pingi! 15 Dopana,* baanya kalai akali dupame mana tolatae dokonya kalai akali paele pitamino doko enenge mende daa. Akali dupa etatamino dokopa dupame kalai pitamino dokopa kapa lao yanu nyetami.
Polome aposele kalai pyoo tanda neamo dokonya leamo doko
16 Nambame* deaka langilyona, endakali mendeme namba akali kyakaengena lao masala nayapenge. Dopaka doko, nyakamame namba kandao dopa lao masetamino kandao doko, nambame apata kuki mende namba tange lalyetatoo kayalapape. 17 Nambame* namba tange kapana lao masoo lalyoo pii laanya pilyo doko, Kamongonya mana doko watao laanya napilyo. Daa, namba kyakaenge joo laanya pilyo. 18 Endakali* longo dupame nyakama dopalena lao masetala tange lalyingima dokonya nambame dopaka pitoo. 19 Doko,* nyakama endakali masepaema dokonya endakali kyakaenge dupa nyakama-pipa katapuma laka lao masetala katena kaengema. 20 Endakali mendeme nyakama baanya kendemane injisowapi, nyakamanya oapi dupa pitaka etasakawapi, nyakama sambo langyoo minakasetala lanyowapi, nyakama luingyowapi, nyakama lengelyaapi pyao takyowapi pilyamo dokopa nyakamame dopa pina lao kaengema. 21 Naima akali tambo lapae joo katao nyakama kandao dopa pyaanya paka pingi. Dopa pingina lelyo dokonya namba-kisa elya silyape?
Dopaka doko, endakali mendeme opale mendenya mona tuu tuu petala baa tange lalyetoo lao masetamo dokonya-kyakaenge joo lelyona-nambame apata dopaka pitoo. 22 Dupa* Iputupi? Namba apata Iputuaka. Dupa Isataelepe? Namba apata Isataeleaka. Dupa Apotakamenya yumbangepe? Namba apata Apotakamenya yumbangeaka. 23 Dupa* Kataisanya kalai akalipi? Etete kyakaenge joo lelyona-nambame dupa ita minao Kataisanya kalai akali kalyo. Namba epao lekeleke tao kateo. Namba anjetae paliti-paliti sio. Endakali dupame namba konjame pyao indiami. Paa longosa kumapenge joo kateo. 24 Juta* dupame paa yuungisa namba konjame piami. Doko dupame pingili pyoo pee kingi-ita tepoma-kisa dee mange mendai waketao lawaka piami. 25 Paa* tepomasa Loma tange mendapuame namba kyoo konjame piami. Paa mendai endakali dupame namba kaname piami. Paa tepomasa namba sipinya pituu peyopa, sipi dutupa koya. Kuka kotakapi gii lapoma namba solowata pete andake dokome soo payao katea. 26 Paa* longosa namba kaitini payopa endaki dupanya mangeoli jia. Akali makongopae dupame kaitinisa anga petala namba piamili jia. Namba tatapi tata wakapi dupame namba koyasiamili jia. Yuu taono dupanyapi, endakali napalenge yuu dupanyapi, solowata pete andake dokonyapi koyoli jia. Dee sambo masoo miningi kaiminingi dupame namba koyasiamili jiaka. 27 Nambame* kalai lekeleke tao tanda nao pio. Paa longo namba luu napaleo. Namba lopo kayao endaki nanu kayao kateo. Paa longo namba neepi mende nanao kupa kayao yongenya pingi daa joo kateo. 28 Dee* kenda pipae nambame nalelyo dupanya mende konda pyoo doko nambame sosa dupa pitaka neame kumingi. Kenda pipae andake dokome koteaka lao namba sanga pingi. 29 Endakali* mende tambo lapae joo katelyamo dokopa nambame baanya kalaina lao masala naenge. Endakali mendeme endakali mende koo pina lao mapisilyamo dokopa nambame dokonya etete epao mona kenda kaenge.
30 Nambame* namba tange lalyepenge jetamo kandao doko, opale dupame namba akali tambo lapaena lao laitaka pingi dokonya lalyoto. 31 Nambame sambo nalelyo. Kamongo Jisasanya Gote-kisa Takange tanga tangapi lalyepenge dokome kandelyamo. 32 Namba** yuu taono Damasakosa kateo dokopa Kiŋi Atetasanya nisingi akali andake dokome namba anjalanya yuu dokonya kaita kembo dupanya namba anga pina lea-pyaa. 33 Dopa* piamoaka doko, namba baseketa mandi elyoko andakeme petae mendenya mandipala yuu taono doko kakopatae kame londe dokonya tii lumbao seteami mendenya kamalyatena pyandeami. Dopa peteaminopa namba baa paka peo.
* 11:1 2 Ko 11:20 * 11:2 Dit 4:24; Osi 2:19-20; Ep 5:26-27; Pa 21:2,9 * 11:3 Jen 3:1-5,13 * 11:4 Ga 1:6-9 * 11:5 1 Ko 15:10; 2 Ko 12:11; Ga 2:6 * 11:6 1 Ko 1:17; 2:1,13; Ep 3:4 * 11:7 Ap 18:3; 1 Ko 9:12,18; 2 Ko 12:13 * 11:8 Pl 4:15-18 * 11:9 2 Ko 8:1-2 * 11:10 1 Ko 9:15 * 11:11 2 Ko 12:15 * 11:13 2 Ko 2:17; Pl 3:2; Pa 2:2 * 11:15 Pa 2:2 * 11:16 2 Ko 12:6 * 11:17 1 Ko 7:12,25 * 11:18 2 Ko 3:1 * 11:19 1 Ko 4:10 * 11:22 Ap 22:3; Lo 11:1; Ga 1:13-14; Pl 3:4-6 * 11:23 Ap 16:23; 20:19; 1 Ko 15:10; 2 Ko 6:5; 10:7; 2 Ti 3:11 * 11:24 Dit 25:2-3 * 11:25 Ap 14:19; 16:22 * 11:26 Ap 9:23; 14:5 * 11:27 1 Ko 4:11; 2 Ko 6:5 * 11:28 Ap 20:18-21,31 * 11:29 Lo 9:1-3; 1 Ko 9:22 * 11:30 1 Ko 12:5 * 11:32 2 Ko 1:23 * 11:32 Ap 9:23-25 * 11:33 Jas 2:15